Baguma Pau Yudafɔ Ndɛ Ye Bati Aye.
ⅠLɛtsa a kĩ malɛ a nyɛ ɔnɔkɔali, Kristo ode manɛ ade maáma fɔvã a. Yĩ ɔwɔlɛ kĩ Hũhũ Kpalɛwa anya ye akũ a akpa yĩ katɛkado kĩ nnɛ́ fɔvã mama. ⅡMabe ayɔlɔhɔ, ade ntɛ kalɔɛ kĩ kaádɔ nɛ yĩ ɔwɔlɛ kamɛ, Ⅲkakpa yĩ bati a kĩ bɔmɔ be bɔnyɛ sukɛna mɔ babɔanɛ mɔa. Nɛ be sũ maawɛ kĩ Baguma edumu yĩ faa, ɛsɛ̃ bɔmɔ Kristo kayite malo kufɛ. ⅣKitonɛkĩ ade be nyɛ Israel ɔmaĩ a kĩ Baguma pau, ɛkɔa ɛkɛna ye bade, ɛnyɛ ye kukũkpalɛ a ɛtsa be a. Esui onukpɛ̃ mɔ be, ɛkpa be ye mbla a lɛmɛ. Be nɛɛ Baguma ɔsum osi wĩ a, ade be lɛmɛ ɛkɛna bɔhɛ ɛkpa a. ⅤBe kasinu to Hebrifɔ bawanyɔ a kĩ bɛtɛ buĩ a kamɛ, ade be kade kamɛ Kristo lɛmɛ nɛ eto ndɛ otidziwa aye ɛya a. Mifɔ̃ bumu Baguma a kĩ yanya fɔtsa flee akũ daa daa a! Fɔya lɔmɔ.
ⅥNlámɔ kalɛ kĩ Baguma kalɛkayi a táya nɛ foe kamɛ, kitonɛkĩ nnɛ́ bati a kĩ bito Israel a flee nyɛ Israelfɔ kpanunu. ⅦAde ayea nnɛ́ Abraham kasinu babi a flee nyɛ Baguma babi. Baguma bi Abraham kĩ, “Isak akũ fɔ́atsã mɔ aana babi mɔ bawa a kĩ nlɛ ĩyi a.” ⅧFoe kayɔ nyɛ kĩ nnɛ́ babi a kĩ Abraham ma ndɛ bati ayea nyɛ Baguma babi, mbom bikĩ ɛma nɛ ye bɔhɛ kamɛ a. ⅨKitonɛkĩ Baguma bɔhɛ a nyɛ, “Kateliva, lɔkɔ kĩĩ kamɛ a, maamuniki ĩya ade Sara aama obinyole a.” ⅩNnɛ́ fukĩĩ odi a. Babinyole nviã a kĩ Rebeka ma a ɔlɛga nyɛ boe ɔwanyɔ Isak. Ⅺ-ⅫLɛmɛ nɛ ayekĩ babinyole nviã kamɛ ɔmɔa kapau fɔya nɛ foe kamɛ nɛ Baguma nhihiɛ onukpɛ̃ sũ ni, Baguma bi Rebeka kĩ, “Obinɔkɔɛ̃ a aasum obisɛ̃de a.” Ebi ye eyi kɔkɔɛ fɔmɔ ɛyama babi a. Foesũ Baguma kapau a kĩ ɛkɛna a lɛdzɛ́ nɛ tuwĩ ĩye tɔkpa a kĩ nta babi a kamɛ odi kɛna a akũ, mbom Baguma kawɛ fɔanɛ. ⅩⅢBɛlɛ nɛ Katsɛlɛ Kpalɛwa a kamɛ kĩ, “Nwɛ Yakob kalɛ, lɛmɛ nkesĩ Esau.”
ⅩⅣLɔkɔa bɔ́alɛ kĩ Baguma lɛmɛ ládã kpĩĩ? Oowo! Fɔlá lɔmɔ kɔlaa. ⅩⅤKitonɛkĩ ebi Mose kĩ,
“Odi nyɛ odi kĩ mawɛ kĩ makɛna sɛmɛ kalɛ nkpa ni,
ade ye maakɛna sɛmɛ kalɛ nkpa a.
Ade odi nyɛ odi kĩ ye akũ kɔ yĩ kɔnya ni,
maamɔ ye kɔnya.”
ⅩⅥFoesũ Baguma oti kapau lɛdzɛ́ nɛ ye mbɔdibɔ ĩye lɛtsa a kĩ yawɛ a akũ, mbom lɛtsa nyɛ lɛtsa dzɛ̃ nɛ Baguma kɔnyakamɔ odi akũ. ⅩⅦKitonɛkĩ nɛ Katsɛlɛ Kpalɛwa kamɛ a, Baguma bi Egipte lɛgã kĩ, “Ndzina nɔ lɛgã ayekĩ maatsã nɔ akũ ĩnyɛ yĩ kɔbɛ̃ ntsa, lɔkɔa yĩ dĩ lɛgba nɛ katinya kamɛ flee.” ⅩⅧFoesũ odi nyɛ odi kĩ Baguma awɛ kĩ yamɔ kɔnya a, ade ye yamɔ kɔnya a, ade odi nyɛ odi kĩ yawɛ kĩ ɛna atɔ ɔsĩ a, yafɔ̃ yana atɔ ɔsĩ.
Baguma Kalɔkpa Mɔ Kɔnyakamɔ a.
