66
Tupàn imuwete mua'u har wà
1 Uze'eg Tupàn Tuweharupi Wiko Ma'e.
— Ywak wiko herenaw romo.
Ywy wiko hepy imupytu'u haw romo.
Aipo pepuner tàpuz herereko haw iapo haw rehe.
Aipo pepuner hepyta haw iapo haw rehe.
2 Ihe ae azapo ywak ihe. Azapo ywy ihe no.
Aiko ma'e paw wazar romo no.
Nezewe rehe we azekaiw hemetarer 'ym ma'e wanehe. Azekaiw katu wemiapo kwer ikatu 'ym ma'e rehe uzemumikahy ma'e wanehe no.
Hewi ukyze ma'e wanehe no, heze'eg heruzar har wanehe no.
3 Nezewe rehe we heta we tapi'ak awa ma'ea'yr hapy haw rehe izuka har wà.
Uzuka awa wà no.
Heta àràpuhàràn hawitu ma'e izuka har wà no.
Uzuka zawar wà no.
Heta arozràn ihewe imur har wà.
Umur tàzàhuràn huwykwer ihewe wà no.
Heta yhyk hyàkwegatu ma'e herenataromo imunykar wà no.
Amo umuwete ma'e hagapaw wà no.
Agwer teko uzapo wemimutar wà.
Wanemiapo hemuhuhuk kar har ikatu wanupe.
4 A'e rupi — Apuraraw kar putar ma'erahy wanupe nehe.
Ukyze hezepykaw wi wà. Amono putar a'e hezepykaw wanehe ihe nehe,
ta'e ainoz ihe wà xe. Ni amo nuwazar kwaw heze'eg ihewe wà.
Aze'eg wanupe. Ni amo nuzekaiw kwaw herehe wà.
Nan. Uzapo iro ma'e ihewe wà.
Wexaexak hemuikwahy kar haw wà,
i'i.
Zepykaw, zepyro haw no
5 Teko Tupàn Tuweharupi Wiko Ma'e wi ukyze ma'e a'e wà, heruzar har a'e wà,
pezeapyaka katu ize'eg rehe nehe.
Tupàn Tuweharupi Wiko Ma'e uze'eg nezewe peme.
— Peywy rehe har na'iakatuwawahy kwaw penehe wà.
Napekatu kwaw wanupe pe no, ta'e pezeruzar tuwe herehe xe.
Uze'eg nezewe peme wà.
— Tuwe Tupàn Tuweharupi Wiko Ma'e ur wapyro pà nehe.
Nezewe mehe urexak putar wanurywete haw nehe, i'i wà.
A'e teko imaranugar putar wà nehe.
6 Pezeapyaka katu wànoànog ma'e tawhu pupe har rehe nehe,
tàpuzuhu pupe har nehe no.
Tupàn Tuweharupi Wiko Ma'e wànoànog iko a'e,
wàmàtyry'ymar wanehe uzepyk pà a'e, ta'e wiko ikatu 'ym ma'e iapo har romo a'e wà xe.
7 Aipo kuzà imemyrxak kar umemyrahy 'ym mehe we.
Aipo upuner umemyrxak kar haw rehe hahy haw ipuraraw 'ym pà.
8 Agwer ma'e nuzeapo kwaw. Ni amo nuexak kwaw agwer ma'e izeapo haw wà.
Aipo teko umumaw xo pitài 'ar zo amo ywy rehe uzemono'og pà, wiko pà wà.
Aipo na'arewahy teko uzeapo amo ywy rehe wiko ma'e romo wà.
Nan. Nezewe rehe we uzeapo Xiàw pe.
Umemyrahy 'ym mehe we na'arewahy imemyrzexak kar a'e.
Uzexak kar imemyr wà.
9 Ihe imemyrahy haw ipuraraw kar har romo aiko ihe.
Aipo namuzexak kar kwaw imemyr ihe wà nehe.
Ihe Tupàn Tuweharupi Wiko Ma'e pezar ihe, ko ma'e imume'u har romo aiko ihe.
10 Zeruzarez tawhu iamutar katu har paw wà,
penurywete hehe we nehe.
Pemuzàg hekatu haw rehe zegar haw nehe.
Hehe uzai'o ma'e wà,
penurywete Zeruzarez rehe we nehe.
11 Nuzawy kwaw kuzà umemyr imukamu har a'e.
Omono putar wemetarer peme nehe. Omono putar uma'e hekuzar katu ma'e peme nehe no.
Uhyk putar peme nehe.
12 Ihe Tupàn Tuweharupi Wiko Ma'e amume'u ko ma'e Zeruzarez pe har wanupe ihe:
Hemetarer katu ma'e ài peneko haw ur putar peme yrykawhu ài nehe.
Temetarer ywy nànànar ur putar peme nehe no, hekuzar katu ma'e ywy nànànar ur putar peme nehe no,
'y tyhu ma'e uwyrykahy ma'e ài nehe.
Na'e Zeruzarez wiko putar pehy ài nehe.
Pemukamu putar nehe.
Peneraha putar uzywa rehe nehe.
