1Ɔwiɔ ne, mikpi i siwarã ame ala mi atsuele gu akpi ɔso. 2Ɔwi gɔmɔ ame ne, misiai kayiiso ɔri lalaa gu Tsirise gɔ nto ɔɖe siwarã lalaa ɔɖuɖu iso i ɔwiri ame fiɛ ɔto ɔɖe matsuelese ɔɖuɖu ana iso kiniɔ. 3Gbaã ne, bo ɔɖuɖu ɔse lɛ ma, fiɛ bosɛ ngbã lɛ kumɛgɔ i bo siturina sɛ siɖɔɛ fiɛ isɛ ipia bo adzuni ana isoɣɔ. Nsɛgbai mɛgbe igbã bosɛ ɔso fiɛ Ɣaa ɔnagu bo sikpã lɛ kumɛgɔ ɔto ɔnagu kayiiso maturi ɔɖuɖu sikpã ne. 4Ɣɛɛ Ɣaa nnyainyɔ nɛ ɔba ɔtã bo na katui fiɛ ɔ̃ kuɖɔɛ ana ɔmɔ gbaã. 5Atoa sɔ bo akpi ɔso ne boɔkpi ne, ɔtã bota bobɔrɛ i makpise ame ku Kristo. Ɣaa abualɛra kere ɔso boba ngbã. 6Gɔ bobara mawɛ̃ ku Kristo Yesu ɔso ne, Ɣaa ɔɔtara bo ɔbɔrɛgu i makpise ame sɔ boaɖegu wũ sigara i ɔ̃ sigarakaɖekɔ̃ i kato. 7Ɣaa ɔbara nnɛgbe si ɔsu ɔte ta mma maiɣe mabɔ kayi sɔ kuira na gɔ ikategu ɔ̃ abualɛra gu kayiribielea ga ɔba ɔtã bo ala Kristo Yesu ɔso. 8Abualɛra ɔso kere ɔfɔ mi iki i kafɔkaɖe ame ne iiɖe isɛɛ kuiwɛ̃ nɛ mibara ɔso, ɣɛɛ Ɣaa karatã kaɖe. 9Iiɖe kuwɛ̃ kubɛ ipia ame ibɔrɛ sɔ ɔ̃asu ɔɖe ndamu. 10Ɣaa ɔbara bo ala ɔ̃ arɔĩ, fiɛ iki i bo mawɛ̃ ibaragu Kristo Yesu ame ne, ɔ̃ɔbara bo ɔtã ara sɛɛ ibara nɛ ɔ̃ɔledza bo ɔsɛ ɔtã koko.

11Minyigi sɔ mi ma loiɖe ma Yudase ne, ɔwiɔ ne, ma Yudase ma matu sirɛrɛ̃ sɛ matia mi sɔ mma maitu sirɛrɛ̃, ɣɛɛ sirɛrɛ̃ itu nɛgbe ne, sosina ame kubarara kere kuɖe, fiɛ ɔturi kere lobara ala arɔĩ. 12Minyigi sɔ ɔwi gɔ lofe ne, mibua midzorogu Kristo. Mafɔ miɖe, fiɛ miiɖe Ɣaa maturi. Mina kayakpa kukawɛ̃ i kaɣɛkasɛ ga i Ɣaa ɔtã ɔ̃ maturi ame. Miwe i ngbã ame gɔ miiwe ɔriinyɔ, ɣee Ɣaa. 13Ɣɛɛ kiniɔ ne, iki i mawɛ̃ ibaragu Yesu Kristo ame ne, maɔboregu mi ma lodzoro mabɔ Ɣaa kɔrɛ iki i Kristo ima nɛ ɔfere i karɔ̃ ame.

14Alasɔ Kristo mɔmɔ ɔbɔ bo isobuɛ gɔ ɔbara ma Yudase gu mma loiɖe ma Yudase mawɛ̃. Iki i ɔ̃ mɔmɔ sosina isu itã ame ne, ɔɖi itsiri nɛ lowe i ma ndɛ̃ lɛ ibere. 15Ɔɖi ma Yudase mmara gu kubarara sɔ iki i ɔ̃ ngbã mɛ ɔsɛ i sosina ame ne, ɔsa ma aka wã anyɔɔ kanya. Ɔkpesera ma ɔturi ɣɛtɛ sɔ maabaragu wũ mawɛ̃ fiɛ isobuɛ aaba. 16Iki i kukpi gɔ i Kristo ɔkpi i kudziri iso ame ne, ɔwɔra itsiri nɛ lowe i ma ndɛ̃, fiɛ iki i kukpi gɔmɔ ame ne, ɔ̃ɔfere ma gu Ɣaa kanya ndu. 17Ne ɔso ɔba ɔ̃aɣere maturi ɔɖuɖu isobuɛ Itɔ̃me Bielea. Ɔɣere mma loiɖe ma Yudase fiɛ madzorogu Ɣaa gu ma Yudase ma lobore mabo wũ. 18Kristo iso iki fiɛ bo ɔɖuɖu, ma Yudase gu mma loiɖe ma Yudase aawo bo Ɔse kɔrɛ ɔba i Ɣaa Siwarã siwɛ̃ ame.

19Ne ɔso miisiɖe mafɔ ɣee marisɛdze, ɣɛɛ mi gu Ɣaa maturi ɔɔkpese Ɣaa ɔmagɛ̃ gu ɔ̃ iyo maturi. 20Mise lɛ ibere nɛ matsue masia i Katɔ̃memasɛdze gu Ɣaa kanyamaɖidze iso fiɛ Kristo Yesu mɔmɔ nɖe ita nɛ lonya iɖo. 21Ɔ̃ lomɔɛ̃ kubereku ɔɖuɖu ɔsa fiɛ ikpese iyo iwɛ̃, fiɛ ɔ̃ nsɛ ɔtsue iyo ikpese Ɣaa isɔrɛyo sekelea. 22Gɔ mibaragu Kristo mawɛ̃ ɔso ne, mato matsue mi gu matsɔra ɔɖuɖu makpesera iyo nɛ ame i Ɣaa aasɛ iki i ɔ̃ Siwarã ame.