1 Hurywete teko a'e wà,

Aze ni amo nupuner kwaw wanemiapo kwer ikatu 'ym ma'e imume'u haw rehe wà.

Hurywete Tupàn Tuweharupi Wiko Ma'e ze'eg heruzar har wà.

2 Hurywete hemiapo karer heruzar har wà.

Hurywete wà, aze weruzar tuwe upy'a pupe wà.

3 Hurywete ikatu 'ym ma'e iapo 'ymar wà.

Hurywete Tupàn hape rupi wata ma'e wà.

4 Eremur neze'eg urewe.

Ereruzar kar tuwe urewe.

5 Hepureruzar wer neremiapo putar haw rehe ihe.

Hepurapo wer neremiapo putar haw rehe hepytu'u 'ym pà.

6 Aze amuwete neremiapo kar paw nehe,

Nahemaranugar kwaw nehe.

7 Nepurumu'e haw ikwaw wewer mehe nehe,

Amume'u putar nekatu haw hepy'a katu pe nehe.

8 Aruzar putar neze'eg nehe.

Etyryk pixik zo ihewi nehe.

9 Ma'e kwàkwàmo uzapo putar weko haw imonokatu pà Tupàn pe a'e.

Weruzar putar Tupàn hemiapo karer nehe.

10 Azeagaw nereruzar pà hepy'a pupe azeharomoete ihe.

Hemupytu'u kar zo pe neremiapo kar iapo re nehe.

11 Amonokatu neze'eg hepy'a pe, hehe hema'enukwaw katu pà.

Nezewe mehe nazapo kwaw ikatu 'ym ma'e nekutyr ihe.

12 Amume'u nekatu haw, o Tupàn Tuweharupi Wiko Ma'e.

Hemu'e pe neze'eg rehe nehe.

13 Tuweharupi amume'u

Neremiapo kar wahy haw rupi ihe.

14 Herurywete wera'u neremiapo kar heruzar mehe.

Ikatu wera'u ihewe temetarer tetea'u wi a'e.

15 Azemu'e neze'eg rehe.

Ame'e nepurumu'e haw rehe no.

16 Neze'eg hemurywete kar a'e.

Napytu'u kwaw neze'egaw rehe hema'enukwaw ire.

17 Hezar, aiko neremiruze'eg romo.

Herereko katu pe nehe. Nezewe mehe apuner putar hereko haw rehe nehe.

Apuner putar neze'egaw heruzar haw rehe nehe no.

18 Hemuehazawok neze'eg azeharomoete har

Ikatuahy ma'e hexak kar pà ihewe nehe.

19 Namumaw kwaw kwarahy tetea'u xe ywy rehe nehe.

Emim zo neremiapo kar ihewi nehe.

20 Hepy'a uzemumikahy heremiapo rehe hema'enukwaw pà ihe, tuweharupi,

Ta'e hepurukwaw wer neremimutar rehe ihe xe.

21 Ereze'egahy amo wanuwi wiko wera'u ma'e wanupe.

Neremiapo kar wi utyryk ma'e wiko neze'egaiw iwy pe wà.

22 Hepyro pe heàmàtyry'ymar waze'eg zemueteahy haw wi nehe, waze'eg uryweteahy haw wi nehe no,

Ta'e tuweharupi aruzar nepurumu'e haw ihe xe.

23 Aze tuwihaw uzemono'og wà nehe, aze umume'u hezuka àwàm uzeupeupe wà nehe,

Nezewe rehe we ihe neremiruze'eg ihe,

Hema'enukwaw putar neze'eg rehe ihe nehe.

24 Nepurumu'e haw rehe hema'enukwaw paw ikatu ihewe.

Hema'enukwaw paw nuzawy kwaw hereruze'egar a'e wà.

25 Hema'enukwaw paw hereityk a'e wà. Ywyw a'ar ihe.

Hemukàg wi kar neremimume'u kwer rupi katete nehe.

26 Amume'u heremiapo kwer paw rupi ihe. Erewazar heze'eg ihewe.

Hemu'e pe neremiapo kar rehe nehe.

27 Exak kar neze'eg heruzar haw ihewe nehe.

Hema'enukwaw katu putar nepurumu'e haw ikatuahy ma'e rehe nehe.

28 Hezemumikahy haw hemumaw iko a'e.

Emur nekàgaw ihewe neremimume'u kwer rupi katete nehe.

29 Hemuata kar zo pe pe ikatu 'ym ma'e rupi nehe.

Ikatu 'ym ma'e iapo haw wi hepyro pe nehe. Nekatu haw rupi hemu'e pe neze'eg rehe nehe.

30 Aruzar putar Tupàn ze'eg tuweharupi ihe nehe, a'e hezeupe kwehe mehe.

Azekaiw tuwe neremiapo putar haw rehe.

