Ho a i Talè: ty amy talifokey; Sabo’ o ana’ i Korao, Fanoroa, Sabom-Pikokoañe 1Andipore’ ty troko i talily soay:
Hoe raho: I mpanjakay ro fitoloñako;
fisokim-panokitse mahimbañe ty lelako.
2Tsomerentsereñe ta o ana’ondatio n’Iheo; idoañam-pañisohañe
o fivimbi’oo,
aa le nitahien’Añahare kitro añ’afe’e.
3Adiaño an-toha’o ty fibara’o,
ry Fanalolahy,
ty enge’o naho volonahe’o.
4Mionjona am-pandreketañe
am-bolonahe’o, hañonjonañe ty hatò
naho ty halèn-arofo,
vaho ty havantañañe;
le hañoke azo an-draha mampañeveñe
ty fità’o havana.
5Masioñe ty ana-pale’o añ’arofon-drafelahi’ i mpanjakay ao—mihotrakotrak’ ambane’o
ondatio;
6Nainai’e donia, ry Andrianañahare,
ty fiambesa’o;
kobain-kavantañañe
ty kobaim-pifehea’o.
7Fitea’o ty havañonañe,
falai’o ty hatsivokarañe;
aa le nañory azo t’i Andrianañahare, Andrianañahare’o,
an-tsolim-pirebehañe
ambone’ o rañe’oo.
8Ze hene saro’o ro tsotse naho emboke vaho mañidè!
marovany boak’ amo anjomba nitemereñe nifem-bibio ro ifalea’o.
9Anak’ampelam-panjaka
ro amo noro’oo;
mijohañe am-pitàn-kavana’o eo
ty tañanjomba’o am-bolamena
ki’ i Ofire.
10Mitsendreña ry anak’ampela,
Inao! atokilaño ty sofi’o,
andikofo o rofoko’oo,
naho ty anjomban-drae’o.
11Mahasinda i mpanjakay
ty hamontramontra’o;
iambaneo kanao talè’o.
12Hibanabana ama’e
ty anak’ ampela’ i Tsore,
Hipay fañisoahañ’ ama’e o mpañaleale am’ondatio.
13Fanjàka añ’anjomba ao
ty anak’ampela’ i mpanjakay,
vinahotse am-bolamena o saro’eo.
14Ho roroteñe mb’amy mpanjakay mb’eo
an-tsaroñe soa vinahotse,
hasese ama’o rekets’ o somondrara
mpiama’e mpañotroñe azeo.
15Amañ’ehake naho an-drebeke
ro aneseañe iareo; ie ampiziliheñe añ’anjomba’ i mpanjakay.
16Handimbe’an-droae’o o ana-dahi’oo;
horiza’o ho mpiaolo’ i tane iabiy iereo.
17Hampitiahieko ze hene tariratse
ty tahina’o,
hañandriañe azo nainai’e donia ondatio.