Upuxi'awar rehe pepyhyk putar peamutar katu pà nehe no.
13 Kuzà umurywete kar umemyr izemumikahy mehe,
nezewegatete apumurywete kar ihe nehe no.
Apumurywete kar Zeruzarez pe nehe no.
14 A'e ma'e izeapo haw hexak mehe nehe,
penurywete putar nehe. Pekàg wi putar
ka'a hezuz katu ma'e ài nehe.
Ihe Tupàn Tuweharupi Wiko Ma'e azekaiw heremiruze'eg wanehe ihe. Pekwaw putar hezekaiw paw nehe.
Hekwahy mehe azepyk heàmàtyry'ymar wanehe,
i'i Tupàn.
15 Tupàn Tuweharupi Wiko Ma'e ur putar tata ipyteromo nehe.
Hemirur ywyramawa zeàmàtyry'ymawhu pe har nuzawy kwaw ywytuhu wà.
Ur putar wekwahy haw heityk pà wàmàtyry'ymar wanehe nehe.
Wanehe uzepykaw nuzawy kwaw tata heny kwer nehe.
16 Tupàn Tuweharupi Wiko Ma'e uzepyk putar ywy nànàn
tata pupe nehe, takihepuku pupe nehe no.
Uzuka putar teko ywy rehe har tetea'u a'e wà nehe no.
17 Tupàn Tuweharupi Wiko Ma'e uze'eg kury.
— Amo teko uzemukatu a'e wà, ma'e tetea'u iapo pà uzekwaku pà a'e wà. A'e re wixe xaxeto rupi ma'etymaw imonokatu pyrer pe wà. A'e teko u'u tàzàhuràn ho'o kwer wà no. U'u aguza wà. U'u amo temi'u ihewe ikatu 'ym ma'e wà no. Azuka kar putar a'e teko ihe wà nehe, 18 ta'e akwaw wanemiapo ihe xe. Akwaw wama'enukwaw paw no. — Azur putar ywy nànànar paw teko paw wamono'og kar pà ihe nehe. Ur putar wà nehe. Wexak putar hekatu haw heny haw wà nehe. Wexak putar hepuràg eteahy haw heny haw wà nehe no. 19 Amono putar amo hepuner haw hexak kar haw wamyter pe ihe nehe. Amo wikuwe wi wi putar wanemiapo kwer imume'u re wà nehe. Amono kar putar amo a'e teko ywy muitea'u har wanupe ihe wà nehe. A'e teko muite har nuenu pixik kwaw hereko haw imume'u haw wà. Nuexak pixik kwaw hepuner haw wà. Amono kar putar Epàn ywy rehe wà nehe, Iriw ywy rehe wà nehe no, Iri ywy rehe wà nehe no. Heta u'yw pupe ma'e izywà katu haw ikwaw par a'e ywy rehe wà. Oho putar Tumaw ywy rehe wà nehe no, Kere ywy rehe wà nehe no. Umume'u putar hepuner haw uhua'u ma'e oho ywy nànànar wanupe wà nehe. 20 Werur putar peywy rehe arer paw wà nehe, ihewe imur pyràm romo wà nehe. Ur putar heywytyr imonokatu pyrer Zeruzarez pe har pe wà nehe. Ur putar ma'ea'yr waku'az wà nehe: kawaru wà, kawaràn wà, kamer wà. Ur putar ywyramawa pupe wà nehe no, ywyramawa pixika'i ma'e pupe wà nehe no. Izaew werur arozràn kawaw imukatu pyrer pupe ihewe imur pyràm romo wà. Werur putar uiwy rehe arer ihewe nezewegatete wà nehe no. 21 Aexaexak putar amo ihe wà nehe, Xaxeto romo wamuigo kar pà ihe wà nehe. Amo amuigo kar putar Erewi izuapyapyr romo ihe wà nehe no.
22 Uze'eg Tupàn Tuweharupi Wiko Ma'e:
Azapo putar ywak ipyahu ma'e ihe nehe,
ywy ipyahu ma'e ihe nehe no.
Nupaw pixik kwaw wà nehe. Upyta putar wenaw rehe hepuner haw rupi tuweharupi wà nehe.
Nezewegatete pener nukàzym pixik kwaw wà nehe.
Tuweharupi heta putar pezuapyapyr wà nehe.
23 Mynykaw zahy ipyahu mehe har nànàn nehe,
mytu'u haw 'ar nànàn nehe,
teko ywy nànànar ur putar hemuwete katu pà heràpuzuhu pupe wà nehe.
24 A'e re uhem putar tawhu wi umàno ma'e kwer wanetekwer
wanexak pà wà nehe.
Umàno a'e teko wà,
ta'e upytu'u hereruzar ire wà xe.
Amirikur a'e teko wanetekwer i'u har numàno pixik kwaw wà nehe.
Tata a'e teko wanapy har nuwew pixik kwaw nehe no.
Wikuwe ma'e paw ihuhuk wer putar wanexak mehe wà nehe.
Ihe Tupàn Tuweharupi Wiko Ma'e aze'eg kwez ihe kury.
Upaw.