23
Tupàn uze'eg Xir pe har wanehe, Xitom pe har wanehe no
1 Tupàn umume'u putar Xir tawhu rehe uzepyk àwàm xe a'e nehe kury.
Pezai'o nehe, kanuhu pupe har yryhu myter pe har wà,
ta'e zauxiapekwer weityk Xir tawhu ikaika pà wà xe.
Naheta kwaw ni pitài tàpuz heityk 'ym pyrer. Umumaw kanuhu wapytu'u haw wà no.
Xip yrypypo'o pe peneko mehe penu Xir heityk awer imume'u haw.
2 Pekuhem pezemumikahy haw rupi nehe, yryhu iwyr har wà,
Xitom tawhu pe har ma'eme'egar wà.
Wata ma'e nerehe we har wahaw yryhu a'e wà.
3 Weruata kanuhu yryhu uhua'u ma'e wanehe wà.
Werur arozràn Niru yrykawhu wi Ezit ywy rehe har wi wà.
Peme'eg a'e arozràn ywy nànànar wanupe.
Pemono'og temetarer tetea'u ime'eg mehe nehe.
4 Pemaranugar nehe, Xitom tawhu pe har wà.
Pemaranugar nehe, Xir tawhu ikàg ma'e yryhu iwyr har pe har wà,
ta'e nezewe uze'eg yryhu a'e xe.
— Nahememyrahy pixik kwaw kuzà ài ihe. Nahememyrzexak kar pixik kwaw nehe no.
Namuzehu kar pixik kwaw hememyr wà, i'i yryhu.
5 Teko Ezit ywy rehe har uzemumikahy putar ukyze pà wà nehe,
Xir tawhu pe uzeapo ma'e kwer ikwaw mehe wà nehe.
6 Peni ywy rehe har wà. Pezai'o wahyhaw rupi nehe.
Pezàwehem Epàn ywy kutyr nehe.
7 Tawhu Xir her ma'e hurywete ma'e kwehe mehe iapo pyrer a'e,
uzeityk kar kwez amo tuwihawete pe kury.
A'e tawhu omono kar wa'yr
ywy muite har wanupe weko haw wapo kar pà wanupe wà.
8 A'e tawhu a'e, ikàg a'e.
Ima'eme'egar wiko tuwihawete ta'yr ài wà.
Ima'eme'egaw wazar uzemuawate kar teko ywy nànànar wanupe wà no.
Mo umume'u ko iaiw paw Xir tawhu pe iapo pyràm.
9 Tupàn Tuweharupi Wiko Ma'e Ikàg Wera'u Ma'e umume'u a'e ma'e iapo pyràm a'e.
Iporo'ok wer wiko wera'u ma'e wakàgaw rehe wanuwi a'e.
Ipurumuigo wer ikàg ma'e ywy nànànar wanehe ikàg 'ym ma'e romo wà.
10 Epàn ywy rehe har wà, Niru iwyr har utym ma'e yrykawhu iwyr rehe wà.
Nezewegatete pezutym ma'e peywy rehe nehe no, ta'e zauxiapekwer weityk kanuhu wapytu'u haw peneko awer pe har a'e wà xe.
(Kanuhu noho kwaw a'e pe wà kury.
Teko nuiko kwaw a'e pe wà kury no).
11 Tupàn Tuweharupi Wiko Ma'e upir opo yryhu rehe uzepyk pà:
weityk tuwihawete upuner ma'e wà.
— Pemumaw tawhu upuner ma'e Peni ywy rehe har pe wà nehe, i'i amo wanupe.
12 Uze'eg nezewe Xitom pe.
— Tawhu uzemumikahy ma'e. Tawhu ma'erahy tetea'u ipuraraw par.
Epytu'u nerurywete re nehe.
Aze neinuinuromo har uzàwehem oho Xip yrypypo'o pe wà nehe,
nezewe rehe we nuhem kwaw hezepyk àwàm wi wà nehe, i'i Xitom tawhu pe har wanupe.
13 Peme'e 'aw tawhu rehe nehe. Zauxiapekwer weityk ko tawhu wà. Nan kwaw Axir a'e tawhu pàrirogawaiha rehe uzeupir haw iapo har wà. Mawiron uzapo wà. Uzapo uzeupir haw tawhu izywyr wà. Wixe tawhu pupe wà: weityk tàpuz ikàg ma'e paw wà. Umuaiw tàpuz tawhu pupe har paw wà no. 14 Pezai'o nehe, kanuhu pupe har yryhu myter pe har wà. Zauxiapekwer weityk Xir tawhu imumaw pà wà. Naheta kwaw pepytu'u katu àwàm peme kury, pekanuhu wanupe no. 15 Uhem amo 'ar nehe. A'e 'ar henataromo teko paw umumaw putar 70 kwarahy Xir tawhu wi uweharaz pà wà nehe. Tuwihawete umumaw 70 kwarahy wiko pà a'e wà. A'e rupi 70 kwarahy ipaw ire Xir wiko putar kuzàwyzài ài nehe. Amo zegar haw uze'eg nezewe a'e, kuzàwyzài rehe a'e:
16 — O kuzàwyzài, teko paw heharaz newi wà.
Epyhyk newioràwiràn nehe. Eata tawhu pupe nezewyzewyr pà nehe.
Emupu newioràwiràn zegar haw ipuràg ma'e imuzàg pà nehe.
Emuzàg nezegar haw nehe.
Nezewe mehe teko paw ima'enukwaw wi putar nerehe wà nehe, i'i a'e zegar haw.
17 A'e 70 kwarahy pawire Tupàn Tuweharupi Wiko Ma'e ima'enukwaw wi putar Xir tawhu rehe nehe. Uzewyr putar kuzàwyzài romo wiko pà nehe. Uzeme'eg wi putar teko ywy nànànar wanupe nehe. 18 Wemetarer imono'og pyràm omono putar Tupàn Tuweharupi Wiko Ma'e pe nehe. Nupuner kwaw a'e temetarer ipyhyk pà uzeupe nehe. Tupàn Tuweharupi Wiko Ma'e imuwete katu har upyhyk putar wà nehe. Ume'eg kar putar temi'u tetea'u wà nehe. Ume'eg kar putar kamir hekuzar katu ma'e wà nehe. Ume'eg kar putar topoz hekuzar katu ma'e wà nehe no.