Parnai Yang Arbang-pilŏ́ng: Tám Uraq Tamme Cang Cadô Ê-phê-sô 6

Acái Alứng A-i A-ám

1Inha ndon acái, cóq inha peh a-i a-ám inha, co Yang Arbang-pilŏ́ng ính inha táq iki. Callong ngki lư piaiq dyôn inha táq. 2Yang Arbang-pilŏ́ng patáp te inớh idô:

“Cóq inha dyám náp a-i a-ám inha.”

Callong patáp ndô la tôm lư ndon Yang Arbang-pilŏ́ng sŏ́ng dyôn callong bún. Án tông idô:

3“Cư dyôn inha táq pôq ien ŏ,

alứng át cống tumống dưnh tớq cúc cuteq ndô.”

4Inha ndon a-ám, inha êq tar-ac acái inha dyôn nha-án sáng nháih, ma cóq inha parléh ŏ nha-án, dyôn nha-án peh alứng veng ngê Ưlla.

Sol Alứng Ưlla

5Inha ndon ticuoi sol, cóq inha peh máh ticuoi ưlla inha tớq pang ndô. Cóq inha adáh alứng dyám náp nha-án nhéq te mít cannính. Alứng cóq inha peh nha-án muchứng inha peh Crit tưi. 6Inha êq táq arnáq ŏ chứng mát nha-án sớng, ính nha-án ayô inha. Ma cóq inha táq arớq sol Crit, táq nhéq tarngứh tarhơ máh arnáq Yang Arbang-pilŏ́ng ính inha táq. 7Cóq inha táq bui ŏ, co inha táq dyôn Yang Arbang-pilŏ́ng, tới dyôn ticuoi, 8co inha chom te máh arnáq ŏ inha táq, lư inha bôn cống te Yang Arbang-pilŏ́ng, veng arnáq inha táq, tam inha la ticuoi sol lớiq la tới ticuoi sol.

9Alứng inha ndon ưlla, cóq inha táq muchứng ngki tưi ada ticuoi sol inha. Inha êq cannốh nha-án. Co nha-án alứng inha chúng mui Ưlla tớq pilŏ́ng, án ndon tarsưq ticuoi muchứng nhéq.

Crơng Pla Te Yang Arbang-pilŏ́ng

10Callong talloiq ndô la idô: Cóq inha cơt rêng lư tớq mít cannính inha, nhơ chức rêng te Ưlla he choi. 11Cóq inha thuan dyôn akhám cứp nốh crơng pla te Yang Arbang-pilŏ́ng, dŏq inha têq chíl rap máh ngê yang Satán ính táq inha. 12Co he lớiq bôn tarchíl alứng ticuoi, ma he tarchíl alứng máh nốh sút, nốh chức, nốh lớiq ŏ alứng máh yang saq ndon cơt sút tớq pang ngiau ndô nha tớq pilŏ́ng hơ. 13Iki cóq inha ial cứp nốh crơng pla Yang Arbang-pilŏ́ng dyôn inha. Dyơ tớq ingái tarchíl, inha têq chíl rap, alứng cua inha chíl, inha têq tayứng a-khớm.

14Cóq inha ial ngê piaiq te Yang Arbang-pilŏ́ng, arớq líng kitớn pa-eu taq tớq tarving án. Cóq inha ial ngê tinớng ŏ, arớq líng sứp au taq dŏq cadứp apơm. 15Cóq inha ial ngê ính dông parnai ŏ, dŏq he têq át ien ŏ alứng Yang Arbang-pilŏ́ng, arớq líng dếq cơp taq. 16Cóq inha ial ngê tin, arớq líng dông khel. Iki inha têq pupát viang máh taráh uih yang saq ính táq inha. 17Cóq inha ial ngê Yang Arbang-pilŏ́ng choi tamống inha, arớq líng pưng muoc taq tớq plô. Cóq inha dông parnai Yang Arbang-pilŏ́ng, arớq líng dông dau. Parnai ngki la arớq pla dau te Arvai Yang Arbang-pilŏ́ng. 18Cóq inha cớu níc te máh parnai Arvai Yang Arbang-pilŏ́ng dyôn inha cớu. Inha êq aláh cớu, ma cóq inha kiaq simớt simơi. Alứng cóq inha cớu choi máh ticuoi ndon tin Yê-su. 19Seq inha cớu choi dyôn cư, tớq cư ính táq-ntêr dyôn cư chom parnai amớh ŏ dyôn cư tông dŏq cato clŏ́q lư parnai catốq te Yang Arbang-pilŏ́ng. 20Cư la ticuoi atớq parnai nga Yang Arbang-pilŏ́ng. Co cư dông parnai ngki ngai crál cư tớq coq tôt. Ma cư seq inha cớu choi cư, dyôn cư têq cato parnai ngki clŏ́q lư, arớq crái cư cato.

Parnai Carbánh Talloiq

21Máh nốh ndon tớq nga cư, Ti-chacơ têq táq-ntêr dyôn inha chom. Ti-chacơ la em ai ndon cư amoih lư, alứng án mmín lư táq arnáq Yang Arbang-pilŏ́ng. 22Cư dyôn án tớq nga inha dŏq án táq-ntêr dyôn inha máh nốh amớh tớq nga he, alứng dŏq án khêr mít cannính inha tưi.

23Cư seq Yang Arbang-pilŏ́ng A-ám he alứng Yê-su Crit Ưlla he, dyôn nhéq máh ticuoi tin bôn át bánh suanh ien ŏ, alứng bôn mít cannính amoih alứng tin. 24Cư seq Yang Arbang-pilŏ́ng choi mat nhéq máh ticuoi ndon amoih Yê-su Crit Ưlla he lớiq nai nhéq.

Notes