16
1 Werur Tupàn Ze'eg Hyru tàpuzràn Tawi hemimuàgy'ygwer pe wà. Omono ipupe wà. Na'e omono ma'e hapy pyrer Tupàn pe wà. Omono ma'e izupe uzemuawyze kar haw romo wà no. 2 A'e ma'e paw Tupàn pe imono paw ire, Tawi omono uze'egatu teko wanehe Tupàn Tuweharupi Wiko Ma'e her rehe. 3 Omono temi'u teko nànàn no. Omono pitài typy'ak awa wanupe pitàitàigatu, kuzà wanupe pitàitàigatu no. Omono ma'ero'o kwer wanupe pitàitàigatu no. Omono uwà imuxinig pyrer wanupe pitàitàigatu no.
4 Tawi wexaexak amo Erewi izuapyapyr Tupàn Tuweharupi Wiko Ma'e Izaew wazar imuwete haw iapo àràm romo wà. Uzegar Tupàn pe wà. Umume'u ikatu haw wà no, Tupàn Ze'eg Hyru henataromo wà. 5 Tawi umuigo kar Azap wanuwihaw romo a'e. Zakari wiko ipytywà har romo. Wexaexak 8 awa wioràwiràn imupu àràm romo wà: Zeiew, Xemiramot, Zeiew, Maxixi, Eriaw, Omez-Enom, Zeiew. Wexaexak pitài awa kawaw zàwenugar imupu àràm romo: Azap. 6 Wexaexak 2 awa xi'àm ipy àràm romo wà: Menai, Zaziew. 7 — Pezegar Tupàn Tuweharupi Wiko Ma'e pe ikatu haw imume'u pà tuweharupi nehe, i'i Tawi Azap pe, imyrypar Erewi izuapyapyr wanupe no. Uzypyrog a'e 'ar mehe wà.
Uzegar Tupàn ikatu haw rehe wà
8 Pemume'u Tupàn Tuweharupi Wiko Ma'e ikatu haw izupe nehe.
Pemume'u ikàg wera'u haw nehe no.
Pemume'u hemiapo kwer teko amo ywy rehe har wanupe nehe.
9 Pezegar Tupàn pe nehe, ikatu haw imume'u pà izupe nehe.
Peze'eg hemiapo kwer ikatuahy ma'e rehe nehe.
10 Penurywete her ikatuahy ma'e rehe nehe.
Tuwe Tupàn Tuweharupi Wiko Ma'e imuwete katu har hurywete paw rupi wà nehe.
11 Penoz pepytywà àwàm Tupàn Tuweharupi Wiko Ma'e pe nehe.
Peiko henataromo tuweharupi nehe.
12-13 Pe Àmàrààw Tupàn hemiruze'eg izuapyapyr wà, pe Zako Tupàn hemixak kwer izuapyapyr wà,
pema'enukwaw Tupàn hemiapo kwer ikatuahy ma'e purumupytuhegatu kar ma'e rehe nehe.
Pema'enukwaw Tupàn hemimume'u kwer rehe nehe.
14 Wiko Tupàn Tuweharupi Wiko Ma'e Zanezar romo a'e.
Umur wemiapo kar teko wanupe paw rupi.
15 Ima'enukwaw putar wemimume'u kwer rehe tuweharupi nehe.
Umumaw putar kwarahy tetea'u ma'e iapo pà wemimume'u kwer rupi katete nehe.
16 Uzapo putar ma'e Àmàrààw pe imume'u pyrer rupi katete nehe.
Uzapo putar ma'e Izak pe imume'uahy pyrer rupi katete nehe no.
17 Tupàn uzapokatu uze'eg Izaew wanehe we.
Uzapo putar ma'e a'e ze'eg rupi katete tuweharupi nehe. Hemimume'uahy kwer nupaw pixik kwaw nehe.
18 Nezewe haw rehe Tupàn uze'eg nezewe.
— Amono putar Kànàà ywy peme ihe nehe.
Peiko putar izar romo tuweharupi nehe, i'i.
19 Naheta tete kwaw teko Tupàn hemiruze'eg a'e 'ar mehe wà.
Wiko amo ae ywy rehe har zàwenugar a'e ywy imume'u pyrer rehe wà.
20 Wata oho waiko ywy nànàn wà.
Wata oho waiko tuwihaw tetea'u waiwy rehe wà.
21 Nezewe rehe we Tupàn nuzapo kar kwaw ikatu 'ym ma'e wanupe.
Uzepyk tuwihawete wanehe wemiruze'eg wapyro pà wà.
22 Uze'eg nezewe. — Pepokok zo heremiruze'eg heremixamixak kwer wanehe nehe, i'i wanupe.
— Pepuraraw kar zo ma'erahy heze'eg imume'u har wanupe nehe, i'i wanupe.
23 Pezegar Tupàn Tuweharupi Wiko Ma'e pe nehe, teko ywy nànànar wà.
— Urepyro a'e, peze purupe tuweharupi nehe.
24 Peze'eg ikàgaw rehe ipuràg eteahy haw rehe teko ywy nànànar wanupe nehe.
Pemume'u hemiapo kwer ikatuahy ma'e teko paw wanupe nehe.
25 Tupàn Tuweharupi Wiko Ma'e ikàg tuwe a'e. Tuwe ximume'u ikatu haw nehe.
Tuwe teko ukyze izuwi amo tupàn wanuwi paw rupi katete wà nehe.
