21
Uze'eg Mawiron heityk àwàm rehe
1 Na'aw ze'eg Mawiron kutyr har xe kury: Ywyxiguhu yryhu iwyr har, i'i teko izupe wà:
Ywytuaiw upeipeir ywy kwarahy hemaw awyze har kutyr har hereko.
Nezewegatete puruzuka ma'e ràm ur putar ywyxiguhu wi a'e. Teko ukyze tuwe a'e ywyxiguhu wi wà.
2 Tupàn wexak kar iaiw ma'e ihewe:
Teko uzuka wànàm ywy nànàn wà. Teko uzuka umyrypar wà no. Umumaw tawhu paw wà.
Zauxiapekwer Eràw rehe har wà, pezàmàtyry'ym peàmàtyry'ymar peho pe wà nehe.
Zauxiapekwer Mez rehe har wà, pemàmàn tawhu waiwyr nehe.
Mawiron upuraraw kar ma'erahy purupe a'e wà. Tupàn umupytu'u kar ipuraraw ire wà nehe.
3 A'e ma'e hexak mehe nakwaw kwaw hehem àwàm izuwi ihe.
Apuraraw teko kuzà umemyrahy ma'e ài ihe.
Napuner tària'i kwaw ma'erenu haw rehe. Ta'e hahy tuwe ihewe xe.
Napuner kwaw ma'erexakaw rehe. Ta'e hekàgaw uhem ihewi a'e xe.
4 Nakwaw kwaw ma'e. Aryryryryz hekyze pà.
— Pyhaw hekatu wewer putar nehe, a'e zepe hezeupe.
Pyhaw akyze wera'u.
5 Hepuahu zàwenugar pe aexak amo mai'u haw uhua'u ma'e Mawiron pe imuhyk pyrer.
Henoz pyrer wapyk àwàm uhyk wanupe.
Henoz pyrer umai'u tetea'u wà. Uwi'u win tetea'u pupe wà no.
Na'arewahy a'e 'ar mehe we amo umume'u ko ze'eg a'e pe har wanupe.
— Tuwihaw wà: pepu'àm petakihepuku ipyhyk pà nehe, i'i wanupe.
6 Tupàn hezar uze'eg nezewe ihewe ma'e iapo kar pà ihewe kury.
— Eho amo zauxiapekwer ume'egatu ma'e imupu'àm pà nehe.
— Aze erexak ma'e nehe, emume'u purupe nehe, ere izupe nehe, i'i ihewe. — Emume'u neremixak kwer paw rupi nehe, ere izupe nehe.
7 Tuwe ume'egatu nehe.
Aze wexak awa kawaru ku'az har tetea'u
mokomokogatu wanur mehe wà nehe,
aze wexak awa zumen ku'az har wà nehe no, aze wexak awa kawarukupewa'a kamer her ma'e ku'az har wà nehe no, tuwe umume'u wanur haw wà nehe, i'i hezar ihewe.
8 Na'e uhapukaz ume'e ma'e a'e kury.
— Hezar, tuweharupi apyta heme'e haw pe, 'aromo, pyhaw no.
Tuweharupi ame'e te'àm ihe.
9 — Peme'egatu kury. Na pe ur kawaru ku'az har
waiko mokomokogatu wà kury, i'i.
A'e re uze'eg wi.
— U'ar a'e. U'ar Mawiron a'e.
Tupàn a'ua'u hagapaw
uzekazeka ywy rehe wà kury, i'i.
10 Pe heremiaihu pe, ihe apuraraw kar ma'erahy peme ihe.
Teko oxooxok arozràn imono'ogaw pe wà. Nezewegatete apetepetek heremiaihu ihe wà.
Amume'u ko ze'eg iteko peme kury.
Tupàn Tuweharupi Wiko Ma'e Ikàg Wera'u Ma'e Izaew wazar umume'u kar ihewe a'e.
Uze'eg Enom ywy rehe har wanehe kury
11 Na'aw Tupàn ze'eg Enom wakutyr har xe kury.
Amo Enom ywy rehe har herenoz ihewe uze'eg pà nezewe a'e.
— Ume'egatu ma'e, màràn or heta we kwarahy ihemaw 'ym mehe we.
Ume'egatu ma'e, màràn mehe upaw putar ipytunahy haw nehe, i'i ihewe.
12 Ume'egatu ma'e uwazar ize'eg izupe,
— Iku'em putar nehe. Nezewe rehe we uhem wi putar ipytunahy haw nehe,
Aze nepuranu wi wer hehe nehe,
ezewyr hehe nepuranu wi pà nehe, i'i izupe.
Uze'eg Àràw ywy rehe har wanehe kury
13 Na'aw ze'eg Àràw wakutyr har xe nehe kury:
Teko Nenà izuapyapyr wà,
zauxiapekwer wanuwi uzàwehem ma'e kwer wà, uzapo uker haw ywyxiguhu rehe wà, ta'e ukyze wà xe.
14 Tema tawhu pe wiko ma'e wà, pepytywà Nenà izuapyapyr pe wà nehe.
Pemono 'y wanupe nehe. Pemono temi'u wanupe nehe.
15 Ta'e uzàwehem oho waiko zeàmàtyry'ymawhu teko tetea'u wazuka haw wi wà xe.
Uzeagaw wàmàtyry'ymar wanuwi uhemaw rehe wà.
Wàmàtyry'ymar ipuruzuka wer Nenà izuapyapyr wanehe utakihepuku pupe wà,
uwyrapar pupe wà no, u'yw pupe wà no.
16 Tupàn hezar uze'eg ihewe a'e.
— Xe wi pitài kwarahy ipaw 'ym mehe we teko Kenar izuapyapyr wakàgaw upaw putar wanuwi nehe. 17 Xo màràmàràn upuruzywà ma'e Kenar izuapyapyr wikuwe putar a'e 'ar mehe wà nehe. Ihe Tupàn Tuweharupi Wiko Ma'e Ikàg Wera'u Ma'e Izaew wazar amume'u ko ze'eg kwez ihe kury.