31 O Tupàn Tuweharupi Wiko Ma'e, Tuweharupi azapo ma'e nepurumu'e haw rupi ihe.

Hemumaranugar kar zo pe heretykaw rehe nehe.

32 Na'arewahy aha neremiapo kar heruzar pà ihe.

Nezewe mehe eremur putar ma'e ikwaw katu wera'u haw ihewe nehe.

33 O Tupàn Tuweharupi Wiko Ma'e, hemu'e pe nehe. Nezewe mehe akwaw putar neze'eg ihe nehe.

Nezewe mehe aruzar putar tuweharupi nehe.

34 Ekwaw kar ma'e ihewe nehe. A'e mehe aruzar putar neze'eg nehe.

Azapo putar ma'e neze'eg rupi katete herahy haw hepy'a pe nehe.

35 Exak kar herape ràm ihewe neremiapo kar ikwaw kar pà nehe,

Ta'e herurywete heruzar mehe ihe xe.

36 Ema'ereko hepy'a pe nehe. Nezewe mehe hepureruzar wer putar nepurumu'e haw rehe ihe nehe.

Nezewe mehe naputar kwaw temetarer tetea'u ihe nehe, ma'e tetea'u ihe nehe.

37 Hemuma'enukwaw kar zo pe hekuzar 'ym ma'e rehe nehe.

Nekatu ihewe neremimume'u kwer rupi katete nehe.

38 Aiko neremiruze'eg romo ihe. Ezapo ma'e ihewe neremimume'u kwer nehe.

Eremume'u a'e ma'e newi ukyze ma'e wanupe no.

39 Hepyro teko herehe uze'eg zemueteahy haw wi nehe. Hemukyze kar a'e wà.

Nerezawy kwaw teko wanemiapo kwer imume'u mehe ne.

40 Hepureruzar wer tuwe neze'eg rehe ihe.

Hemukàg wi nehe, ta'e nekatuahy ne xe.

41 O Tupàn Tuweharupi Wiko Ma'e, exak kar heamutar katu haw ihewe nehe.

Hepyro pe heàmàtyry'ymar wanuwi neremimume'u kwer rupi katete nehe.

42 Nezewe mehe akwaw putar herehe uze'eg zemueteahy ma'e waze'eg iwazar haw ihe nehe,

Ta'e azeruzar neze'eg rehe ihe xe.

43 Hepytywà pe ze'eg azeharomoete har imume'u kar pà ihewe tuweharupi nehe.

Ta'e azeruzar teko wanemiapo kwer neremimume'u rehe ihe xe.

44 Tuweharupi aruzar putar neze'eg nehe.

Azapo putar ma'e neze'eg rupi katete 'ar nànàn nehe no.

45 Aiko putar ma'erahy wi màno haw wi utyryk ma'e ài nehe,

Ta'e azeagaw nepurumu'e haw heruzar pà ihe xe.

46 Amume'u putar neremiapo putar haw tuwihawete wanupe nehe.

Nahemaranugar kwaw wanuwi nehe.

47 Neremiapo kar hemurywete kar a'e,

Ta'e azamutar katu ihe xe.

48 Amuwete neremiapo kar ihe. Azamutar katu ihe no.

Hema'enukwaw katu neze'eg rehe.

49 Aiko neremiruze'eg romo ihe.

Nema'enukwaw ihewe neremimume'u kwer rehe nehe. Àro ma'e, ta'e eremume'u a'e ma'e ne xe.

50 Ma'erahy ipuraraw mehe hemurywete kar pe ne,

Ta'e neremimume'u kwer umur wi nekàgaw ihewe xe.

51 Amo wanuwi wiko wera'u ma'e uze'eg zemueteahy waiko herehe tuweharupi wà.

Nezewe rehe we natyryk kwaw neze'eg wi ihe.

52 Hema'enukwaw, o Tupàn Tuweharupi Wiko Ma'e, neremimume'u kwer kwehe arer rehe.

Hemupytu'u kar hezai'o re.

53 Aikwahy teko ikatu 'ym ma'e

Neze'eg izuhazuhaw har wanexak mehe ihe.

54 Hereko haw ko ywy rehe har na'ipuku kwaw.

Nezewe mehe herekuwe mehe azapo zegar haw neremiapo kar ikatu haw imume'u haw ihe.

55 Pyhaw hema'enukwaw nerehe, o Tupàn Tuweharupi Wiko Ma'e.

Hema'enukwaw katu neze'eg rehe.

56 Hereko haw nànàn azapo amo ma'e ihe:

Aruzar neremiapo kar ihe.

