59
Tupàn uzepyk ikatu 'ym ma'e iapo har wanehe
1 — Tupàn Tuweharupi Wiko Ma'e weityk ukàgaw kwehe arer a'e kury, peze ru'u peiko pezeupeupe.
— Nupuner kwaw zanepyro haw rehe kury, peze peiko.
— Nupuner kwaw ma'e henu haw rehe. Nupuner kwaw zanerenu haw rehe, peze peiko.
2 Nan. Penemiapo kwer ikatu 'ym ma'e pemunyryk penereko Tupàn pezar wi.
Pekatu 'ymaw umuzeàmim kar Tupàn pewi.
A'e rupi nuwazar kwaw izupe peze'egaw peme a'e.
3 Heta tuwykwer pepo rehe.
Pepo ipiw penemiapo kwer iaiw ma'e rehe.
Xo temu'emaw imume'u haw zo pekwaw.
Tuweharupi pezuru umume'u iaiw ma'e.
4 Napeho kwaw tuwihaw wanenataromo ze'eg azeharomoete har imume'u pà wanupe, ze'eg azeharomoete har imume'u kar pà wanupe.
Napemume'u kwaw ze'eg azeharomoete har tuwihaw wanupe.
Teko paw uzeruzar temu'emaw rehe wà, ze'eg azeharomoete har 'ym ma'e rehe wà.
Aze amo hemu'em wà, uzeruzar ize'eg rehe wà. Ima'enukwaw ikatu 'ym ma'e wemiapo ràm rehe wà. Uzapo iaiw ma'e puruzuka pà wà, purupe ma'erahy ipuraraw kar pà wà.
5 Ikatu 'ym ma'e iapo àwàm imume'u haw nuzawy kwaw mozaiw hupi'a:
Hupi'a i'u har umàno.
Aze amo hupi'a uzeka,
uhem amo mozaiw izuwi.
Wanemiapo putar àwàm iaiw.
Nuzawy kwaw zanu ikyhaw.
6 Na'ikàg kwaw pàn ài. Napepuner kwaw imuywykaw rehe kamir romo iapo haw rehe.
Teko nupuner kwaw imunehew paw rehe kamir ài wà.
Penemiapo paw na'ikatu kwaw.
Iaiw tuwe penemiapo kwer paw rupi.
7 Pezàn peho ikatu 'ym ma'e iapo pà.
Na'arewahy pezuka teko ikatu 'ym ma'e iapo 'ymar peho pe wà.
Xo ma'erahy amo wanupe penemipuraraw rehe pema'enukwaw.
Wyzài taw rupi wyzài ywy rehe pekwaw mehe pezuhazuhaw ma'e paw rupi. Pemono iaiw paw a'e pe paw rupi no.
8 Napekwaw kwaw pe zeàmàtyry'ym 'ymaw piar.
Penemiapo paw upuraraw kar ikatu 'ymaw purupe.
Peho wer pe ikatu 'ym ma'e rupi.
A'e rupi naheta kwaw pepyro àwàm nehe.
Teko umume'u wemiapo kwer ikatu 'ym ma'e a'e wà
9 Tupàn nazanepyro kwaw a'e rihi, ta'e xiapo ikatu 'ym ma'e zaiko zane xe.
A'e rupi iàrew zanepytywà àwàm iko.
Xikar tatainy. Xo pytunaw zo xixak.
Xikar ma'e hexak katu haw. Zaiko we pytunaw rehe zane rihi.
10 Zapokok zaha zaiko pàrirogaw rehe hehàpyhà 'ym ma'e ài zane, heha 'ym ma'e ài zane.
Kwarahy wamyter pe hin mehe zazepyapi zane.
Nuzawy kwaw pyhaw zaneata haw zanewe.
Zanetua'u mehe zanehya'u mehe zaiko umàno ma'e kwer ài.
