2
Izaew weruzar Tupàn ize'eg wà
1-2 Tupàn Tuweharupi Wiko Ma'e hemur kar a'e. — Emume'u ko heze'eg Zeruzarez tawhu pe har paw nehe.
— Heremiaihu, hema'enukwaw 'ar kwàkwàmo romo nereko mehe har rehe ihe.
Ereruzar tuwe heze'eg hereityk 'ym pà.
Heamutar katu pe uzereko romo ma'e kwer ài zanereko mehe.
Ereho heraikweromo ywyxiguhu rupi. Hema'enukwaw peho awer rehe.
Ereho heraikweromo ywy rehe ma'etymaw heta 'ymaw pe no.
3 Teko Izaew izuapyapyr wà, peiko heremiaihu romo a'e 'ar mehe.
Napezawy kwaw arozràn
izypy mehe ipo'o pyrer
ihewe imur pyrer.
Aze amo upuraraw kar ma'erahy newe, azepyk wanehe.
Amu'ar kar ikatu 'ymaw wanehe no. Ihe Tupàn Tuweharupi Wiko Ma'e aze'eg kwez kury, i'i ihewe.
Izaew izuapyapyr wanemiapo kwer ikatu 'ygwer
4 Zako izuapyapyr wà, teko Izaew waànàm wà no, peinu katu Tupàn Tuweharupi Wiko Ma'e ize'eg nehe kury. 5 Nezewe uze'eg iko.
— Ma'e ikatu 'ymaw peipy wexak herehe wà.
Màràzàwe tuwe hereityk wà.
Umuwete tupàn a'ua'u ma'e iapo 'ymar wà.
A'e ae uzeapo ikatu ma'e iapo 'ymar romo wà.
6 — Ikatu 'ym ma'e, i'i ihewe wà.
Nezewe rehe we aiko Ezit ywy wi wamuhem kar arer romo ihe.
Araha ywyxiguhu rehe ihe wà.
Heta tetea'u ywytyr a'e ywy rehe. Heta tetea'u iàpy'àmahy haw a'e ywy rehe no.
Naheta kwaw 'y a'e ywy rehe. Na'ikatuahy kwaw teko wanupe.
Ni amo nuwata kwaw a'e ywy rehe wà.
Ni amo nuiko kwaw a'e pe wà.
7 Arur ywy ikatu ma'e rehe ihe wà.
— Uzutym putar ma'e wà nehe, u'u putar wemipo'o kwer wà nehe, a'e wanupe.
U'u putar ma'e a'e ywy rehe har ikatu wera'u ma'e wà nehe no.
Nezewe rehe we ur
heywy imuaiw pà wà.
Uzapo ywy heremimono kwer purumuhuhuk kar haw romo wà.
8 Xaxeto nupuranu kwaw uzehezehe wà.
— Ma'e pe hekon Tupàn Tuweharupi Wiko Ma'e, ni'i kwaw wà.
Heze'eg rehe uzekaiw ma'e nahekwaw kwaw wà.
Ywy pehegweruhu rehe har wanuwihaw heàmàtyry'ym wà.
Heze'eg imume'u har uze'eg tupàn Ma'aw her rehe wà.
Umuwete tupàn a'ua'u wà.
Tupàn a'ua'u nupuner kwaw teko wapytywà haw rehe wà.
Tupàn umume'u wemiaihu wanemiapo kwer
9 Tupàn Tuweharupi Wiko Ma'e uze'eg a'e kury.
— Amume'u wi putar heremiaihu wanemiapo kwer ihe nehe kury.
Amume'u putar penemiapo kwer herenataromo arer nehe,
pezuapyapyr wanemiapo kwer imume'u pà ihe nehe no.
Ihe Tupàn Tuweharupi Wiko Ma'e aiko uze'eg ma'e romo ihe.
10 Peho yrypypo'o Xip her ma'e pe nehe. Kwarahy heixe haw ikutyr tuz. Pexak ma'e a'e pe har nehe.
Pemono kar amo Kenar kwarahy ihemaw kutyr har pe nehe.
Peme'egatu nehe.
Ta'e agwer ma'e nuzeapo pixik kwaw ko 'ar 'ym mehe we a'e xe.
11 Ni amo teko nomono kwaw amo ae tupàn tupànete romo wiko 'ym ma'e wà, tupàn uzar wanekuzaromo wà.
Nezewe rehe we heremiaihu omono amo ae tupàn herekuzaromo a'e wà.
Aiko wazar Upuner Wera'u Ma'e Ipuràg Wera'u Ma'e romo ihe.
Nezewe rehe we omono amo herekuzaromo wà.
Wazar ipyahu ma'e nupuner kwaw ma'e iapo haw rehe wapytywà pà wà.
12 A'e rupi ihe Tupàn Tuweharupi Wiko Ma'e ihe,
amuryryryryz kar putar ywak ko iaiw paw hexak mehe ihe nehe.