57 Xo ne zo urereko ihe, o Tupàn Tuweharupi Wiko Ma'e. Naheta kwaw amo.

Amume'u putar ko ma'e newe kury. — Aruzar putar neze'eg nehe, a'e tuwe newe kury.

58 Hepy'a pe wahy haw rupi ainoz ko ma'e newe.

Hepuhareko pe neremimume'u kwer rupi katete nehe.

59 Hema'enukwaw tuweharupi heremiapo ràm rehe.

Amume'u ko ma'e kury. Ata putar nepurumu'e haw rupi nehe.

60 Nàro kwaw amo 'ar ihe.

Na'arewahy kutàri azeagaw neremiapo kar heruzar pà ihe.

61 Teko ikatu 'ym ma'e ipurupyhyk wer herehe wà, a'e rupi uzeagaw hepyhyk pà wà.

Nezewe rehe we naheharaz kwaw neze'eg wi ihe.

62 Apu'àm pyaze mehe nekatu haw imume'u pà ihe, ta'e nepurumu'e haw ikatuahy ihewe a'e xe.

63 Aiko newi ukyze ma'e paw wamyrypar romo ihe.

Aiko neze'eg heruzar har paw wamyrypar romo no.

64 O Tupàn Tuweharupi Wiko Ma'e, ywy tynehem nepuruamutar haw pupe a'e.

Hemu'e pe neremiapo kar rehe nehe.

65 O Tupàn Tuweharupi Wiko Ma'e, erezapo tuwe ma'e neremimume'u kwer rupi katete ne.

Ikatu ma'e romo ereiko ihewe ko 'ar rehe. Aiko neremiruze'eg romo ihe.

66 Emur ma'e kwaw katu haw ihewe nehe. Ekwaw kar ma'e ihewe nehe.

Azeruzar neremiapo kar rehe.

67 Amo 'ar mehe erezepyk herehe. A'e 'ym mehe ata pe ikatu 'ym ma'e rupi.

Ko 'ar rehe aruzar neze'eg kury.

68 O Tupàn, nekatu ne. Erezapo ikatu ma'e no.

Hemu'e pe neremiapo kar rehe nehe.

69 Amo wanuwi wiko wera'u ma'e umume'u wemu'emaw hekutyr wà.

Hepy'a pe wahy haw rupi aruzar neremiapo kar ihe.

70 Tàtàahy a'e teko upy'a pe wà. Nuzekaiw kwaw neze'eg rehe wà.

Ihe herurywete neze'eg rehe ihe.

71 Ikatuahy herehe nezepyk awer.

Nezewe mehe azemu'e neremiapo kar rehe, te akwaw ihe.

72 Ze'eg neremimur kwer ikatu wera'u temetarer ywy nànànar paw wi ihewe,

Ma'e ywy nànànar paw wi ihewe.

73 O Tupàn, heapo pe nepo pupe ne. Hemonokatu pe no.

Emur ma'e kwaw paw ihewe nehe. Nezewe mehe azemu'e putar neze'eg rehe nehe.

74 Newi ukyze ma'e hurywete herexak mehe wà,

Ta'e azeruzar neze'eg rehe ihe xe.

75 O Tupàn Tuweharupi Wiko Ma'e, akwaw neremimume'u kwer ikatu haw ihe.

Erezepyk herehe, ta'e nerepuir kwaw neremiaihu wanuwi xe.

76 Aenoz ko ma'e newe ihe. Heamutar katu pe ne. Tuwe heamutar katu haw hemupytu'u kar hezemumikahy re nehe.

Eremume'u hemupytu'u kar àwàm ihewe amo 'ar mehe. Aiko neremiruze'eg romo.

77 Hepuhareko pe nehe. Nezewe mehe aikuwe putar nehe.

Neze'eg rehe hema'enukwaw paw ikatu ihewe.

78 Tuwe amo wanuwi wiko wera'u ma'e imaranugar wà nehe,

Ta'e umume'u temu'emaw hekutyr wà xe.

Ihe ihe, hema'enukwaw putar nepurumu'e haw rehe nehe.

79 Tuwe newi ukyze ma'e ur uzemyrypar pà herehe we wà nehe.

Tuwe neremiapo kar kwaw par ur hepytywà pà wà nehe no.

80 Tuwe aruzar tuwe neremiapo kar ihe nehe.

A'e mehe nahemaranugar pixik kwaw nezewe heremiapo rehe ihe nehe.

81 O Tupàn, hepyro pe heàmàtyry'ymar wanuwi nehe.

Hekene'o hepyro àwàm hàro pà.

Azeruzar neze'eg rehe.

82 Hereha ikene'o, ta'e ume'e tetea'u iko xe.

Àro neremimume'u kwer iteko ihe xe.