11 Zakororo zàwàruhu uruxu her ma'e imukuhem kar pyrer ài zane.
Zanekuhem pykahu ài no.
Xiàro zanepyro àwàm. Iàrew tuwe a'e.
Xiputar zanepytywà àwàm. Muite hekon zanewi a'e.
12 Ikatu 'ym ma'e tetea'u uruzapo nekutyr, Tupàn.
Ureremiapo kwer umume'u urekatu 'ymaw.
Nurupuner kwaw ureaiw paw wi urereharaz haw rehe.
Urukwaw ikatu 'ym ma'e iapo har romo urereko haw.
13 Nuruiko kwaw nerehe uzeruzar katu ma'e romo. Urupytu'u neze'eg heruzar ire.
Urutyryk newi, urezar.
Uruze'eg ikatu 'ym ma'e iapo haw rehe. Uruze'eg neze'eg heruzar 'ymaw rehe no.
Urumume'u amogwer wanupe ureremu'em àwàm.
14 Urumunyryk kar ikatu haw urezewi.
Ikatu ma'e iapo haw uruityk.
Ze'eg azeharomoete har uzepyapi oho iko tuwihaw wanenataromo.
Imunar 'ymaw temu'em 'ymaw nuhem pixik kwaw tuwihaw wanenataromo.
15 Ze'eg azeharomoete har ukàzym a'e.
Pepuraraw kar ma'erahy peiko imunar 'ymaw rehe uzeagaw ma'e wanupe.
Tupàn upyro wemiaihu wà
Katu haw uhem pewi a'e. A'e rupi peneko haw iro Tupàn pe a'e.
16 Ipytuhegatu
wemiaihu wapytywà har heta 'ymaw hexak mehe.
A'e rupi ukàgaw rupi weityk waàmàtyry'ymar wà.
Tupàn Ikatuahy Ma'e romo hekon a'e,
a'e rupi weityk wà.
17 Tupàn Tuweharupi Wiko Ma'e umunehew ukatu haw uzekutukaw wi imimaw romo.
Omono upurupyro haw wàkàg rehe har romo u'yw wi uzeàmim pà.
Purehe uzepykaw umunehew ukamirpuku romo.
Purupe wikwahy haw nuzawy kwaw kamir iànàm ma'e izupe no.
18 Uzepyk putar teko ikatu 'ym ma'e iapo har wanehe pitàitàigatu nehe.
Wikwahy haw rupi uzepyk putar wàmàtyry'ymar wanehe nehe.
Teko ywy muitea'u har upuraraw putar izepykaw wà nehe, wemiapo kwer rupi katete wà nehe.
19 Teko ywy nànànar wà nehe, kwarahy hemaw kutyr har wà nehe, kwarahy heixe haw kutyr har wà nehe no,
ukyze putar Tupàn Tuweharupi Wiko Ma'e wi wà nehe, ipuner haw wi wà nehe no.
Ta'e ur putar 'y tyhu uwyrykahy ma'e ài nehe xe.
Nuzawy kwaw ykotok ywytuaiw hemiraha nehe.
20 Tupàn Tuweharupi Wiko Ma'e uze'eg nezewe.
— Azur putar Xiàw pe purupyro ma'e romo nehe.
Apyro putar heremiaihu ihe wà nehe, wemiapo kwer rehe uzemumikahy ma'e ihe wà nehe, i'i Tupàn.
21 Tupàn Tuweharupi Wiko Ma'e uze'eg wemiaihu wanupe.
— Na'aw heze'eg àwàm penehe we heremiapo katu ràm xe kury. — Herekwe peme heremimono kwer a'e nehe, hepurumu'e haw peme heremimur kwer a'e nehe no, upyta putar pepyr tuweharupi a'e wà nehe. Pemu'e putar pena'yr a'e ze'eg rehe nehe, ko 'ar rehe nehe, tuweharupi nehe no. Ihe Tupàn Tuweharupi Wiko Ma'e aze'eg kwez kury.