ⅩⅨMi kamɛ odi aavia yĩ kĩ, “Ntɛ fɔla lɔmɔ a, nde sũ Baguma buki yanyɛ nfumusu kakpa odi? Owei aapuli eyidza ɛdza nɛ Baguma kawɛ akũ?” ⅩⅩNɔ otidziwa, owei anɛ kĩ akpa Baguma mbuayɛ lɔmɔ? Lubui lávia de ɔmɛnɛ kĩ, “Nde sũ ɔmɛ yĩ lɔmɔ?” ⅩⅪFubui ɔmɛnɛ deĩ osi kĩ yakɔa tibute a kĩ enuna ɛbɔa lɔbɔ a ɛmɛ lɛtsa a kĩ yawɛ. Mbɔɛɛ ɛlá osi kĩ yakɔa tite lɔbɔ mɔapɛ a ɛmɛ fubui nviã? Yaamɛ lɔmɔa kĩ lalɛ kadã eyi ɛkpa fuwi titiliwu, lɔkɔa ɛkɔa te nkaɛ a ɛmɛ lɛbɛbã kĩ laálɛ kadã eyi ɛkpa luwi daa akũ adzuma kakɛna. ⅩⅫAde lɛtsa a kĩ Baguma kɛna a kayɔ nɛ awĩ a. Ntɛ Baguma wɛ kĩ yanyɛ ye kalɔkpa kanya, ɛfɔ̃ bɛmɔ ye otumi, lɛmɛ ebuki ɛna ɔwɔlɛ bɔɛɛ epini bikĩ be akũ ɛna kalɔkpa, kĩ bidum be bɛkpa kawɔla a ni, litsa odeĩ kĩ aalɛ? ⅩⅩⅢAde ntɛ Baguma wɛ lɛmɛ kĩ yanyɛ ye kukũkpalɛ baũ a kĩ biko nɛ boe a kĩ ɛmɔ kɔnya akũ a, boe a kĩ ɛmanɛ eyi ɛkpa ye kukũkpalɛ a, ⅩⅩⅣkitonɛkĩ boe nyɛ bati a kĩ ɛpau etomɛna Yudafɔ mɔ bikĩ bɛnyɛ́ Yudafɔ a kamɛ a ni, odeĩ kadi kalɛ? ⅩⅩⅤAde fukĩĩ Baguma lɛ nɛ Onukpɛ̃ Ɔnyɛnɛ Hosea ovoli kamɛ kĩ,
“Bati kĩ bɛnyɛ́ yĩ ɔmaĩ bati a, maavɛ be kĩ, ‘Yĩ bati.’
Kade a kĩ ntáwɛ ke kalɛ a, maavɛ ke ‘Yĩ ɔdɔ bati.’
ⅩⅩⅥNɛ kakɔ mɔapɛ a kĩ bibi be kĩ,
‘Minyɛ́ yĩ bati’ a
Ade awã baavɛ be kĩ ‘Baguma Kĩ Edzi Nkpã Daa a babi.’ ”
ⅩⅩⅦBaguma Onukpɛ̃ Ɔnyɛnɛ Yesaya bɔa fɔwɔla ɛlɛ nɛ Israelfɔ akũ kĩ,
“Ntɛ Israelfɔ nɛ lidede ndɛ mpo abuĩ dã malo ni,
be kamɛ bati sukuloo badi aana katɛ,
ⅩⅩⅧkitonɛkĩ boe Ɔlate aadzɛmɔ katinya kamɛ bati pɛpɛɛpɛ mɔatsɛ, etsua lɛtsa nyɛ lɛtsa lukũ.”
ⅩⅩⅨYesaya buki ɛlɛ eyi kĩ,
“Ntɛ boe Ɔlate Otumifɔ Flee a ɛtatina boe babi mɔ bawa a badi ni,
kufɛ bɔdani bɔkɛna ndɛ Sodom, buketimɔ Gomora!”
Kalɛ Wĩ a Nyɛ Israelfɔ Lɛmɛ Kade.
ⅩⅩⅩFoesũ litsa koũ bɔ́alɛ? Matsa kĩ bikĩ bɛnyɛ́ Israelfɔ a kĩ bɛtápili kĩ badzi kpĩĩ nɛ Baguma anɛ a, bɛkɛna be bati kĩ bɛkpɔla bɛtsãmɛna be katɛkado akũ. ⅩⅩⅪAde Israelfɔ a kĩ bɛkawɛ mbla a kĩ yaakɛna be bati kpĩĩ a, tápuli bɛkɛna nɛ mbla a akũ a. ⅩⅩⅫLitsa sũ bɛtápuli? Kitonɛkĩ bɛtákɔa katɛkado bɛwɛ foe, mbom bɛkɔa anɛ bite nɛ be mɔawɛ mbɔdibɔ akũ. Nɛ foesũ bitula nɛ Kristo kĩ ɛla ndɛ de a kĩ bati atula nɛ de akũ a akũ, ⅩⅩⅩⅢndɛ ayekĩ bɛtsɛlɛ nɛ Katsɛlɛ Kpalɛwa a kamɛ kĩ,
“Midã! Nkɔa de lidi mayi nɛ Zion,
de kĩ bati aatula nɛ de akũ bɛnɛ bɛtɔ.
Lɛmɛ odi nyɛ odi kĩ ɛtɛ ye edo ni,
kɔnyɔã lɛláawo ye.”