26 Ta'e amo ywy rehe har wazar wiko tupàn a'ua'u hagapaw romo a'e wà xe.
Tupàn Tuweharupi Wiko Ma'e uzapo ywak a'e.
27 Ikàgaw umàmàn uzar a'e. Ipuràg eteahy haw umàmàn uzar a'e no.
Hàpuzuhu tynehem ipuner haw pupe. Hàpuzuhu tynehem ipuràg eteahy haw pupe no.
28 Pemume'u Tupàn Tuweharupi Wiko Ma'e ikatu haw nehe, teko ywy nànànar wà.
Pemume'u ipuràg eteahy haw nehe. Pemume'u ipuner haw nehe no.
29 Pemume'u her ikatuahy ma'e ikatu haw nehe.
Perur imono pyràm izupe nehe. Peixe hàpuzuhu pupe nehe.
Pezeamumew Tupàn Tuweharupi Wiko Ma'e ikatuahy ma'e henataromo nehe, izexak kar mehe nehe.
30 Peryryryryz henataromo nehe, ywy nànànar wà.
Omonokatu ywy henaw rehe.
Ni amo numunyryk kar kwaw a'e wi wà nehe.
31 Nerurywete nehe, ywy. Nerurywete nehe, ywak.
— Tupàn Tuweharupi Wiko Ma'e wiko zaneruwihawete romo a'e, peze ywy nànànar wanupe nehe.
32 Eànoànog nehe, yryhu. Peànoànog nehe, yryhu pe wiko ma'e paw wà.
Nerurywete nehe, ka'a. Penurywete nehe, ka'a pe wiko ma'e paw wà.
33 Na'e ywyra ka'a pe har uhapukaz putar urywete haw rehe Tupàn Tuweharupi Wiko Ma'e henataromo wà nehe.
Ta'e ur putar ywy rehe har wanemiapo kwer imume'u pà a'e nehe xe.
34 Pemume'u Tupàn Tuweharupi Wiko Ma'e ikatu haw nehe, ta'e ikatuahy a'e xe.
Ipuruamutar katu haw nupaw pixik kwaw nehe.
35 — Urepyro pe nehe, Tupàn Tuweharupi Wiko Ma'e urepyro har, peze izupe nehe.
Uremono'og nerehe uzeruzar 'ym ma'e wanuwi urepyro pà nehe.
Nezewe mehe urumume'u putar nekatu haw nehe.
Urumume'u putar nerer ikatuahy ma'e ikatu haw purupe nehe, urerurywete haw rehe nehe, peze izupe nehe.
36 Ximume'u Tupàn Tuweharupi Wiko Ma'e Izaew wazar ikatu haw nehe.
Pemume'u ikatu haw ko 'ar rehe nehe, tuweharupi nehe no.
— Amez, i'i teko paw rupi wà. Umume'u ikatu haw wà no.
Umuwete katu Tupàn Zeruzarez pe wà, Zimeàw pe wà no
37 Uze'eg Tawi Azap pe kury, iànàm Erewi izuapyapyr wanupe no. — Peiko putar Tupàn imuwete katu haw rehe uzekaiw ma'e romo nehe, Tupàn Ze'eg Hyru henaw rehe har rehe uzekaiw ma'e romo nehe. Tuweharupi pemuzàg imuwete haw nehe, i'i wanupe. 38 Omez-Enom Zenutum ta'yr a'e, 68 awa iànàm inuromo har a'e wà no, wiko a'e awa wapytywà har romo wà. Oza a'e, Omez-Enom a'e no, wiko zauxiapekwer ukenawhu huwake u'àm ma'e romo a'e wà.
39 Xaxeto Zanok a'e, iànàm a'e wà no, wiko Tupàn imuwete haw Zimeàw pe har rehe uzekaiw ma'e romo a'e wà. 40 — Tuweharupi ku'em mehe a'e wà nehe, karuk mehe a'e wà nehe no, uzuka putar ma'ea'yr Tupàn henataromo hapy pà paw rupi a'e wà nehe, Tupàn Tuweharupi Wiko Ma'e ze'eg rupi katete a'e wà nehe, ze'eg pape rehe imuapyk pyrer Izaew wanupe imur pyrer rupi katete a'e wà nehe, i'i Tawi wanupe. 41 Emà a'e, Zenutum a'e no, amogwer hexaexak pyrer a'e wà no, wiko a'e pe wapyr a'e wà no. — Tupàn Tuweharupi Wiko Ma'e zaneamutar katu tuweharupi upytu'u 'ym pà a'e. A'e rupi amuigo kar 'aw awa Tupàn pe uzegar ma'e romo ihe wà kury, i'i Tawi. 42 Emà a'e, Zenutum a'e no, wiko xi'àm ma'e'ak kwer wanehe kawaw zàwenugar wanehe wioràwiràn wanehe uzekaiw ma'e romo a'e wà. Teko umupu a'e ma'e Tupàn pe uzegar mehe wà. Upy a'e ma'e Tupàn pe uzegar mehe wà. Zenutum iànàànàm wiko zauxiapekwer ukenawhu huwake uzekaiw ma'e romo wà.
43 Na'e a'e teko oho weko haw pe paw rupi a'e wà kury. Tawi uzewyr weko haw pe a'e no. Ta'e ipurumumaw wer amo 'ar rehe wànàm wapyr a'e xe.