1Mipitsiha mb’am-pipalirañe mb’eo
ry ana’ i Beniamineo,
boak’ an-teñateña’ Ierosalaime ao;
popòho e Tekoa añe i antsivay,
vaho ampitroaro fanairañe
e Bete-hak’kereme eñe;
fa hirik’ avaratse ty hankàñe,
ty fandrotsahañe jabajaba.
2I soa vintañe naho malemey,
i anak’ampela’ i Tsioney ro haitoako.
3Hivotrak’ ama’e o mpiarakeo
rekets’ o lia-rai’eo,
hampitroatse fiarikatohañe
ami’ty kivoho’ iareo, le songa hiandrazañe an-toe’e.
4Ihentseño aly;
miongaha hanameantika aze
an-tsingilingiliñeñe.
Feh’ ohatse amantika, fa miroñe i àndroy,
mihalava o talinjon-karivao!
5Miavota hanamean-tika haleñe,
handrotsahantika o anjomba’eo!
6Hoe t’Iehovà’ i Màroy:
Firao o hatae’eo;
atroaro am’Ierosalaime
ty fanongàm-panameañe;
toe rova tsy mete tsy lilovañe,
fa forekeke avao ty ama’e ao.
7Manahake ty fitana’ o vovoñeo
ty hamamin-drano’e,
ty fitana’e ho veloñe o haloloa’eo;
janjiñeñe ama’e ao ty tazataza
naho ty tsiborohetoke;
añatrefako eo nainai’e
ty hasiloke naho ty fere.
8Mitaoa ry Ierosalaime,
kera ho alik’amako nahareo,
ie hampangoakoaheko
ho tane tsy amam-pimoneñe.
9Hoe t’Iehovà’ i Màroy:
Ho vata’e tsindrohe’iareo ty sisa’ Israele
hambañe amy t’ie vahe;
ozaño am-pita’o indraike i tsampa’ey
manahake ty mpanifo valoboke.
10Ia ty ho volañeko naho hatahataeko,
hahafijanjiña’ iareo?
Hehe, domoke o ravembia’ iareoo,
tsy mahatsendreñe;
Hete! fañinjeañe am’iereo
ty tsara’ Iehovà,
tsy mahafale’ iareo.
11Fe lifo’ ty fiforoforo’ Iehovà raho;
mahamokotse ahy ty mitañ’aze;
adoaño amo ajaja an-dalañeo,
naho amo ajalahy mifañosoñeo;
songa ho rambeseñe ie mirovaly,
o zoke’eo rekets’ o androanavio.
12Ho limbeze’ ty ila’e o anjomba’iareoo,
o tetekeo miharo amo rakemba’ iareoo;
fa hatora-kitsiko amo mpimoneñe
amy taneio ty tañako, hoe t’Iehovà.
13Songa mitavañe hitomboa’e ty tsitso’e am’iareo
pak’ami’ty loho bey;
fonga mpikatramo ty mpitoky sikal’ami’ty mpisoroñe.
14Nitaha’ iareo tsidaredare
ty fere’ ondatikoo, ami’ty hoe,
Fañanintsiñe, Fañanintsiñe,
ie tsy eo ty Fanintsiñañe.
15Toko’e ho nahasalatse iereo
ty hativàñe nanoe’iereo,
f’ie tsy mahay meñatse.
Aa le hikorovoke amo mikorovokeo
amy androm-pandilovañey iereo,
vaho hitsikapy, hoe t’Iehovà.
16Hoe t’Iehovà: Mijohaña an-dala
mifanivalañe eo le mahaisaha,
mañontanea o oloñoloñe haehaeo,
te aia i lalam-bantañey; vaho añavelò,
hahatendreha’ areo fitofan’ arofo.
Fa hoe iareo: Zahay tsy homb’eo.
17Mbore nampitroarako mpijilo,
nanao ty hoe : Haoño ty feo’ i antsivay!
Hoe ka iereo: Zahay tsy hañaoñe.
18Aa le mijanjiña ry fifeheañeo
vaho mahafohina ry valobohòkeo,
ty haseseke am’iareo:
19Tsanoño ry tane; Inao!
handesako hankàñe ondaty retoa,
ty toli’ o fikinià’ iareoo,
amy t’ie tsy nañaoñe o volakoo;
mbore nifarie’ iareo i Fanoroakoy.
20Hanoeko inoñe o rame boake Sebao,
naho o fare boake tsietoitaneo?
Tsy noko o enga’ oroa’ areoo,
tsy mahafale ahy o fisoroña’ areoo.
21Aa le hoe t’Iehovà:
Hehe te mampipoke vato mahatsikapy
aolo’ ondaty retoa raho,
hampitsikapy roae reketse keleiañe;
fonga ho mongotse
ty mpimoneñe miharo rañetse.
22Aa le hoe t’Iehovà:
Heheke, ondaty mangovovoke mb’etoy
boak’an-tane avaratseo,
fifeheañe jabajaba ty hahetseketseke
boake tsietoimoneñe añe.
23Vontitire’ iareo ty fale naho ty lefoñe,
masiake iereo, tsy miferenay,
manahake ty fitroña’ i riakey
ty fikoraha’ iareo;
naho miningitse soavala,
miriritse hoe lahin-defo miatrek’aly,
ama’o ry anak’ ampela’ i Tsione!
24Ie nitsanoña’ay talily,
dredra’e o taña’aio;
mamihiñe anay ty lovilovy,
ty haorean-drakemba mitsongo.
25Ko miakatse mb’an-tetek’ ao,
ko mañavelo an-damoke eo;
amy te mampiboele harevendreveñañe
mb’etia mb’atia ty fibara’ i rafelahiy.
26O ry anak’ ampela’ ondatiko,
misikìna gony,
vaho milalilalia an-davenoke;
miroveta hoe t’ie bako tokañe,
mandalà añ’aferon’ate,
amy te hivovò amantika i mpandrotsakey.
27Nanoeko mpañasohaso
naho mpitsòke am’ondatikoo rehe,
hahafohina’o naho hitsikaraha’o o sata’eo.
28Fonga mpiola manjehatse iereo,
mb’eo mb’eo mamokafoka avao;
torisìke naho viñe, songa tsivokatse.
29Mitioke mafe o famoforañeo,
forototoe’ ty afo i firakey,
tsy lefe ty fitoloñam-pitranahañe,
amy te tsy mete ho faoheñe ama’e
o halò-tserehañeo.
30Atao ty hoe taim-bolafoty iereo,
amy te naforintse’ Iehovà.