1 A'e ma'e paw iapo re amo Izaew wanuwihaw ur ihewe uze'eg pà wà kury. Nezewe i'i ihewe wà. — Teko a'e wà, xaxeto a'e wà no, Erewi izuapyapyr a'e wà no, nutyryk kwaw uzeruzar 'ym ma'e wanuwi a'e wà, ni wanemiapo purumuhuhuk kar ma'e wi a'e wà. Na'aw a'e teko ikatu 'ym ma'e iapo har waner xe wà: Kànàà izuapyapyr wà, Ete izuapyapyr wà, Perize izuapyapyr wà, Zepu izuapyapyr wà, Amon izuapyapyr wà, Moaw izuapyapyr wà, Ezit ywy rehe har wà, Amohe ywy rehe har wà. Amo Izaew wiko a'e teko wazàwe wà. 2 Awa Izaew ywy rehe har wereko kuzà amo ae ywy rehe har wemireko romo wà. Nezewe mehe teko Tupàn hemixamixak kwer wiko amo ae teko wainuinuromo wà. Teko wanuwihaw ràgypy uzapo a'e ikatu 'ym ma'e wà. 3 A'e ma'e henu mehe amu'i hekamirpuku hezemumikahy haw hexak kar pà ihe kury. Apo'o he'aw. Apo'o heamutaw no. Na'e apyk ihe, ta'e wanemiapo kwer iro ihewe xe. 4 Apyk nezewe a'e pe ihe. Te uhem ma'ea'yr hapy haw karuk mehe har 'or kury. Na'e teko uzypyrog heywyr uzemono'og pà wà. Ukyze wà. Ukwaw Tupàn Izaew wazar ize'eg awer wà. Wanemiapo kwer ikatu 'ym ma'e Mawiron ywy wi wanemirur kwer na'ikatu pixik kwaw izupe.

5 Na'e uhem ma'ea'yr hapy haw 'or karuk mehe har kury. Ahem hezemumikahy haw wi hepenàràg rehe heapyk pà Tupàn pe heze'eg pà kury. Amunehew wiwi hekamir imu'i pyrer. Na'e aupir hepo Tupàn Tuweharupi Wiko Ma'e hezar ikutyr ihe kury. 6 — O Tupàn, hemaranugar tuwe ihe. A'e rupi naupir kwaw heàkàg nerenataromo ihe. Ureremiapo kwer ikatu 'ygwer iaiha wera'u ureàkàg wi. Uhem ywak rehe. 7 Ureipy waneko mehe arer we te ko 'ar rehe ure neremiruze'eg ure, uruzapo ikatu 'ym ma'e tetea'u ure. Ureremiapo kwer ikatu 'ym ma'e iro newe. A'e rupi uremono pe tuwihawete amo ae ywy rehe har wanupe ne. Eremono ureruwihawete urexaxeto wanehe we wanupe ne wà no. Uzuka ureipy wà. Imunar urema'e rehe wà. Urereraha wemipyhyk kwer romo wà. Te ko 'ar rehe urerereko ikàg 'ym ma'e ài wà. 8 Ko 'ar rehe, o Tupàn Tuweharupi Wiko Ma'e urezar, eremumaw amo 'ar iko nekatuahy pà urewe. Eremuhem kar amogwemogwer ureinuinuromo har a'e tuwihaw wi ne wà. Uremuigo kar pe xe ko ywy imonokatu pyrer rehe. Ni amo na'ureàmàtyry'ym kwaw xe wà. Uremuhem kar pe urepyhyk kar awer wi. Uremuigo kar wi pe no. 9 Uruiko amo pe uma'ereko e ma'e romo. Nezewe rehe we na'uremupyta kar kwaw pe ipyhyk pyrer romo ne. Urepuhareko kar pe Pezi ywy rehe har wanuwihawete wanupe. A'e rupi uzapo wi kar neràpuzuhu heityk pyrer urewe wà. Uremuigo kar xe Zuta ywy rehe Zeruzarez tawhu pe zeàmàtyry'ym 'ymaw pe.

10 Ma'e uru'e putar newe a'e ma'e paw izeapo re kury. Uruzuhaw neze'eg pitàitàigatu ure. 11 Eremur a'e ze'eg neremiruze'eg wanupe. Neze'eg imume'u har romo wanekon wà. — Peixe putar amo ywy rehe nehe. Peiko putar a'e ywy izar romo nehe, i'i urewe wà. — A'e ywy na'ikatu kwaw, ta'e teko hehe wiko ma'e umynehem a'e ywy wemiapo kwer ikatu 'ym ma'e pupe upaw rupi wà xe, i'i urewe wà. 12 — Pereko zo a'e teko penemireko romo pemen romo nehe. Aze pepuru'u wer ko ywy rehe hezuz ma'e ràm rehe nehe, aze peporomono wer ko ywy rehe pezuapyapyr wanupe nehe, pepytywà zo teko ko ywy rehe har zeàmàtyry'ym 'ymaw rehe waneko mehe pe wà nehe. Pepytywà zo ma'e tetea'u imono'og mehe pe wà nehe. 13 Erezepyk urerehe ureremiapo kwer ikatu 'ym ma'e hekuzaromo ne, iaiw ma'e tetea'u imuzeapo kar pà urewe ne. Uhua'u ureremiapo kwer ikatu 'ym ma'e. Nezewe rehe we urukwaw ko ma'e ure. Urerehe nezepyk awer ipixika'i wera'i urekatu 'ymaw wi. Na'urezuka kwaw pe ne. Uremuigo kar wiwi pe ne. 14 Màràzàwe tuwe uruzuhaw wi neremiapo kar. Màràzàwe tuwe urereko 'aw teko a'e purumuhuhuk kar ma'e iapo har ure wà. Aze mo uruzapo nezewe haw, erekwahy mo urewe. Uremumaw pe. Ni pitài nuhem iwer mo nezepykaw wi wà. 15 O Tupàn Tuweharupi Wiko Ma'e Izaew wazar, ereiko ikatu 'ym ma'e wanehe uzepyk ma'e romo ne. Nezewe rehe we uremuhem kar pe umàno 'ym ma'e romo ne. Uruiko xe kutàri. Urumume'u ureremiapo kwer ikatu 'ym ma'e uruiko newe ure kury. Nurupuner kwaw nerenataromo urepu'àmaw rehe, a'e Tupàn pe.