1Ty amy Moabe,
hoe t’Iehovà’ i Màroy,
t’i Andrianañahare’ Israele:
hankàñe t’i Nebo! fa peake,
nisalareñe t’i Kiriataime fa tsinepake;
nimeñareñe ty Misgabe
vaho mioremeñe.
2Tsy eo ka ty enge’ i Moabe;
nikinia raty aze o e Kesboneo:
Antao hampipitsok’aze tsy ho fifeheañe,
hampitsiñeñe ka rehe, Medmene,
hañoridañ’azo i fibaray.
3Inao ty koike boak’e Koronaime
fikopahañe naho fandrotsaham-bey.
4Rotsake t’i Moabe,
nipoñafe’ o keleia’eo ty koiake.
5Hitolom-pirovetse iereo te hanganike
ty fitroara’ i Lokote
ami’ty fizotsoa’ i Koronaime
ty nahajanjiña’ iareo
ty fikaiham-pandrotsahañe.
6Mitribaha, handrombaha’ areo fiaiñe,
mihambaña ami’ty kile
an-dratraratra añe.
7Ho tsepaheñe ka nahareo ami’ty
fiatoa’ areo amo tolon-draha’ areoo,
naho amo vara’ areoo;
hasese am-pandrohizañe añe ty Kemise,
o mpisoro’eo rekets’ o roandria’eo.
8Songa hiambotraha’ i mpitavañey
o rovao, ndra rova raike tsy hahavoratsake;
ho momoke i vavataney,
hampiantoeñe i montoñey,
ami’ty saontsi’ Iehovà.
9Toloro elatse t’i Moabe, hiborifita’e,
fa hampangoakoaheñe o rova’eo,
ie tsy ho amam-pimoneñe.
10Hozoñeñe t’indaty mitoloñe
ho a’ Iehovà am-pitañe milesa,
hafàtse ty mitañe i fibara’ey
tsy ho aman-dio.
11Fa nierañerañe sikal’ am-pahajalahy
aze t’i Moabe,
naho fa nitadrètse amo karafo’eo,
tsy nañiliñañe an-jonjoñ’an-jonjoñe,
vaho le lia’e tsy nasese
am-pandrohizañe añe;
aa le mbe ama’e ty hafira’e,
vaho tsy niova ty harifondrifo’e.
12Aa le, ingo ho tondroke ty andro, hoe t’Iehovà, te hampañitrifeko ama’e ty mpañiliñe, ze hañiliñe aze; ho fonga kapaihe’ iareo o fitovi’eo, vaho ho foie’ iereo o zonjò’eo. 13Ho salatse amy Kemose t’i Moabe, manahake ty nisalara’ Israele amy Betele fatokisa’ iareoy.
14Akore te anoe’ areo ty hoe:
Ondaty maozatse zahay,
fanalolahy añ’aly’?
15Mianto t’i Moabe, fa nionjoñe
mb’amo rova’eo, fa nizotso
mb’am-pizamanam-b’eo o ajalahy jinobo’eo,
hoe t’i Mpanjaka,
Iehovà’ i Màroy ty tahina’e.
16Fa antitotse ty hekoheko’ i Moabe,
malisa i feh-oha’ey.
17Mandalà aze ry mañohok’ azeo,
ano ty hoe ama’e ry mahafohiñe
i tahina’ey:
Akore te pinozake i kobaiñe
maozatsey, i doda fanjakay.
18O ry anak’ampela mimoneñe
e Dibone ao,
mizotsoa amo enge’oo,
mitoboha an-kataliñiera’o eo,
fa nionjomb’ama’o mb’eo
ty mampikoromake i Moabe,
fa songa narotsa’e o rova’o fatratseo.
19O ry mpimone’ i Arore,
mijohaña amy lalañey, vaho mijilova;
añontaneo i mioratsey, ty hoe:
Inom-bao o nifetsakeo?
20Nisalareñe t’i Moabe, le mioremeñe;
mangololoiha vaho mikoiha;
tseizo e Arnone ao te mianto t’i Moabe.
21Fa niambotraha’ ty zaka o tane amontoñeo, t’i Kolone, Iatsà, vaho i Mefaate, 22Le i Dibone, i Nebo, naho i Bet’diblataime. 23Le i Kiriataime naho i Bet’gamole vaho i Bet’meone. 24Le i Keriote naho i Botsrà vaho o hene rova an-tane’ i Moabeo, o lavitseo naho o marìneo. 25Fa nipitsok’ añe ty tsifa’ i Moabe, pinozake i sira’ey, hoe t’Iehovà.
