1 Aze mo eremu'i ywak, aze mo erewezyw, ikatuahy mo urewe.

Aze mo eremuryryryryz kar ywytyruhu nerenataromo, ikatu mo urewe.

2 Nuzawy iwer mo 'y

tata hakuahy ma'e i'aromo upupur ma'e.

Neàmàtyry'ymar ukwaw mo nepuner haw wà.

Uryryryryz mo ukyze haw rehe nerenataromo wà.

3 Ikatuahy ma'e purumupytuhegatu kar haw iapo mehe,

ma'e ureremiàro 'ym iapo mehe,

erewezyw ywak wi ne.

Ywytyruhu uryryryryz nerenataromo wà.

4 Teko nuexak pixik kwaw amo tupàn wà.

Nuenu pixik kwaw amo tupàn rehe ze'egaw wà. Xo ne zo nerexak a'e wà. Xo ne rehe ze'egaw zo wenu wà.

Ni amo tupàn nuexak kar kwaw ikatu ma'e weruzar har wanupe ne ài wà.

5 Eremuawyze ikatu ma'e urywete haw rehe iapo har ne wà.

Eremuawyze teko ne wà, aze wiko neremimutar rehe tuweharupi wà.

Erekwahy urewe. Nezewe rehe we uruzapo wi wi ikatu 'ym ma'e uruiko.

Aze uruata wi nerape kwehe arer rupi nehe, xo a'e mehe zo urepyro putar pe nehe.

6 Ure paw uruiko ikatu 'ym ma'e romo nerenataromo.

Ureremiapo kwer ikatu ma'e nuzawy kwaw urekamir izipiw ma'e.

Uruiko ma'e huwer uxinig ma'e kwer ài.

Ureremiapo kwer ikatu 'ym ma'e

urereraha muite ywytuaiw ài.

7 Naheta kwaw newe uze'eg ma'e wà.

Ni amo nuekar kwaw upytywà àwàm nerehe wà.

Erezeàmim urewi.

Erepuir urewi, ta'e uruzapo ikatu 'ym ma'e tetea'u ure xe.

8 Nezewe rehe we, o Tupàn Tuweharupi Wiko Ma'e, ereiko ureru romo ne.

Uruiko ywyzuwa romo. Ereiko ywyzuwa ima'ema'e har romo ywy'a iapo har romo.

Ureapo pe upaw rupi ne.

9 Epytu'u nekwahy re urewe nehe, O Tupàn, nema'enukwaw zo ureremiapo kwer ikatu 'ym ma'e rehe tuweharupi nehe.

Uruiko neremiaihu romo.

Nereharaz zo urereko haw wi nehe.

10 Tawhu ikatuahy ma'e neremiaihu waneko awer uzeapo ywyxiguhu romo wà.

Zauxiapekwer weityk Zeruzarez wà.

Ywytyr Xiàw rehe naheta kwaw teko wà.

11 Tata umumaw

neràpuzuhu uremyter pe har ikatu ma'e ipuràg eteahy ma'e.

Ureipy nemuwete katu ipupe wà.

Tata umumaw neràpuzuhu.

Zauxiapekwer umuaiw ma'e ureremiamutar kwer paw wà.

12 Erexak a'e ma'e paw, O Tupàn Tuweharupi Wiko Ma'e.

Aipo nerezapo kwaw ma'e nehe.

Aipo nereze'eg kwaw nehe.

Aipo erezepyk wiwi putar urerehe nehe.