Tynehem putar kyze haw pupe nehe, pytuhegatu haw pupe nehe no.
13 Heremiaihu uzapo mokoz ikatu 'ym ma'e wà.
Aiko 'ytyzuzàmaw zàwenugar romo.
Nezewe rehe we hereityk wà.
Uhàwykàz amo 'ytyzuzàmaw hekar pà wà.
Oxorok a'e 'ytyzuzàmaw.
Te àmàn imono'og pyrer uhem wanuwi.
Izaew nuweruzar kwaw Tupàn ze'eg, a'e rupi upuraraw ma'erahy tetea'u wà
14 Tupàn Tuweharupi Wiko Ma'e uze'eg kury.
— Teko Izaew nuiko kwaw amo pe uma'ereko e ma'e romo wà.
Nuzexak kar kwaw uma'ereko e ma'e romo wà.
Màràzàwe tuwe waàmàtyry'ymar umuigo kar uma'ereko e ma'e romo wà.
15 Okororo zàwàruhu iriàw ài Izaew ikutyr wà.
Okororoahy wà.
Uzapo Izaew waiwy ywyxiguhu romo wà.
Tawhu uzeapo heityk pyrer romo wà.
Ni amo nuiko kwaw wapupe wà.
16 Azeharomoete Men pe har wà, Tapinez pe har wà no,
upin wemipyhyk kwer teko Izaew ywy rehe har wa'aw wà.
17 Teko Izaew wà,
pe ae pezapo ikatu 'ym ma'e pe.
A'e rupi a'e ma'e paw uzeapo peme.
Aiko Tupàn Tuweharupi Wiko Ma'e pezar romo ihe, hereityk pe.
Pe rupi peneraha mehe hereityk pe pe.
18 Peho putar Ezit ywy rehe 'y Niru yrykaw pupe pei'u pà nehe kury.
Ma'en peputar nezewe iapo pà ko 'ar rehe nehe kury.
Peho putar Axir ywy rehe 'y Ewparat yrykaw pupe pei'u pà nehe kury.
Ma'en peputar nezewe iapo pà ko 'ar rehe nehe kury.
19 Pekatu 'ymaw ae uzepyk putar penehe nehe.
Umume'u putar ikatu 'ym ma'e penemiapo kwer nehe, penehe uzepyk pà nehe, ta'e hereityk pe xe.
Aiko Tupàn Tuweharupi Wiko Ma'e pezar romo ihe.
Na'ikatu kwaw hereitykaw. Iro hereitykaw.
Pekwaw putar iro haw nehe kury.
Ihewi pekyze re pepytu'u haw iro a'e no. Pekwaw putar iro haw nehe no.
Ihe Tupàn Tuweharupi Wiko Ma'e Upuner Wera'u ma'e aze'eg kwez ihe kury.
Tupàn hemiaihu nupurumuwete wer kwaw hehe wà
20 Tupàn Tuweharupi Wiko Ma'e uze'eg kury.
— Teko Izaew izuapyapyr wà,
kwehe mehe pepytu'u hereruzar ire.
Napepureruzar wer kwaw herehe. Napepurumuwete wer kwaw herehe no.
Ywytyr aiha ma'e nànàn,
ywyra u'àgaw hereko har nànàn,
pe'aw kuzà wyzài wapuhe tupàn a'ua'u wamuwete pà.
21 Aputym uwà 'yw heremixamixak kwer ài,
uwà 'yw ikatu wera'u ma'e ài.
Peme'e pezehezehe nehe kury.
Uwà 'yw inem ma'e kwer romo peiko kury.
Uwà 'yw ikatu 'ym ma'e romo peiko kury.
22 Aze mo pezuhez katu zamaw tetea'u pupe,
zamaw katu wera'u ma'e pupe,
apuner penemiapo kwer ikatu 'ym ma'e izipiw haw zàwenugar hexakaw rehe a'e re no.
Ihe Tupàn Tuweharupi Wiko Ma'e aze'eg teko ihe.
23 — Nuruzapo kwaw ikatu 'ym ma'e ure, napepuner kwaw peze haw rehe.
— Nurumuwete pixik kwaw tupàn Ma'aw her ma'e ure, napepuner kwaw peze haw rehe.
Pezapo ikatu 'ym ma'e ywyàpyznaw pupe.
Pema'enukwaw katu penemiapo kwer rehe nehe. Peme'e penemiapo kwer rehe nehe.
Peiko kawaru kupewa'a kuzà imupuru'a kar haw 'ar rehe wiko ma'e ài.
Uzàn e oho iko kwe rupi a'e.
24 Peiko zumen kuzà hehaite ma'e ywyxiguhu rehe wiko ma'e imupuru'a kar haw 'ar rehe wiko ma'e ài.
Mo upuner imupytu'u kar haw rehe. Ni amo wà.
Oho putar zumen awa pe nehe.
Aze zumen awa uputar, nuekar kwaw.
A'e zumen kuzà oho izupe.
