Bbaluwa eghi Paulo aahandiikiiye
Bafi̱li̱pi̱
Kwanjula
Kibugha kya Fi̱li̱pi̱ kikaba kili mu di̱si̱tu̱li̱ki̱ti̱ ya Makedoni̱ya, eghi ekaba eli elughulu ya ki̱twi̱ke kya ehanga lya Bu̱gi̱li̱ki̱. Paulo akaba naatebi̱i̱jeyo (Bikoluwa 16) kandi naatandi̱ki̱yeyo ki̱bbu̱la kya bahi̱ki̱li̱ja. Bhaatu haanu̱ma ya myaka ekani̱yʼo ali mu nkomo, bahi̱ki̱li̱ja bʼomu ki̱bbu̱la kya bahi̱ki̱li̱ja baa Fi̱li̱pi̱ baatumila Paulo buyambi̱ bwa sente. Aabahandiikila bbaluwa eni kubasi̱i̱ma na kubooleka ngoku adheedheeu̱we kandi abaku̱ndi̱ye.
Mu bbaluwa eni Paulo niibuwo aaghambila Baki̱li̱si̱taayo ati toobahi̱ye lu̱ku̱. Aabagu̱mi̱yagha ati bagumile mu ku̱hi̱ki̱li̱ja kwabo nankabha bantu baba mbababona-boni̱ya. Aabahanuulila ati bataba na myepanko, bhaatu babe badhooti̱ ngoku Ki̱li̱si̱to aabaagha. Aabaasu̱ki̱ya ati bwomi̱i̱li̱ bwabo bwa kulungana na Ki̱li̱si̱to ni kisembo eki Luhanga aabahaaye. Aabaghila ati tababhonganuuwe ku̱si̱i̱ma bya beegheesi̱ya baa bisubha abakwete kubaghambila kukwamilila mi̱ghendi̱yo ya di̱i̱ni̱ ya Ki̱yu̱daaya.
1Abaahandiika bbaluwa eni, ni̱i̱si̱ye Paulo hamui na Ti̱mi̱seewa, baheeleli̱ya baa Ki̱li̱si̱to Yesu.
Twahandiikila enu̱we bantu baa Luhanga boona abeelungani̱i̱ye na Ki̱li̱si̱to Yesu abali mu tau̱ni̱ ya Fi̱li̱pi̱, hamui na baloleeleli̱ baanu na baheeleli̱ya baanu.
2Luhanga Eseetu̱we hamui na Mukama Yesu Ki̱li̱si̱to babaghilile ngughuma kandi babahe mpempa yonkaha.
Paulo naasi̱i̱ma kandi naabasabila bahi̱ki̱li̱ja baa Fi̱li̱pi̱
3Nku̱si̱i̱magha Luhanga wanje bwile bwona obu nkubaasukagha. 4Ti̱ nkaakubaagha nimbasabila enu̱we boona nkwehi̱ghu̱wagha ndheedheeu̱we 5haabwanu kulungana haa mulimo ghwa kulangilila Makulu Ghasemeeye ghaa Luhanga ku̱lu̱ghi̱i̱li̱la kilo mwatandikiiyemu ku̱hi̱ki̱li̱ja ku̱hi̱ki̱ya nʼendindi. 6Nkimani̱ye kwonini nti Luhanga oghu akatandika kubakolamu mulimo ghusemeeye ghwa kubajuna akughumaliilila ku̱hi̱ki̱ya haa kilo eki Yesu Ki̱li̱si̱to alikuukilamu.
7Ki̱hi̱ki̱ye si̱ye kwehi̱ghu̱wa ndheedheeu̱we ntiyo haabwanu enu̱we boona, nanga mukunjikalagha haa mutima. Enu̱we boona Luhanga akabaghilila ngughuma hamui nanje mwankoonela haa mulimo oghu ampaaye ghwa kulwanilila Makulu Ghasemeeye ngoku ghali majima, nankabha obu baabaagha bankwete ndi mu nkomo. 8Luhanga eenini amani̱ye ngoku nkuukalagha nimbeekumbula kandi mbaku̱ndi̱ye na kukunda kwa Ki̱li̱si̱to Yesu.
9Nkubasabilagha nti Luhanga abongele magheji na kwetegheeleli̱ya kwona kuukala munakundangaane, 10niikuwo mugubhe kumanya eki̱hi̱ki̱ye kukoluwa kandi muli bantu abatali na kabhi, mutali nʼeki bakubasoghosʼo ku̱hi̱ki̱ya haa kilo eki Ki̱li̱si̱to alikuukilamu. 11Ti̱ nkusaba nti muukalaghe nimukola bikoluwa bi̱hi̱ki̱ye ebikwisagha kukwama mu Yesu Ki̱li̱si̱to niikuwo bantu bahe Luhanga ki̱ti̱i̱ni̱sa kandi bamusinde.
