1 Pezepopetek penurywete romo nehe, teko paw wà.

Pemuzàg ikatu haw rehe zegar haw Tupàn pe wahyhaw rupi nehe.

2 Tuwe teko ukyze Tupàn Tuweharupi Wiko Ma'e ywate wera'u har wi a'e wà nehe.

Wiko tuwihawete uhua'u ma'e romo a'e, ywy nànànar waneruze'egar romo a'e.

3 Tupàn weityk kar teko amo ywy rehe har zanewe a'e wà.

Weruze'eg kar teko ywy nànànar zanewe wà no.

4 Wexaexak ywy zanereko haw zanewe a'e.

Ikatuahy a'e ywy hemiaihu wanupe,

Hemiamutar katu wanupe.

5 Tupàn uzeupir oho wenaw pe.

Izeupir mehe teko uhapukaz urywete romo wà. Upy uxi'àm oho urywete haw rehe wà no.

6 Pemuzàg zegar haw Tupàn ikatu haw rehe nehe.

Pemuzàg zegar haw Zaneruwihawete pe nehe.

7 Pemume'u Tupàn ikatu haw pezegar pà nehe,

Ta'e wiko teko ywy rehe har paw wanuwihawete romo a'e xe.

8 Wapyk Tupàn wenaw ikatu ma'e rehe a'e.

Wiko teko paw wanuwihaw romo.

9 Teko wanuwihaw uzemono'og wà,

Àmàrààw izar hemiaihu wainuinuromo wà.

Tupàn wiko tuwihawete wakàgaw ywy rehe har paw wazar romo a'e.

Wiko ma'e paw teko paw wazar romo no.