Au Thesalonika
1 Paul ma Sailas Amphipolis taon ma Apolonia taon i voterei da i nae au Thesalonika taon. Weka mai Jew ai boru numana i mamae. 2Ma i rui au boru numana au Sabate me mara patapatai i kaukauei nanare, kampa Sabate tonuḡa rava awari God riwana i viararamani. 3Ma God riwanei i viararamana da Keriso ina vinuapoapoe ma iraḡelei ina vomairi me, “Wei ravana a bababaniei awarimi, tauna Iesu Keriso.” 4Mai Jew ḡelaui orai i taini ma taui i votaḡotaḡoi. Ma nanare Jentail nelara maḡamaḡagaui God taurauduneleina ma waivine wavai naenaei maḡamaḡaui.
5Wate mai Jew i unura ma rava ora-potapotai maḡamaḡaui au etanai i tami ma au taon vikaruwaḡawaḡa i vikarei. Ma oroto wavana Jason ana numa i ruini Paul ma Sailas i baibaiei da ita opunei patara awari. 6Wate maranai eḡa ita nelaḡai taui Jason ma kerisiana ḡelaui i taina-naiei taon babadai awari, ma i garara, “Wei ravai dobu au anatapuna apoapoe maḡamaḡaui i kauei, marina i ḡetai ata au dobu.” 7Ma Jason, Paul ma Sailas i taravaini ana au numa. Taui Caesar ana tarawatu e viviaigai ma e ririwa da gulau ḡelauna e mamae wavana Iesu.
8Maranai patara ma taon babadai wei babanina i nonori taui amloi i ḡaiḡai kaua, 9ma Jason i egari da mane ḡaeḡaena i vimaiei da eḡa mae boaboa ḡelauna ina vitupui. Ma taui Jason i voterei da i nae.
Au Berea
10Ma waguvarai tauvitumaḡana Paul ma Sailas i paritawanei au Berea. Maranai kampa i ḡeta, ma i rui au boru numana. 11Mai Berea i viaiaii, eḡa me mai Thesalonika. Taui i rautaniḡana ma i votelatela ma marana patapatana God ana buka i ʼaiavi da ita aramanei da Paul aiwai i bababaniei lamna riwa kaua. 12Ma lamnei mai Jew maḡamaḡaui i vitumaḡana, ma nanare mai Greek waivinei wavai naenaei ma nelara.
13Maranai mai Jew au Thesalonika paratana i nonori da Paul God riwana i raraugugulei au Berea, taui maiteni i nae kampa, ma rava i rauegari da ḡavia ita vikarei. 14Maratagogi kerisiana Paul i paritawanei au gera wate Sailas ma Timothy au Berea provins i mae. 15Ma nelara Paul i tauvigwanigwaniei da au Athens, ma Paul nelarai i riwei ma i paritawanei au Berea da Sailas ma Timothy ita riwei da laḡilaḡina ita nei awarina.
Paul au Athens i raugugula
16Ma Paul au Athens ana rava i paipaini, ma i ʼnanai da kampa kokoitau i maḡa kaua ma i vinuabola kaua. 17Mai Jew ma mai Greek God tauviborumeina awari i jima guratana au pari numana ma nanare au deba, aiai da i ḡeta ma i rautaniḡana. 18Ma rava ḡelaui nuaulaulai i ḡetai ma maiteni i vitarapiri, taui e ḡoreḡorei mai Epicure ma mai Stoic, taui lawana ai kaua tauviararamanai. Ma ai rava ḡelaui i paridadana, “Wei ravana aiwai e voḡavoḡanei?” Ḡelaui i riwa, “Mepa da tauna dobu ḡelaui ai god e bababaniei.” Taui wenanare i babani aubaina Paul Iesu Riwana Aiaina ma ana iraḡe ma ana vomairi me, i raugugulei.
19Ma i taravaini ma i naiei ai au boru e ḡoreḡorei Areopagus ma i riwei, “Ma nei ma a ḡoei da am viararamanana vouna e bababaniei, ata aramanei. 20Kaua ḡelaui e babaniei tauai a vivinuanainei, ma a ḡoei da ana aramanei anona aiwai?” 21(Taumana ma mai Athens marana patapatai ai nola eḡa aiwai, da kaua voui ina virarautuei ma ina nononori.)
22Ma Paul babadai au naoi i mairi ma i riwa:
Dogadogara mai Athens! A inana da taumi vipatupatutumi ami god awarii, 23A bababara ma ami pulo aniapunana a inainanai, ma tagogi a inanai au tepana i giruma, “Wei God eḡa ata araramaneia aubaina.” Wei Godna o viviborumei wate eḡa ota aramanei. Tau ana riwemi nai Godna aiai. 24 Tauna God mara ma dobu ma aiwai anatapuna au orana i kauei. Ma tauna mara ma dobu badana, ma numa rava uranei e voavoai au orana eḡa ita mamae. 25Ma eḡa rava ai agu ita paipaini, tauna agu eḡa ita ḡoeḡoei. Aubaina tauna rava lawana ma lavutu ma anatapuna e vereverei. 26Au karena rava tagogi i kauei ma nai ravanei dam patarai i vitupua ma dobu i maeni. Tauna ainelana rava ai mara i terei da ina mae ma ina iraḡe ma animae paratana i aiterei. 27God wenanare i kauei da rava tauna ina baiei da mepa ina nelaḡai. Wate tauna au ḡereḡereta, eḡa au uama. 28Taugiruma ḡelauna Greekei i riwai pa, “Taunei ta mamae ma ta bababara ma anatapuna ta kaukauei.” Ma wate ami taugiruma ḡelauna i girumi i pa, “Tauai nanare tauna natunatuna.”
29Ma tauta God natunatuna, eḡa tana notai da God lamna me kokoitau, goldei bo silvei i kauei. Rava uraiei ma ana nuaulaulauei i kauei. 30Wariaḡa rava God eḡa ita aramanei wate God taui i ʼnana-tawanei, wate marina anataputa egaegarita da tana rupena ma tana mae-tavireta awarina. 31Aubaina mara i vinei maranai rava anatapui aiainei ma jijimaninei ina kovoḡi. Rava i vinei da taunei ina kovoḡa. God wei ravana iraḡelei i vovaimairini lamna ina vimataira rava awari da ravana anina tauna.
32Maranai Paul iraḡelei vomairina i babaniei, rava i nonori ma ḡelaui tauna i vinamei wate ḡelaui i riwa, “Tauai a ḡoei da muriai wei babanina ma babaniana-melei.” 33Ma Paul ai boru i opu-tawanei ma boru i gudu. 34Wate ḡelaui i vitumaḡana ma Paul i votaḡotaḡoi. Tagogi lamna Dionisius, Areopagus boruna au orana, ma wavine wavana Damaris, ma rava ḡelaui.