Ala fan Isirayila ra han!

A fan bɔɲɛ sariɲanxi kanne ra.

2Koni fayida n bata yi tantan,

n kiraan beɲin.

3Amasɔtɔ n yi wasodene maxɔxɔlɔnma nun

n muxu ɲaxine sabatixin to waxatin naxan yi.

4E mi kɔntɔfilixi sese ra mumɛ!

E fatine fan, e kɛndɛ.

5E mi sɔxɔlɛxi sese ra alo bonne.

Adamadiine tɔrɔne mi e tan lima.

6Nanara, wasona e yi

alo ɲɛrɛn muxune kɔɛ.

Gbalona e yi alo domaan muxune ma.

7Turena e fatini

han e yɛtagin bata yikusin.

Fe ɲaxin nan e bɔɲɛni han!

8E gelen muxune ma,

e fala ɲaxine ti.

E muxune ɲaxankatama wasoni.

9E fala ɲaxine tima Ala ma,

e dɛ ɲaxu falane dunuɲa birin yi.

10Nanara, yamaan biraxi e fɔxɔ ra,

e falane xɔnla yi e suxu

alo igen min daxina.

11E naxa, “Ala nanse kolon?

Kore Xɔnna Ala nɔɛ na kolonɲɛ di?”

12Muxu ɲaxine na kii nin.

E bɔɲɛn saxi waxatin birin,

e lu nafunla sɔtɛ tun!

13Nayi, n luxi tinxinyani nɛn fuu!

N yi n yɛtɛ rasariɲan fuyan!

14N tɔrɔxi lɔxɔ yo lɔxɔ!

I n hakɛn saranma n na xɔtɔn yo xɔtɔn!

15Xa n yi falan ti alo e tan,

nayi, n yi i ya muxune yanfama nɛn nun.

16Nanara, n yi kata feni ito famudeni,

koni, a yi xɔdɔxɔ n ma.

17Han n so Alaa yire sariɲanxini waxatin naxan yi,

n yi n miri e raɲan kiin ma.

18Ala, i e tima yire salaxunxin nin,

e birama dɛnaxan yi, e kala.

19Nba, e halagima nɛn mafurɛn,

gbalon yi e ɲan sasa!

20E luxi nɛn alo xiyena

naxan ɲinanma muxun na xɔtɔnni.

Marigina, i na keli waxatin naxan yi,

e tununma nɛn.

21N bɔɲɛn yi sɔxɔlɛxi waxatin naxan yi,

n niin yi sunuxi,

22n yi daxuyaan nun xaxilitareyani.

N yi luxi i yɛɛ ra yi alo subena.

23Koni hali na,

n yi i fɔxɔ ra waxatin birin,

i yi n yii rasuxu,

24i ti n yɛɛ ra i ya maxadine xɔn,

i yi n nasuxu binyen nin.

25Nde n malima kore xɔnna ma,

ba i tan na?

Bayo i bata lu n xɔn,

n fa waxi nanse gbɛtɛ xɔn dunuɲa yi?

26N fati bɛndɛn nun n niin taganɲɛ nɛn,

koni Ala nan n niin sɛnbɛn na

e nun n kɛɛna habadan!

27Naxanye e makuyaxi i ra,

ne yatin halagima nɛn.

Naxanye e mɛxi i ra, i yi ne raxɔri.

28Koni a rafan n tan ma,

n yi n maso Ala ra.

N bata Marigina Alatala findi n yigiyaan na,

alogo n xa i ya wali faɲine birin nali!