14
Teko Izaew ywy rehe har uzewyr putar wà uiwy rehe wà nehe
1 Tupàn Tuweharupi Wiko Ma'e upuhareko wi putar Izaew a'e wà nehe. Omonokatu wi putar wemiaihu romo wà nehe no. Umuzewyr kar putar Izaew waiwy kwehe arer pe wà nehe. Amo ae ywy rehe arer wiko putar a'e pe wainuinuromo wà nehe. 2 Teko amogwemogwer ywy rehe har oho putar Izaew wanupi waiwy rehe wà nehe. Tupàn wiko a'e ywy izar romo a'e. A'e teko wiko putar Izaew wanupe uma'ereko e ma'e romo a'e wà nehe. Izaew wazar kwer wiko putar wanupe uma'ereko e ma'e romo wà nehe. Izaew wiko putar uwihaw kwer wanuwihaw romo wà nehe no.
Mawiron wanuwihawete oho umàno ma'e kwer waneko haw pe a'e
3 Teko Izaew wà, uhem putar amo 'ar nehe. A'e 'ar mehe Tupàn Tuweharupi Wiko Ma'e pepyro putar uma'ereko e ma'e romo peneko haw wi nehe. Pepyro putar ma'erahy penemipuraraw wi nehe. Pezar pemuma'erekoahy kar penereko wà. Tupàn pepyro putar wanuwi nehe. 4 A'e 'ar ihem mehe peze'eg urywahyahy Mawiron wanuwihawete rehe nehe, ko zegar haw imume'u pà nehe.
— Peme'e kury. Tuwihawete purupe ma'erahy ipuraraw kar arer ukàzym kwez kury.
Peme'e nehe. Upaw ipuruzuka haw kwez kury.
5 Tupàn Tuweharupi Wiko Ma'e upyro wakàgaw a'e, ikatu 'ym ma'e wanuwi a'e.
Uhaw tuwihaw purupe ma'erahy ipuraraw par wakàgaw a'e.
6 Wikwahy a'e wà, a'e rupi uzapo ikatu 'ym ma'e teko wanupe wà.
Wikwahy tuwe wà, a'e rupi upuraraw kar ma'erahy wemityk kwer wanupe wà.
7 Ko 'ar rehe naheta kwaw zeàmàtyry'ymawhu ni amo ywy rehe kury.
Teko paw uzegar urywete haw rupi wà.
8 Ywyra xip her ma'e wà, ywyràkàxigyw Irimano rehe har wà no, hurywete Mawiron wanuwihawete heityk awer rehe wà.
A'e rupi uze'eg nezewe wà.
— Amo 'ar mehe upaw a'e.
A'e 'ar henataromo nuzexak kar kwaw amo zanereityk àràm a'e, naheta kwaw zanemumaw àràm wà: i'i wà.
9 Ywy iwy pe har umàno ma'e kwer
wapyta haw pe har, uzemuàgà'ym waiko Mawiron wanuwihawete imuixe katu kar àwàm rehe wà.
Ywy rehe arer ikàg ma'e wanekwe ume'e wà kury.
Tuwihawete kwehe arer upu'àm uwenaw wi wà no.
10 A'e paw uze'eg putar nezewe a'e tuwihawete pe wà nehe.
— Ne no, nekàgaw uhem newi ne no.
Ereiko urezàwegatete ne kury.
11 — Aiko wera'u pewi, ere urewe kwehe mehe. Ma'e ere iko ko 'ar rehe.
Teko umupu uwioràwiràn nerenataromo wà. Upytu'u wà kury.
Imupu arer wiko xe umàno ma'e kwer wapyta haw pe wà.
Ere'aw putar amirikur wa'aromo xe ne nehe kury.
Merua'yr upyk putar neretekwer wà nehe.
12 Mawiron wanuwihawete, zahytata ku'em mehe har heny katu ma'e zàwenugar ne.
Ere'ar ywak wi.
Ereiko ywy tetea'u wanehe har wanuwihawete romo.
Nereityk kwez ywy rehe a'e wà kury.
13 Kwehe mehe ereze'eg nezewe nezeupe.
— Azeupir putar ywak rehe nehe.
Apyk putar herenaw rehe nehe.
Apyta putar zahytata Tupàn hemiruze'eg wa'aromo nehe.
Apureruze'eg putar muite xe wi kwarahy heixe haw awyze har kutyr har rehe nehe.
Aiko putar ywytyr Tupàn wazemono'ogaw pe nehe.
14 Azeupir putar ywàkun ywate wera'u ma'e wa'aromo nehe.
Aiko putar Tupàn Ywate Wera'u Har zàwegatete nehe, ere nezeupe kwehe mehe.
15 Amo nereityk nemono kwez umàno ma'e kwer wapyta haw pe wà kury.
Ywykwaruhu oho etea'u ma'e pupe nereityk wà.
16 Umàno ma'e kwer ume'e putar nerehe upytuhegatu romo wà nehe.
Upuranu putar uzehezehe wà nehe.
— Ko awa a'e, aipo ko awa wiko tuwihawete wanemiruze'eg tetea'u wamuryryryryz kar arer romo a'e.
Aipo ywy nànànar wamuryryryryz kar arer romo hekon a'e.
17 Aipo ko awa wiko ywy ywyxiguhu iapo arer romo a'e.
Weityk tawhu waukauka pà.
Numuzewyr kar kwaw teko wemipyhyk kwer waneko awer pe wà. Aipo ko awa wiko a'e ma'e iapo arer romo azeharomoete, i'i putar uzeupeupe wà.
18 Teko ywy nànànar paw utym uwihawete wanetekwer wà, uze'egatu pà wanehe wà.
Heta itymaw wanupe pitàitàigatu wà.
