30
Agur ize'eg ikatu ma'e
1 Na'aw Agur Zak ta'yr ize'eg ikatu ma'e xe kury.
Tupàn nuiko kwaw herehe we a'e.
Tupàn nuiko kwaw herehe we a'e.
Ni amo nahepytywà kwaw a'e wà.
2 Naiko kwaw teko ài.
Aiko miar ài.
Nakwaw kwaw ma'e teko wazàwe ihe.
3 Nazemu'e pixik kwaw ma'e kwaw katu haw romo hereko àwàm rehe ihe.
Nakwaw kwaw Tupàn ikatuahy ma'e ihe.
4 Mo ukwaw ywak rehe har paw rupi.
Mo upyhyk ywytu opo pupe.
Mo uwàuwàn 'y pàn pupe.
Mo omono ita ywyzaw muite wera'u har rehe.
Aipo erekwaw a'e awa. Aipo erekwaw ta'yr.
5 Tupàn hemimume'u kwer paw azeharomoete har romo a'e. Aze teko uzepyro kar izupe wà, wiko wamimaw romo a'e. 6 Aze Tupàn ni'i kwaw amo ma'e nehe, — Tupàn umume'u a'e ma'e a'e, ere zo nehe. Aze ere nehe, Tupàn uzepyk putar nerehe nehe. Wexak kar putar hemu'em ma'e romo nereko haw purupe a'e nehe no.
Tupàn pe ze'egaw
7 Aenoz ko ma'e newe kury, o Tupàn. Emur mokoz ma'e ihewe hemàno 'ym mehe we nehe. 8 Ezapo kar zo heremu'emaw ihewe nehe. Hemuigo kar zo hemetarer katu ma'e romo nehe. Hemuigo kar zo hemetarer 'ym ma'e romo nehe no. Emur xo heremi'u ràm hemuigo kar àràm zo ihewe nehe. 9 Ta'e aze heta wera'u ma'e ihewe nehe, — Naputar kwaw Tupàn ihe, a'e putar ru'u newe nehe. Aze hemetarer 'ym ma'e romo aiko nehe, hemunar putar ru'u ma'e rehe nehe. Nezewe mehe arur putar maranugar haw Tupàn hezar her rehe nehe.
Amo ze'eg xirogatu ma'e
10 Eze'eg zemueteahy pixik zo uma'ereko ma'e rehe izar pe nehe. Omono putar ru'u ze'egaiw nerehe wà nehe. Erepuraraw putar ru'u iaiw paw nehe no.
11 Heta u rehe ze'egaiw imono har wà. — Hehy numur kwaw ma'e ihewe a'e, i'i e amo wà no.
12 — Aiko ikatu 'ymaw hereko 'ymar romo ihe, i'i amo uzeupe wà. Izipiw a'e rihi, ta'e nuzepuez kwaw a'e rihi xe.
13 Heta wiko wera'u ma'e wà. — Iaiw ma'e wà, i'i amo wanupe wà.
14 Amo teko imunar hemetarer 'ym ma'e wama'e rehe wà, ma'e hereko 'ymar wama'e rehe wà no. Nupurupuhareko kwaw wà.
15 Heta mokoz ta'yr tuwy kwer ipyter har wanupe wà. — Emur ihewe, emur ihewe, i'i waner wà. Heta 4 ma'e tetea'u iputar ire upytu'u 'ym ma'e wà:
16 Umàno ma'e kwer wapyta haw.
Kuzà imemyr 'ym ma'e.
Ywy uxinig ma'e kwer 'y tuweharupi iputar har.
Tata tàpuz hapy har.
17 Aze amo uze'eg urywahyahy u rehe, aze uze'eg zemueteahy uhy rehe, itua'uhez mehe ihya'uhez mehe apitaw u'u putar wano'o kwer a'e wà nehe. Zàpuun u'u putar waneha kwer wà nehe.
18 Heta 4 ma'e ikwaw pyr 'ym wà. Napuner kwaw wakwaw paw rehe ihe. Amume'u putar newe xe nehe kury:
19 Wiràhu ywak rehe uwewe ma'e.
Moz ita rehe uzemutyk ma'e.
Kanuhu yryhu rehe oho àwàm hexakar.
Awa kuzà rehe we uzeamutamutar katu haw.
20 Kuzà umen 'ym puhe oho ma'e wiko nezewe a'e: Uker umen 'ym puhe. A'e re uzahak. A'e re — Nazapo kwaw ikatu 'ym ma'e ihe, i'i uzeupe.
21 Teko ywy rehe har na'iakatuwawahy kwaw 4 ma'e rehe wà. Amume'u putar xe newe nehe kury:
22 Amo pe uma'ereko ma'e tuwihawete romo uzeapo ma'e.
Iranaiw ma'e wyzài wemi'u ràm tetea'u hereko har.
23 Kuzà na'arewahy wikwahy ma'e umen ràm hexak arer.
Uma'ereko e ma'e kuzà uzar hekuzaromo wiko ma'e kwer.
24 Heta 4 ma'ea'yr pixika'i ma'e wà. Nezewe rehe we ukwaw katu ma'e a'e wà.
25 Tahyw wà. Na'ikàg kwaw wà. Nezewe rehe we omono'og wemi'u ràm àmàkymehe wà.
26 Tapixi ka'a pe har wà. Na'ikàg kwaw a'e wà no. Nezewe rehe we omono'ono'og ita wàpuz romo iapo pà wà.
27 Tukur wà. Naheta kwaw wanuwihawete wanupe. Nezewe rehe we uzemono'ono'og pitài ma'e romo amo me oho mehe wà.
28 Tezu wà. Wyzài teko upuner wapyhykaw rehe wà. Nezewe rehe we uzexak kar te tuwihawete wanàpuz me wà.
29 Heta 4 wikuwe ma'e wà. Wata mehe teko ipytuhegatu wanexak mehe wà.
30 Zàwàruhu wà. Ikàg wera'u amo miar wanuwi a'e wà. Nukyze kwaw ma'e wi wà.
31 Àràpuhàràn wà.
Zapukaz awa wà. Wata upuxi'a hupir pà a'e wà.
Tuwihawete wemiaihu wanenataromo upu'àm ma'e.
32 Aze iranaiw ma'e romo ereiko, ereiko wera'u ru'u amo wanuwi. Eremume'u ru'u ikatu 'ym ma'e neremiapo ràm no. Aze ereiko nezewe, epytu'u nehe. Nema'enukwaw katu nehe.
33 Aze eremokotokotok ma'e kamy kwer nehe, eremuhem kar ikawer izuwi nehe. Aze amo ukwar nexi rehe nehe, umuhem kar putar neruwykwer nehe. Aze eremuikwahy kar amo nehe, neàmàtyry'ym putar a'e nehe.