Muⱪeddes Kalam (yǝngi yeziⱪ)

34-küy •••• Hudaning meⱨribanliⱪiƣa mǝdⱨiyǝ •••• «elipbǝ tǝrtipilik» küy •••• 1-ayǝttiki izaⱨatni kɵrüng.
1Dawut yazƣan küy: —
(Dawut Abimǝlǝk padixaⱨning aldida yürüx-turuxini baxⱪiqǝ ⱪiliwalƣanda, Abimǝlǝk uni ⱨǝydiwǝtkǝn waⱪitta yazƣan)
|א| Mǝn ⱨǝrⱪandaⱪ waⱪitlarda Pǝrwǝrdigarƣa tǝxǝkkür-mǝdⱨiyǝ ⱪayturimǝn;
Uni mǝdⱨiyilǝx aƣzimdin qüxmǝydu.  
2|ב| Ⱪǝlbim Pǝrwǝrdigarni iptiharlinip mǝdⱨiyǝlǝydu,
Mɵminlǝr buni anglap xadliⱪta bolidu.
3|ג| Mǝn bilǝn billǝ Pǝrwǝrdigarni uluƣlanglar,
Birliktǝ Uning namiƣa mǝdⱨiyilǝr yangritayli.
4|ד| Pǝrwǝrdigarni izdidim,
U mening duayimni ijabǝt ⱪildi,
Meni basⱪan barliⱪ wǝⱨimǝ-ⱪorⱪunqlirimdin ⱪutⱪuzdi.
5|ה| Mɵminlǝr Uningƣa tǝlmürüp nurlandi;
|ו|Yüzliri yǝrgǝ ⱪaritilmidi.
6|ז| Mǝn peⱪir-biqarǝ Uningƣa nida ⱪildi,
Pǝrwǝrdigar anglap, meni ⱨǝmmǝ awariqiliklǝrdin ⱪutⱪuzdi.
7|ח| Pǝrwǝrdigarning Pǝrixtisi Uningdin ǝyminidiƣanlarni ⱪoƣdap ǝtrapiƣa qedirini tikidu,
Ularni ⱪutⱪuzidu.
8|ט| Pǝrwǝrdigarning meⱨribanliⱪini tetip, bilgin,
Uningƣa ixinip tayanƣan adǝm nemidegǝn bǝhtliktur!
9|י| I Uning muⱪǝddǝs bǝndiliri, Pǝrwǝrdigardin ǝymininglar!
Qünki Uningdin ǝyminidiƣanlarning ⱨeq nǝrsisi kǝm bolmas.
10|כ| Küqlük arslanlar ozuⱪsiz ⱪelip aq ⱪalsimu,
Əmma Pǝrwǝrdigarni izdigüqilǝrning ⱨeqbir yahxi nǝrsisi kǝm bolmas.
11|ל| Kelinglar balilirim, manga ⱪulaⱪ selinglar;
Mǝn silǝrgǝ Pǝrwǝrdigardin ǝyminixni ɵgitip ⱪoyay.
12|מ| Ⱨayatni ǝtiwarlaydiƣan kixi kim?
Kimning uzun wǝ yahxi künlǝrni kɵrgüsi bar?
13|נ| Undaⱪta tilingni yamanliⱪtin tartip yür,
Lǝwliring mǝkkarliⱪtin neri bolsun;
14|ס| Yamanliⱪtin ayrilip yiraⱪ bolup, güzǝl ǝmǝllǝrni ⱪilip yür;
Aman-hatirjǝmlikni izdǝp, uni ⱪoƣlap yür.
15|ע| Pǝrwǝrdigarning kɵzi ⱨǝⱪⱪaniylarning üstidǝ turidu,
Uning ⱪuliⱪi ularning iltijaliriƣa oquⱪ turidu;
16|פ| Pǝrwǝrdigarning qirayi rǝzillik ⱪilƣuqilarƣa ⱪarxi qiⱪar,
Ularning ⱨǝrⱪandaⱪ nam-hatirilirini yǝr yüzidin elip taxlar;
17|צ| Ⱨǝⱪⱪaniylar iltija ⱪilidu,
Pǝrwǝrdigar anglaydu, ularni barliⱪ azab-muxǝⱪⱪǝtliridin ⱪutⱪuzidu;
18|ק| Pǝrwǝrdigar kɵngli sunuⱪlarƣa yeⱪindur,
Roⱨi ezilgǝnlǝrni ⱪutⱪuzidu.  
19|ר| Ⱨǝⱪⱪaniylar duq kǝlgǝn awariqiliklǝr kɵptur;
Biraⱪ Pǝrwǝrdigar ularni bularning ⱨǝmmisidin ⱪutⱪuzidu.
20|ש| U ⱨǝⱪⱪaniyning sɵngǝklirini saⱪ ⱪalduridu,
Ulardin birsimu sunup kǝtmǝydu.
21|ח| Yamanliⱪning ɵzi rǝzillǝrni ɵltüridu;
Ⱨǝⱪⱪaniylarƣa nǝprǝtlinidiƣanlar gunaⱨta ⱪalidu.
22|פ| Pǝrwǝrdigar Ɵz ⱪullirining janlirini bǝdǝl tɵlǝp ⱨɵrlükkǝ qiⱪiridu;
Uningƣa tayanƣanlardin ⱨeqkimgǝ gunaⱨ bekitilmǝydu.