19 Xo ne zo teko nanetym kwaw a'e wà.
Ereiko kwarer izexak kar mehe umàno ma'e kwer ài.
Teko uhuuhuk nerexak mehe wà: weityk neretekwer katu pe wà. A'e re upyropyrog hehe wà.
Zauxiapekwer wanetekwer zeàmàtyry'ymawhu pe umàno ma'e kwer tetea'u upyk neretekwer wà.
A'e zauxiapekwer uzetym oho ywykwar pupe ita tetea'u heta haw pupe wà.
20 Nanetym kwaw amogwer tuwihawete zàwe wà,
ta'e eremuaiw neywy ne xe.
Erezuka teko neywy rehe har wà.
Tuwe ko tuwihawete iaiw ma'e izuapyapyr umàno a'e wà nehe no.
21 Izypy na'ikatu kwaw a'e wà.
A'e rupi, pezuka ta'yr pe wà nehe.
Nezewe mehe ta'yr nuiko pixik kwaw ywy rehe har wanuwihawete romo wà nehe.
Numynehem pixik kwaw ywy tawhu pupe weko àwàm pupe wà nehe no.
22 Nezewe uze'eg Tupàn Tuweharupi Wiko Ma'e.
— Azàmàtyry'ym putar Mawiron tawhu aha ihe nehe. Aityk putar imumaw pà nehe. Amumaw putar teko a'e pe har paw ihe wà nehe. Teko wanu wà, awa wana'yr wà, teko wanàmuz wà, teko wazaryz wà, awa wanemimino wà, kuzà wanemiàriro wà. Paw rupi azuka putar ihe wà nehe. Ihe, Tupàn Tuweharupi Wiko Ma'e ihe, aiko ko ze'eg imume'u har romo ihe. 23 Azapo putar Mawiron to'om uhua'u ma'e romo nehe. Pypy wiko putar a'e pe wà nehe. Amumaw putar hetypeir haw pupe ipeir haw ài nehe. Ukàzym putar nehe. Ihe Tupàn Ikàg Wera'u Ma'e ihe, aiko ko ze'eg imume'u har romo ihe, i'i Tupàn.
Tupàn umumaw putar Axir waiwy a'e
24 Tupàn Tuweharupi Wiko Ma'e Ikàg Wera'u Ma'e umume'uahy ko wemiapo ràm a'e.
— Azapo putar heremiapo putar haw ihe nehe.
Azapo putar heremiapo ràm imume'u pyrer ihe nehe.
25 Amumaw putar Axir ihe wà nehe.
Ko 'ar rehe Axir wiko heywy Izaew rehe wà.
Apyropyrog putar wanehe ywytyruhu herenaw pe ihe wà nehe.
Apyro putar heremiaihu Axir wanuwi ihe wà nehe.
Axir uzàpixipixi heremiaihu kyhàhàmtàtà pupe wà. Amonohok putar a'e kyhàhàmtàtà nehe, heremiaihu wapyro pà wamuhem kar pà nehe.
Aupir putar ma'e ipuhuz katu ma'e wakupe pe har ihe nehe, wanuwi ipyhyk pà ihe nehe.
26 Na'aw ywy nànàn heremiapo ràm imume'u pyrer xe:
Aupir putar hepo ywy nànàn hezepyk pà nehe, i'i Tupàn.
27 Tupàn Tuweharupi Wiko Ma'e Ikàg Wera'u Ma'e Uzapo putar a'e ma'e a'e nehe.
Aipo amo upuner imupytu'u kar haw rehe wà nehe.
Upir opo teko wanehe uzepyk pà.
Aipo amo upuner ipo imuezyw kar haw rehe wà nehe.
Tupàn umumaw Pirite ywy rehe har wà
28 Tuwihawete Akaz umàno a'e. A'e kwarahy mehe Tupàn umur kar ko ze'eg a'e:
29 Teko Pirite ywy rehe har wà, Axir ywy rehe har umumaw kwarahy tetea'u penehe uzepyk pà a'e wà.
Amo 'ar mehe peityk Axir wamumaw pà pe wà. Penurywete zo waneityk awer rehe nehe.
Aze mozaiw ukàzym nehe, ur putar amo mozaiw iaiw wera'u ma'e hekuzaromo nehe.
Mozaiw hupi'a wi uzexak kar putar mozaiw uhua'u ma'e uwewe ma'e a'e nehe.
30 Àràpuhàràn hawitu ma'e mono'ogar uzekaiw weimaw wanehe a'e.
Nezewegatete azekaiw putar heremiaihu hemetarer 'ym ma'e wanehe ihe nehe.
Amuigo kar putar ikatu haw rehe ihe wà nehe. Pe Pirite pe wà.
Apumumàno kar putar ma'uhez taw uhua'u ma'e pupe ihe nehe.
Namuikuwe wiwi kwaw ni pitài ihe wà nehe.
31 Pezai'o peneiheihem pà penahy haw rehe nehe, Pirite ywy rehe har wà.
Pekyze tuwe nehe,
ta'e ywy imuku'i pyrer ywàkun romo iapo pyrer ur iko kwarahy heixe haw awyze har kutyr har wi a'e xe.
Zauxiapekwer tetea'u ur waiko wà. Naheta kwaw ni pitài ukyze ma'e wainuinuromo wà, i'i Tupàn.
32 Ma'e i'i putar teko Pirite waze'egaw herur har wanupe wà nehe.
Uwazar putar waze'eg wanupe nezewe wà nehe.
— Tupàn Tuweharupi Wiko Ma'e uzapo Xiàw kwehe mehe a'e.
Hemiaihu hemetarer 'ym ma'e wexak putar umimaw a'e pe wà nehe, i'i putar wanupe wà nehe.