26Ampimamò, amy te nampiebore’e am’ Iehovà ty vata’e; fa hitorokosek’ amy loa’ey t’i Moabe, vaho ho rabioñeñe. 27Aa tsy nandrabioña’o hao t’Israele? Nizoeñe amo malasoo hao? amy te mikofi-doha ama’e rehe ndra ‘mbiambia isaontsia’o.
28O ry mpimoneñe e Moabe ao,
Miavota amo rovao naho mimoneña an-tseran-kereretsake ao, vaho mihambaña ami’ty deho manao traño añ’ilam-bava’ i koboñey.
29Fa jinanji’ay ty firengevoha’
i Moabey;
toe mpitoabotse, amy fibohaboha’ey,
naho ty fiengeña’e
vaho ty fitrotroabohan’arofo’e.
30Haiko o habose’eo,
hoe t’Iehovà, t’ie kafoake,
tsy naha-pi-draha o fikoiboha’eo.
31Aa le hangoihoiako ty Moabe;
eka hikoiako ty halifora’ i Moabe;
hihontofa’ ty troko o nte-Kir’kereseo.
32Mandikoatse ty firoveta’ Iazere
ty hitañiako azo, ry vahe’ i Sibmà;
nikazazake nahafitsake i riakey
o tsampa’oo,
nitakare’ iareo ty ria’ Iazere;
amo voa’ o asarao,
naho amo vahe’oo ty niambotraha’
i mpandrotsakey.
33Tinavañe amy tonda kobokaray
ty hafaleañe naho ty firebehañe,
vaho an-tane’ Moabe;
fa najiheko tsy hiboak’ amo
fipiritañeo ty divay;
tsy eo ty handialia aze an-koike,
tsy ho fifandian-taroba i korakey.
34Boak’ ami’ty fikoiha’ i Kesbone pak’e Eleale, sikal’am’ Iazere ty nikaiha’ ty fiarañanaña’ iareo; boak’e Tsoare pak’e Koronaime, hoe tamanañe telo taoñe; fa ho kòake ka ty Rano’ i Nimrime. 35Mbore hajiheko amy Moabe, hoe t’Iehovà, ty mañenga amo haboañeo, naho i mañemboke aman-drahare’ey. 36Aa le mangolalaike ho a i Moabe manahake o solio ty foko vaho mandala hoe firirio ho a ondati’ i Kir’kereseo ty troko; fa mongotse ty vara natonto’e.
37Fonga peake o añamboneo, songa hinaratse o tateahetseo; sindre linily o fitañeo vaho gony ty sikin-tohake. 38Tsitsik’ ambone’ tafo’ i Moabe naho mandrambañ’ an-tameañe ey, le firovetañe avao ty ao; fa finoiko hoe karabiba tsy rei-tave t’i Moabe, hoe t’Iehovà. 39Akore ty fivolentsa’e, mangololoiha! Akore te niamboho t’i Mobe! salatse re! Aa le ho fiankahafañe naho fiantoañe avao t’i Moabe amo mañohok’ azeo. 40Fa hoe ty nafè’ Iehovà:
Ingo te eo ty hitiliñe hoe vantio,
havela’e amy Moabe o ela’eo.
41Fa tinavañe o rovao,
tsinepake o fipalirañe maozatseo,
le hanahake ty tron’ ampela mitsongo
ty arofo’ o fanalolahi’ i Moabeo
amy andro zay.
42Le haitoañe tsy ho karaza’ ondaty
t’i Moabe, amy t’ie nirengevok’ amy Iehovà.
43Firevendreveñañe naho i koboñey,
vaho i fandrikey ty ho ama’o,
ry mpimoneñe e Moabe ao,
hoe t’Iehovà.
44Hikapotrak’ an-koboñe ao ty mibotatsak’ amy mampihebakebakey,
naho ho tsepahe’ ty fandrike ty mahafiakatse amy koboñey;
fa hafetsako ama’e, eka, amy Moabe,
ty taom-pitilihañe iareo, hoe t’Iehovà.
45Mijagarodoñe tsy an-kaozarañe an-kàlo’ i Kesbone ao o nipoliotseo,
fa nionjoñe boake Kesbone ty afo,
naho boak’ añivo’ i Sihone ao ty lel’afo,
ze namorototo ty lahara’ i Moabe,
vaho ty hevo’ o mpikoràkeo.
46Hankàñe ama’o ry Moabe!
Fa mibalake ondati’ i Kemoseo,
amy te nasese mb’an-drohy mb’eo
o ana-dahi’eo
naho mb’am-bahoram-b’eo
o anak’ampela’eo.
47Fe hafoteko amo andro honka’eo ty fandrohiza’ i Moabe,
hoe t’Iehovà.
Zay ty figadoñam-pizakañe i Moabe.