Na'arewahy zumen awa upuner a'e zumen kuzà hexakaw rehe imupuru'a kar haw 'ar rehe.
25 Teko Izaew izuapyapyr wà.
Pema'emua'u katu nehe.
Nezewe mehe napezepyapi kwaw nehe.
Ta'e peata tetea'u amo tupàn a'ua'u wanekar pà pe xe.
Pema'emua'u katu nehe.
Nezewe mehe pe'az na'ixinigahy kwaw nehe. — Nan, peze peiko.
— Nezewe rehe we aha putar tupàn a'ua'u amo ywy rehe har wanekar pà ihe nehe, ta'e azamutar katu ihe wà xe, peze peiko.
Tupàn uzepyk Izaew ywy rehe har wanehe
26 Tupàn Tuweharupi Wiko Ma'e uze'eg kury.
— Aze teko upyhyk imunar ma'e wà, imaranugar a'e. Nezewegatete teko Izaew izuapyapyr imaranugar putar wà nehe no. Pe paw rupi nehe: Penuwihawete wà, wana'yr wà, xaxeto penekuzaromo herenataromo har wà, heze'eg imume'u har pepyr har wà. 27 — Ereiko heru romo, aze amo i'i ywyra pehegwer pe wà nehe, — Ereiko hehy romo, aze i'i ita pe wà nehe, paw rupi imaranugar putar wà nehe. A'e ma'e uzeapo putar nehe, ta'e pewak pekupe hexak kar pà ihewe xe. Napewak kwaw penuwa hexak kar pà ihewe. Nezewe rehe we, ma'e zawaiw katu mehe peme nehe, pezur putar ihewe pepyro àwàm henoz tetea'u pà ihewe nehe. 28 Ma'e pe tupàn a'ua'u penemiapo kwer wanekon wà kury. Peneko haw zawaiw katu mehe nehe, tuwe tupàn a'ua'u pepyro wà nehe, aze upuner wà nehe. Zuta, tawhu nerehe har nànàn pitàitàigatu heta tupàn a'ua'u wà, i'i Tupàn. 29 Ihe Tupàn Tuweharupi Wiko Ma'e apuranu penehe ihe kury. — Aipo azapo ikatu 'ym ma'e peme. Màràzàwe tuwe pepytu'u heze'eg heruzar ire. 30 Azepyk penehe ihe. Nezewe rehe we napekatu wera'u kwaw. Napepurukwaw wer kwaw ihewe pezur àwàm rehe. Peiko zàwàruhu iriàw wikwahy ma'e ài. Pezuka heze'eg peme imume'u har wà. 31 Peinu katu ko heze'eg nehe, pe paw rupi. Teko Izaew izuapyapyr wà. Aipo aiko ywyxiguhu ài peme. Aipo aiko ywy teko wazuka har ài. Màràzàwe tuwe peze'eg nezewe. — Uruzapo putar ureremimutar ure nehe, peze peiko. — Nuruzewyr kwaw newe nehe, peze ihewe. Màràzàwe tuwe peze'eg nezewe. 32 Aipo kuzàwaza heharaz uma'e ita hekuzar katu ma'e wi. Aipo kuzà imen ma'e ràm heharaz uwa imimaw wi. Nezewe rehe we heremiaihu umumaw 'ar tetea'u ihewi weharaz pà wà. Teko nupuner kwaw a'e 'ar wapapar haw rehe wà. 33 Pekwaw katu penemiamutar wanekar haw. Te kuzà wyzài upuner a'e ma'e rehe uzemu'e haw rehe peinuinuromo wà. 34 Hemetarer 'ym ma'e ikatu 'ym ma'e iapo pixik 'ymar wà, na'imunar pixik kwaw ma'e penàpuz pe har rehe wà. Nezewe rehe we wanuwy kwer umupinipinim pekamir. Nezewe rehe we heremiaihu uze'eg nezewe wà. 35 — Nazapo kwaw ikatu 'ym ma'e ihe, i'i wà.
— Azeharomoete Tupàn Tuweharupi Wiko Ma'e nuikwahy kwaw ihewe a'e, i'i wà. Ihe Tupàn Tuweharupi Wiko Ma'e ihe, azepyk putar penehe ihe nehe. Ta'e — Nazapo kwaw ikatu 'ym ma'e ihe, peze mua'u pe xe. 36 Màràzàwe tuwe peiko e ikatu 'ym ma'e romo. Pepytu'u Axir ywy rehe pezeruzar ire. Nezewegatete pepytu'u putar Ezit ywy rehe pezeruzar ire nehe no. 37 Pezewyr Axir wi ikàg 'ym ma'e romo. Nezewegatete pezewyr putar Ezit wi pemaranugar romo nehe no. Pezeruzar amo wanehe. Ihe Tupàn Tuweharupi Wiko Ma'e aityk a'e teko ihe wà. Aze pepyta wainuinuromo nehe, napepyhyk kwaw ikatu ma'e nehe.