1Ma anyak eet ci atu Yesu Kiristo mayo nuun ŋaan kidic tuwɛn cinɛ o, atalta nɔɔnɔ reezinta labak. Má adaŋonu ki nɔɔnɔ kaale ci abaaban niini. 2Ɛɛti oman atuwe ma olla adak kaal dook labak, maje bar ɛɛti ci kidic tuwɛn cinɛ anyak kaal oogi ci abor niini. 3Mazin ɛɛti ci atuwe, ma olla adak niini kaal dook o, alaŋ abon ŋaati apɛzi gɔn ci abor ŋaati adayi kaal oogi o. Ma buk ɛɛti ci abor kaal oogi o, alaŋ abon ŋaati apayɛki gerzitin gɔn ci adak kaal dook o, eeci alaŋ abor nɔɔnɔ Jooi. 4Ma niina ineet ŋɛnɛɛn ci ka payek gabaren ci eet oma gerzitin o? Zin bar alaan o gabaren nico doon o ka kapayek nɔɔnɔ gerzitin, karabɔŋ een bonat. Mazin gabarɛnti nici aruwek niini zɔɔ looc kutugu kaal ci abon tup dɔyize o anyek nɔɔnɔ Manyi Kiristo.

5Azi gɔɔn ɔl ogɛnɛ nɛ, “Adiŋdiŋ iinya ogɛn kujuk iinya dook.” Maje ɔl ogɛn azi nɛ, “Atobɔ iinya dook nɔkɔ.” Abon zin gɔɔn ɛɛti ceeni aruwek zɔɔ looc giye o atu niini. 6Ma ɛɛti ci anyek iiten codoi kidiŋdiŋ agɔɔn niini gi nico o ka kidiŋdiŋani Manyi. Ɛɛti ci adak kaal dook labak o adiŋdiŋan buk niini Manyi giye nico, eeci anyek niini Jook zany kaale o adak. Ma ɛɛti ci abor ŋaati adayi kaal oogi o adiŋdiŋan buk niini Manyi gole nico, ma anyek Jook zany kaale ci anyek Jooi nɔɔnɔ kadak o. 7Akɔm eet ci arogi giye ci ɛlɛ cin doon. Ma buk akɔm eet ci adaai giye ci ɛlɛ cin doon. 8Mã karogi, karognek naaga Kiristo. Matɛ kadaai, ŋaan ni buk kavɔ ŋaatin. Zin mayo nuun karogi, karabɔŋ kadaai, ŋaan ni keegin naaga ɔl cigin nɔkɔ. 9Eeci Kiristo iiya adaak, ma bodo itiŋa daayiza ka kizi niini Manyi ci ɔl o arogi been ɔl o adaai buk.

10Alaŋ abon ŋaati apayɛkɛ niina gotonu gerzitin, karabɔŋ apez nɔɔnɔ. Eeci naaga dook karɛ payiin o ka kook kapaket Jooi ageet katin. 11Ayeedi waragewe o Joowo zɔɔz ci anɛ Manyi nɛ, “Giye o karognɛ, agɔlakan katin ɔl dook aneeta, ma avu akani kozoŋti looc aneet ŋuma, ma adiŋdiŋanan niigi aneet kagayan keen didi Jook nɛɛn.” 12Kɛɛl zin katin iitene nice naaga dook ŋume o Joowo, ma kaduwak nɔɔnɔ kaal o abon kibeen kaal o gɛr baal gɔɔn kagɔɔn loota ŋina e dook.

13Ma ŋaan zin bodo apawonu niiga maany gerzitin. Má anyeku gonogu o tuwento kutuguzɔ kaal ci amiirɛnɛ nɔɔgɔ kivurut tuwente uneeŋ, makacin abaca oŋɛ. 14Ma naana o koromtewa ki Kiristo kaga ɔrɔɔt akɔm dayiinɛ dook ci gɛr ŋume o Joowo. Bar zin mã acin ɛɛti dayiin ci kizik ŋaatin gɛrzɛ ŋume o Joowo, abon ooŋ niini dayiin nicoko. 15Mã anyak dayiin ci abor gon oman, ma adaku ŋaati aavɛ niini tɔ, alaŋ koca didi areezu niiga nɔɔnɔ. Má adaku zin dayiin ci abor niini o ŋaati aavɛ niini tɔ gɛrzɛ ŋaan uulalu tuwɛn cin o, eeci Kiristo adaai buk eete nico. 16Mayo nuun gi nici abon ŋaatunooŋ, abon uuŋnu labak ka calaŋ azoozuŋ ɔl igeet gɛrzɛ. 17Eeci baliin o Joowo alaŋ akati dayiin, karabɔŋ een kaal ci kawot. Bar akati bonat ci kabonan ŋume o Joowo ki ganɔn been talniin o aku Vɔŋize o Joowo. 18Mã aliŋliŋonek ɛɛti Kiristo gole nico, atalnɛ koca Jooi ŋaatin, ma buk koca aga ɔl nɔɔnɔ agɔɔn niini gi ci abon.

19Abon zin gɔɔn tup nɔkɔ kagɔɔn naaga kaal ci abon ci anyet ageet kabaayit kibeen ɔl yaak. Ma buk anyek keteenyit tuwɛn ona kɔdɔk. 20Má uulalu tuwɛn o arekɛ Jooi gonogu oogi zinzeeti ugeec ŋaati adaku dayiin ci abor niigi. Ŋɛdɛt didi dayiin dook abon labak ŋume o Joowo, bar zin gɛrzɛ ŋaati adaku gi ci anyek ɔl oogi kokoloztɛ gole o Joowo. 21Gi ci zin abon agoonu ce. Mã anyak gon ci abor idiŋ, karabɔŋ een nyaan, karabɔŋ een dayiin oogi, otoŋit buk niiga labak. Má agoonu gi ci anyek nɔɔnɔ kimiire ki vurut tuwɛnta. 22Mã anyak gi ci agayu abon kaale nicoko, anycek kizi gi cunooŋ ki Jook doon. Amayuk Jooi eet ci agɔɔn gi ci aga niini gi nici abon ŋume o Joowo. 23Mã abaaban ɛɛti dayiin oogi kizik ŋaatin gɛrzɛ ŋume o Joowo ŋaati adayi, ma bar bodo vurta adak dayiin nicoko, odoma koca niini oŋec Joowa, eeci alaŋ adake niini tuwɛnta. Mã kagɔɔn gi ci kagɔɔn zinize calaŋ kanyayi tuwɛn, kabaca oŋec Joowa giye nico.