Kubona-bona kwa Paulo nkugbaatikani̱ya Makulu Ghasemeeye
12Bahi̱ki̱li̱ja baanakyanje, nkubbala mumanye ngoku kukwatuwa kwanje mu nkomo kwaleki̱ye Makulu Ghasemeeye ghaa Luhanga ghaagbaatikana. 13Nanga ekyalu̱ghi̱yemu ni bu̱li̱ muntu weena hani, otaayemu na baasilikale abali̱ndi̱ye kikaali kumanya ngoku ndi mu nkomo haabwa Ki̱li̱si̱to. 14Ti̱ si̱ye kuba ndi mu nkomo kyaleki̱ye bahi̱ki̱li̱ja baanakyatu beekamba kulangilila kighambo kya Mukama bagu̱mi̱ye kandi batoobahi̱ye.
15Majima ghali ngu bantu banji bakutebejaghʼo Ki̱li̱si̱to bali nʼetima kandi na mpaka, bhaatu banji bakughalangililagha na mutima ghusemeeye. 16Aba niibo bakughalangililagha bali na kukunda, kandi bamani̱ye ngoku ndi mu nkomo hani haabwa kulwanilila Makulu Ghasemeeye ghaa Luhanga agha. 17Aba naadu̱bhi̱ye kughamba aba bakulangililagha Ki̱li̱si̱to haabwa bighendeleluwa byabo boonini, etali mu majima, mbabbala bati niikuwo bandeeteleje kweyongela kumbona-boni̱ya ninali hani mu nkomo. 18Bhaatu eki takili na nsonga bbaa! Ekikulu ni ngu mu mulingo ghwona, nankabha abakulangilila haabwa bighendeleluwa byabo boonini, kedha mu majima, boona bakunalangililagha dhee makulu haa Ki̱li̱si̱to. Ti̱ eki niikiyo kikundheedhagha.
Ee, nkuukala niinadheedheeu̱we kwonini, 19nanga nimani̱ye nti haabwa kunsabila kwanu kandi haabwa Mwoyo wa Yesu Ki̱li̱si̱to, kuukala nankoonela, byona ebyambaayʼo bikundughilamu kundekela. 20Ndindililiiye kwonini kandi ndi na kunihila ngoku ntangukola kintu kyona ekikumpemula. Ti̱ nankabha mba niikaaye kedha nku̱u̱ye, nkuukala bwile bwona ngu̱mi̱ye haabwa Ki̱li̱si̱to. Kandi nkuukala niinakola ebikuleka bantu mbamu̱hu̱ti̱ya. 21Kaakuba niikala ndi mwomi̱i̱li̱, ni haabwa Ki̱li̱si̱to, ti̱ ninaaku̱u̱ye eki nkyamughaso kusaali̱yo. 22Kaakuba niikala ninali mwomi̱i̱li̱ mu mubili ghuni kikumani̱i̱si̱ya ngu nkweyongela ku̱heeleli̱ya Ki̱li̱si̱to. Bhaatu kyaku̱tu̱wamu, tankimani̱ye bbaa! 23Kyaku̱tu̱wamu ki̱ndemi̱ye, mbbali̱ye kughenda kuba na Ki̱li̱si̱to, kandi eki niikiyo mboone kisaai̱ye kwonini, 24bhaatu haabwanu nkilungi niikale ninali mwomi̱i̱li̱. 25Nki̱gu̱mi̱i̱ye kwonini kandi nimani̱ye ngoku nkuukala ninali mwomi̱i̱li̱. Nkweyongela kuukala naanu enu̱we boona niikuwo mweyongele kukula kandi mudheedhuwe haabwa ku̱hi̱ki̱li̱ja kwanu. 26Ti̱ si̱ye haabwa kutodha kuukala naanu. Ndeke kudheedhuwa kwanu haabwa ku̱hi̱ki̱li̱ja Ki̱li̱si̱to Yesu kweyongele kukana haabwa eki ankoleeye.
27Ti̱ nankabha kintu kyona kimbʼo hani, enu̱we mwetwalikani̱ye mu mulingo oghu Makulu Ghasemeeye ghaa Ki̱li̱si̱to ghaghi̱li̱ye ghati mubhonganuuwe kutwalikani̱yamu. Niikuwo, nankabha niisa kubalola eghi kedha ni̱i̱ghu̱wa makulu ghaanu kwonkaha ntaliyeyo, nimanye ngoku munagu̱mi̱ye na mutima ghumui kandi mukwete kutalibana hamui niikuwo bantu banji bagubhe ku̱hi̱ki̱li̱ja Makulu Ghasemeeye ghaa Luhanga. 28Kandi mutoobahi̱ye mu mulingo ghwona abakuhakani̱yagha enu̱we eghi, nanga aka nkaakulolelʼo akooleki̱ye ebo ngoku balihwelekeelela, bhaatu ngoku enu̱we Luhanga alibakoonela abajune. 29Nanga haabwa Ki̱li̱si̱to, tamwaheebeeu̱we mu̱gi̱sa ghwa ku̱mu̱hi̱ki̱li̱ja ghwonkaha, bhaatu mukaheebuwa dhee na ghwa kubona-bona haabuwe, 30ngoku mukwete kubona-bona bijibu ngʼebi mwaboone bimbaayʼo, kandi ebi mu̱u̱ghu̱u̱ye binandiyo.