2
Nin taw heityk awer
1 Zauxiapekwer tetea'u uzàmàtyry'ym putar Nin tawhu wà nehe.
Pemupu'àm kar ume'egatu ma'e tàpuzaiha katu ma'e 'aromo wà nehe.
Peme'egatu pe rehe nehe no.
Penoz zauxiapekwer paw wamuwà pe wà nehe.
Pezemuàgà'ym zeàmàtyry'ymawhu heta haw rehe nehe.
2 Tupàn Tuweharupi Wiko Ma'e umuzewyr kar putar teko Izaew wakàgaw wapuràg eteahy haw wanupe nehe. Waàmàtyry'ymar weraha teko paw Izaew ywy wi wà, weraha wama'e paw Izaew ywy wi wà no. Ywy nuzawy kwaw ywyra hàkà 'ym ma'e. A'e ywy rehe har ikàg wi putar wà nehe. Wakàg àwàm nuzawy kwaw wakàg awer nehe.
3 Zauxiapekwer ur ma'e kwer werur u'yw wi purumimaw ipiràg ma'e wà.
Wakamir ipiràg no.
Uzemuàgà'ym waiko Nin tawhu iàmàtyry'ym pà wà.
Wama'e ywyramawa heny katu tata ài wà.
Kawaru uzàn ko rupi wà. Uzàn kwe rupi wà no.
4 Ywyramawa zeàmàtyry'ymawhu rehe har uzàn katu pe rupi tawhu myter romo wà.
Wahaw katu haw tawhu myter rupi wà. Ko rupi wà, kwe rupi wà.
Nuzawy kwaw tatainy imunyk pyrer wà.
Uzàn àmàn iweraw paw ài wà.
5 Izaew waàmàtyry'ymar zauxiapekwer wanuwihaw ikàg wera'u ma'e uzapo kar ma'e amogwer zauxiapekwer wanuwihaw wanupe.
Uzàn tuwihaw tawhu ipàrirogawhu pe wà.
Uzàn mehe uzemuàzààzàn wà.
Uzapo amo ma'e uzeàmimaw romo wàmàtyry'ymar wanuwi wà.
6 Uwàpytymawok yrykaw ipàrirogaw wà.
Teko tàpuzuhu pe har ukyze wera'u wà kury.
7 Zauxiapekwer weraha wazar tupàn ua'u kuzà hagapaw a'e wi wà kury.
Ixaxeto kuzà oho haikweromo uzai'o pà wà.
Ikuhem pykahu ài wà.
Ukwar upuxi'a rehe uzemumikahy haw hexak kar pà wà.
8 Teko Nin pe har uzàn a'e wi wà.
Nuzawy kwaw 'y ypaw iapo pyrer wi uhem ma'e kwer wà.
— Pepytu'u, pepytu'u, amo i'iahy purupe.
Ni amo nupytu'u kwaw uzàwehem ire wà.
9 Pepyhyk itaxig parat nehe. Peraha itazu or nehe.
Tawhu tynehem temetarer pupe a'e.
Heta tetea'u ma'e hekuzar katu ma'e xe.
10 Zauxiapekwer umumaw Nin wà. Teko paw uhem oho izuwi wà. Naheta kwaw teko a'e pe wà kury.
Wapy'a tynehem wakyze haw pupe wà.
Wapenàràg uryryryryz waiko wà.
Wanuwa xigatu wakyze haw wi wà.
Wakàgaw uhem wanuwi upaw rupi.
11 Ma'e uzeapo tawhu pe.
Kwehe mehe nuzawy kwaw zàwàruhu iriàw wamono'ogaw.
Zàwàruhu iriàw weraha wemizuka kwer a'e pe wànàm wanupe wà.
Wiko a'e pe wa'yr wanehe we ma'e wi ukyze 'ym pà wà.
Ni amo a'e pe har numukuhem kwaw wà. Ikatu waneko haw.
12 Zàwàruhu iriàw awa uzuka amo miar a'e.
Na'e omono ho'o kwer pehegwer zàwàruhu iriàw kuzà pe, imemyr wanupe no.
Waneko haw itakwar tynehem miar umàno ma'e kwer pupe.
13 Tupàn Tuweharupi Wiko Ma'e ikàg wera'u ma'e umume'u ko ma'e iko teko Nin pe har wanupe kury.
— Aiko peàmàtyry'ymar romo ihe. Amunyk putar tata pema'e ywyramawa wanehe wanapy paw pà ihe nehe. Zauxiapekwer penehe we har umàno putar zeàmàtyry'ymawhu pe wà nehe. Pemunar teko amo ae ywy rehe har wama'e tetea'u rehe. Araha putar a'e ma'e paw pewi izo'ok pà ihe nehe. Awa peze'eg heraha har noho pixik kwaw amo ae ywy rehe wà nehe.