9
Zaneruwihawete Ur Ma'e ràm zeàmàtyry'ymawhu imumaw àràm
1 Nezewe rehe we ma'erahy ipuraraw par wanemipuraraw upaw putar nehe. Amo kwarahy rehe kwehe mehe Tupàn uzepyk Zemurom ywy rehe a'e. Uzepyk Napitari ywy rehe a'e no. Amo 'ar mehe umukàg kar putar a'e ywy nehe. Teko tetea'u ukwaw putar waner wà nehe. Uzypyrog a'e ywy Mezitehàn yryhu pe. Oho ywy Zotàw yrykaw ikupe pe har pe. Karirez a'e ywy her romo a'e. Zutew 'ym wiko a'e ywy rehe wà.
2 Teko ipytunaw rehe wata ma'e
wexak tatainy heny katu ma'e wà.
Tatainy uhyape katu
teko ipytunaw rehe wata ma'e wanupe wà.
3 Ne, O Tupàn, eremueta tetea'u kar a'e teko ne wà.
Eremurywete kar tuwe ne wà.
Teko hurywete arozràn ipo'o mehe wà.
Nezewegatete a'e teko hurywete neremiapo kwer rehe wà.
Teko hurywete ma'e tetea'u zeàmàtyry'ymawhu pe imono'og pyrer imuza'aza'ak mehe uzeupeupe wà.
Nezewegatete a'e teko hurywete neremiapo kwer rehe wà.
4 Wiko amo pe uma'ereko e ma'e romo wà. Eremonohok kyhàhàm tàtà ma'e wàpixipixi haw ne.
Wazar unupà ywyra pupe wà. Erezuhaw a'e ywyra ne.
Wàmàtyry'ymar wiko wazar romo wà. Eremumaw wazar ne wà.
Nezewegatete kwehe mehe eremumaw Minià izuapyapyr wà.
5 Tata umumaw putar zauxiapekwer waxapat wànoànog ma'e paw rupi nehe.
Imumaw paw pemurywete kar pà nehe.
Umumaw putar wakamir tuwykwer hereko har paw rupi nehe no.
6 Heta turywete haw ta'e uzexak kar amo kwarer a'e xe.
Tupàn umur kar amo kwarer zanewe a'e.
Wiko putar zaneruwihawete romo a'e nehe.
Nako her ràm xe wà nehe: Pureruze'eg Ma'e, Pureruze'eg Ma'e Ma'ekwaw Katu Wera'u Har.
Tupàn Ikàg Ma'e, Zaneru Tuweharupi Wiko Ma'e, Zaneruwihawete Ur Ma'e ràm zeàmàtyry'ymawhu imumaw àràm.
7 Tuwihawete Tawi izuapyr a'e,
Tuwihawete romo heko mehe ipuner haw uhua'u wera'u putar oho iko tuweharupi nehe.
Naheta kwaw zeàmàtyry'ymawhu tuwihawete romo heko mehe nehe.
Upureruze'eg putar ukatu haw rupi nehe. Upureruze'eg putar ukatuahy haw rupi nehe. Nezewe mehe teko wiko putar ikatu ma'e iapo har romo wà nehe.
Izypy mehe nehe, tuweharupi nehe no.
Tupàn Tuweharupi Wiko Ma'e Ikàg Wera'u Ma'e upuruamutar katu tuwe a'e.
A'e rupi uzapo kar putar a'e ma'e paw a'e nehe.
Tupàn wikwahy Izaew wanupe
8 Tupàn umume'u teko Izaew wanehe uzepyk àwàm a'e kury.
Zako izuapyapyr romo wanekon wà.
9 Teko Izaew paw wà,
Xamari pe har paw wà no,
Ukwaw hemiapo ràm a'e wà.
Wiko wera'u ma'e romo wanekon wà, umume'u upuner haw oho waiko purupe wà. Nezewe uze'eg wà:
10 — Tàpuz ywy imuàtà pyrer iapo pyrer u'ar wà.
Urerur putar ita a'e tàpuz iapo wi pà nehe.
Zauxiapekwer omonohok tàpuz izyta ywyra pi 'yw ka'a pe har iapo pyrer wà.
Urerur putar ywyràkàxigyw tàpuz izyta ràm iapo wi pà nehe, i'i wà.
11 A'e rupi Tupàn Tuweharupi Wiko Ma'e umur kar putar wàmàtyry'ymar a'e wà kury.
— Pezàmàtyry'ym Izaew pezuwà pe wà nehe, i'i putar wanupe kury.
12 Xir ywy kwarahy hemaw kutyr tuz a'e.
Pirite ywy kwarahy heixe haw kutyr tuz a'e. Uzurupeka zàwàruhu ài teko Izaew wa'u pà wà.
Nezewe rehe we nahakuir kwaw Tupàn ikwahy haw,
upir wiwi opo wanehe uzepyk pà.
13 Tupàn Tuweharupi Wiko Ma'e Ikàg Wera'u Ma'e uzepyk wemiaihu wanehe.
Nezewe rehe we nuweityk kwaw ukatu 'ymaw wà.
Nuzewyr kwaw Tupàn pe wà.
14 A'e rupi pitài 'ar mehe Tupàn Tuweharupi Wiko Ma'e
omonohok putar Izaew iàkàg nehe, omonohok putar huwaz nehe no.
Wereko putar miar ài a'e wà nehe:
weityk putar inàzàràn 'yw paw nehe: weityk putar teko ka'api'i popok zàwenugar nehe no.
15 Awa tua'uhez ma'e imuawate pyr a'e wà, nuzawy kwaw Izaew iàkàg wà.
Tupàn ze'eg imume'u mua'u har nuzawy kwaw huwaz wà.
16 Weraha tuwihaw teko pe iaiw ma'e rupi wà.
A'e rupi teko wata e ukàzym ma'e ài wà.
17 Zanezar nupuhareko kwaw kwàkwàmo wà nehe, nupuhareko kwaw kuzàwaza wà nehe.
Nupuhareko kwaw tu 'ym ma'e wà nehe. Nupuhareko kwaw imen umàno ma'e kwer wà nehe,
ta'e ni amo nuzeruzar kwaw Tupàn rehe wà xe.
Na'ikatu kwaw upaw rupi wà. Uze'eg he'o ma'e ài wà.
Nezewe rehe we nahakuir kwaw Tupàn ikwahy haw.
Upir wiwi opo wanehe uzepyk pà.
18 Tata wapy ka'a. Wapy xu.
Nezewegatete teko wakatu 'ymaw ukaz tata ài.
Nuzawy kwaw tata uhua'u ma'e ka'a pe har.
Umuzeupir kar tàtàxiner tetea'u.
19 Tupàn Tuweharupi Wiko Ma'e Ikàg Wera'u Ma'e wikwahy a'e kury.
A'e rupi umumaw a'e ywy hereko tata pupe imunykaw ài.
Umumaw teko wanereko zepe'aw tata rehe heityk pyr zàwe wà.
Ni amo nupuhareko kwaw amogwer wà.
20 Te wa'yr wano'o kwer u'u wà.
Pitàitàigatu u'u wyzài ma'e wemipykyk kwer wà.
Nezewe rehe we ima'uhez we waiko wà.
21 Manaxe izuapyapyr uzàmàtyry'ym Eparai izuapyapyr oho wà.
Eparai uzàmàtyry'ym Manaxe oho wà no.
Uzemono'og oho Zuta izuapyapyr wàmàtyry'ym pà wà no.
Nezewe rehe we nahakuir kwaw Tupàn ikwahy haw.
Upir wiwi opo wanehe uzepyk pà.