□34:1 « א alǝf, ibraniy tilidiki birinqi ⱨǝrp» — bu küy «elipbǝ tǝrtipilik» küy. Ⱨǝrbir ayǝt aldida ibraniy ⱨǝrplǝr kɵrsitilidu (10-küygǝ berilgǝn, «elipbǝ tǝrtipilik küy» toƣruluⱪ izaⱨatnimu kɵrüng). «Mǝn ⱨǝrⱪandaⱪ waⱪitlarda Pǝrwǝrdigarƣa tǝxǝkkür-mǝdⱨiyǝ ⱪayturimǝn» — «tǝxǝkkür-mǝdⱨiyǝ ⱪayturux» degǝn sɵz ibraniy tilida «(Hudaƣa) rǝⱨmǝt eytix», «uni uluƣlax» degǝn mǝnidǝ kelidu, uning yǝnǝ «Hudani hursǝn ⱪilix» degǝn mǝnisimu bar. «Tǝxǝkkür-mǝdⱨiyǝ ⱪayturux» degǝnning ibraniy tilidiki xǝkli ǝrǝb tilidiki «mubarǝklǝx» degǝn sɵzgǝ ohxap ketidu; demǝk, Hudaƣa ««barǝk» (bǝrikǝt) yǝtküzüx».

■34:1 1Sam. 21:13

□34:7 ««Pǝrwǝrdigarning Pǝrixtisi» yaki «Pǝrwǝrdigarning Əlqisi»» — Tǝwrat dǝwridǝ intayin alaⱨidǝ bir xǝhs idi. «Tǝbirlǝr»ni kɵrüng. «Pǝrwǝrdigarning Pǝrixtisi» bǝzi ixlarda Hudaning ornida kɵrünǝtti (mǝsilǝn, «Yar.» 16:7-14, 18-babni, «Tǝbirlǝr»nimu kɵrüng).

■34:10 Ayup 4:11

■34:12 1Pet. 3:10

□34:14 «Aman-hatirjǝmlikni izdǝp...» — yaki «ⱨǝmmǝylǝn bilǝn inaⱪ ɵtüxkǝ tirixip,...».

■34:15 Ayup 36:7; Zǝb. 33:18; 1Pet. 3:12

□34:18 «Pǝrwǝrdigar kɵngli sunuⱪlarƣa yeⱪindur, roⱨi ezilgǝnlǝrni ⱪutⱪuzidu» — bu ayǝttiki «kɵngli sunuⱪlar» ⱨǝmdǝ «roⱨi ezilgǝnlǝr», xübⱨisizki, towa ⱪilƣanlarni kɵrsitidu.

■34:18 2Tim. 3:11

■34:19 2Tim. 3:12

■34:20 Yⱨ. 19:36

□34:22 «Pǝrwǝrdigar Ɵz ⱪullirining janlirini bǝdǝl tɵlǝp ⱨɵrlükkǝ qiⱪiridu» — bu yǝrdǝ ixlǝtkǝn peil («bǝdǝl tɵlǝp ⱨɵrlükkǝ qiⱪiridu») adǝttǝ ⱪullarni (mǝlum baⱨada) ⱪulluⱪtin azad ⱪilix, ⱨɵr ⱪilixni bildüridu.