16
Moaw uhapukaz uzemumikahy haw rehe wà
1 Moaw izuapyapyr Xera tawhu pe har ywyxiguhu rehe har omono kar àràpuhàràn hawitu ma'e tuwihawete Xiàw rehe har pe a'e wà, ywy izar pe imuawate pà wà 2 Moaw izuapyapyr wata ko rupi wà. Wata kwe rupi wà no. Yrykawhu Aronon izywyr wata e wà. Nuzawy kwaw wiràmiri wanaity wi imuwewe kar pyrer wà.
3 Uze'eg nezewe Zuta rehe har pe wà.
— Pemume'u ureremiapo ràm urewe nehe.
Pezur xe urepytywà pà urepyro pà ureàmàtyry'ymar wanuwi nehe.
Kwarahy wapyter pe hin mehe ywyra umuhàz u'àgaw purupe a'e.
Peiko a'e ywyra ài urewe kwarahy wi uremu'àg pà nehe.
Ipytunahy i'àgaw pyhaw har ài.
4 Uruzàwehem oroho urereko haw Moaw wi ure.
Pezur urepyro pà urerehe ipuruzuka wer ma'e wanuwi nehe.
Tuwe urumàno xe peywy rehe nehe, i'i wà.
Upaw putar puruzuka haw nehe.
Puruzuka ma'e uhem putar oho ko ywy wi nehe.
5 A'e 'ar mehe amo Tawi izuapyr wiko putar tuwihawete romo a'e nehe.
Upureruze'eg putar wemiaihu wanuwi utyryk 'ym pà nehe.
Weruze'eg putar teko ukatu haw rupi nehe.
Uzeagaw putar tuwe ikatu ma'e iapo pà nehe.
6 Teko Zuta ywy rehe har uze'eg nezewe wà.
— Teko umume'u Moaw waneko wera'u haw urewe wà.
— Urekàg wera'u amo wanuwi ure, i'i uzehe wà.
— Urekatu wera'u pewi, i'i wà.
— Nan. Ikàg 'ym ma'e romo wanekon wà, i'i Zuta ywy rehe har wà.
7 A'e rupi Moaw izuapyapyr uzai'o putar wà nehe.
Upaw rupi uhapukaz putar uzemumikahy haw rehe wà nehe:
ta'e ima'enukwaw putar uwà imuxinig pyrer typy'ak zàwenugar iapo pyrer rehe wà nehe xe.
Tuweharupi omono agwer typy'ak zàwenugar wazar tupàn a'ua'u wanupe tawhu Kirer her ma'e pe wà.
8 Ko 'ar rehe teko wezar uwà tyw Ezemon rehe har wà, Ximima ywy rehe har wà no.
Teko umy'e uwà a'e ywy rehe har wà, tykwer win her ma'e iapo pà wà.
Ywy nànànar wanuwihaw uka'u a'e win i'u mehe wà.
Uhua'u uwà tyw. Uhem Zazer tawhu pe.
Oho kwarahy hemaw kutyr ywyxiguhu pe uhem pà.
Oho kwarahy heixe haw kutyr yryhu ikupe kutyr pe no.
9 A'e rupi azai'o Zazer tawhu rehe.
Azai'o uwà tyw Ximima ywy rehe har rehe no.
Herehay kwer u'ar
Ezemon tawhu rehe, Ereaw tawhu rehe no.
Uwà ipo'o har
nuhapukaz kwaw urywete haw rupi wà kury.
10 Turywete haw
ukàzym oho ywy katu wi.
Naheta kwaw turywete haw rehe zegar haw uwà tyw pe kury.
Ni amo nupyrog kwaw uwà rehe itykwer iapo pà wà kury.
Tupàn umumaw turywete haw rehe tehapukaz haw kury.
11 Hepy'a uryryryryz wioràwiràn ihàm ài
hezemumikahy haw rupi teko Moaw izuapyapyr wanehe,
tawhu Ki-Erez pe har wanehe no.
12 Teko Moaw izuapyapyr oho zepe tuweharupi ywytyr pe uzar tupàn a'ua'u wanupe ma'erenoz pà wà. Ikene'o putar oho tetea'u re wà nehe. Oho e putar wà nehe. Wazar nupytywà kwaw wà nehe.
13 Kwehe mehe Tupàn Tuweharupi Wiko Ma'e umume'u a'e uze'eg Moaw izuapyapyr wanehe. 14 Ko 'ar rehe uze'eg nezewe a'e kury.
— Ko 'ar henataromo na'iruz kwarahy pawire nehe, Moaw ywy rehe har heta tetea'u ma'e weityk putar wakàgaw a'e wà nehe. Xo màràmàràn zo wikuwe putar wà nehe. Na'ikàg kwaw a'e wikuwe ma'e wà nehe.