Apuranu nerehe kury. — Màràn mehe erezur putar hemupytu'u kar pà hezemumikahy re nehe.

83 Xityk uwà hyru izemàner ma'e zane, ta'e na'ikatu kwaw a'e xe.

Naiko kwaw izemàner ma'e romo ihe. Naheharaz kwaw neremiapo kar wi ihe.

84 Màràn mehe apytu'u putar hàro re nehe.

Màràn mehe erezepyk putar ma'erahy ihewe ipuraraw kar har wanehe nehe.

85 Amo wanuwi wiko wera'u ma'e nuweruzar kwaw neze'eg wà.

Uzapo ywykwaruhu hepyhyk àwàm romo wà. Ipurupyhyk wer herehe miar ài wà.

86 Neremiapo kar paw ikatu wà. Teko upuner wanehe uzeruzar haw rehe wà.

Hepytywà pe nehe, ta'e hemu'em ma'e upuraraw kar ma'erahy ihewe wà xe.

87 Hezuka tària'i wà.

Nezewe rehe we naityk kwaw neremiapo kar ihe.

88 Heamutar katu pe ne. A'e rupi hepyro pe hemàno haw wi nehe.

A'e rupi apuner putar neremiapo kar heruzar haw rehe nehe.

89 O Tupàn Tuweharupi Wiko Ma'e, neze'eg nupaw pixik kwaw nehe.

Ikàgaw nuzawy kwaw ywak ikàgaw a'e.

90 Erezapo ywy. Upyta a'e pe.

Puruwi netyryk 'ymaw nuzeapo pixik kwaw amo ae ma'e romo a'e nehe. Nuzawy kwaw ywy a'e.

91 Ma'e paw upyta wenaw rehe

Neze'eg awer heruzar katu pà wà,

Ta'e ma'e paw nereruzar a'e wà xe.

92 Aze mo neze'eg nahemurywete kar iwer, amàno mo kwehe mehe ihe,

Ta'e apuraraw ma'erahy tetea'u ihe xe.

93 Naheharaz pixik kwaw nepurumu'e haw wi nehe,

Ta'e eremonokatu hereko haw nepurumu'e haw rupi ne xe.

94 Hepyro pe heàmàtyry'ymar wanuwi nehe, ta'e aiko neremiruze'eg romo ihe xe.

Azeagaw neremiapo kar heruzar pà tuweharupi ihe.

95 Ikatu 'ym ma'e wàro hezuka àwàm 'ar waiko wà.

Nezewe rehe we hema'enukwaw putar neze'eg rehe nehe.

96 Ma'e paw wakatu haw upaw putar nehe.

Neremiapo kar nupaw kwaw nehe.

97 Azamutar katu tuwe neze'eg ihe.

Amumaw 'ar katu hehe hema'enukwaw pà.

98 Neremiapo kar upyta herehe we tuweharupi.

A'e rupi akwaw wera'u ma'e heàmàtyry'ymar wanuwi ihe.

99 Akwaw wera'u ma'e hemu'e arer paw wanuwi ihe,

Ta'e hema'enukwaw nepurumu'e haw rehe ihe xe.

100 Akwaw wera'u ma'e awa tua'uhez ma'e wanuwi ihe,

Ta'e aruzar neremiapo kar ihe xe.

101 Nata kwaw pe ikatu 'ymaw piar rupi ihe,

Ta'e hepureruzar wer neze'eg rehe ihe xe.

102 Napytu'u kwaw neremiapo putar haw heruzar ire,

Ta'e hemu'e pe ne xe.

103 Neze'eg hete katu tuwe a'e.

Hete katu wera'u hàir wi.

104 Akwaw katu ma'e ihe, ta'e aruzar neze'eg xe.

A'e rupi naheakatuwawahy kwaw temu'emaw piar nànàn ihe.

105 Neze'eg nuzawy kwaw tatainy herape ràm rehe uhyape katu ma'e.

Nuzawy kwaw tatainy hereko haw rehe herape zàwenugar rehe uhyape katu ma'e.

106 Azapo putar heremimume'u kwer ihe nehe.

Aruzar putar nepurumu'e haw ikatu ma'e nehe no.

107 O Tupàn Tuweharupi Wiko Ma'e, ma'erahy heremipuraraw iaiw ihewe a'e.

Hemuigo kar wiwi pe neremimume'u kwer rupi katete nehe.

108 O Tupàn Tuweharupi Wiko Ma'e, einu heze'eg nekatu haw heremimume'u ràm nehe.

Hemu'e pe neremiapo kar rehe nehe.

109 Tuweharupi amo uzeagaw hezuka pà a'e wà.

Nezewe rehe we naheharaz kwaw neze'eg wi.

110 Teko ikatu 'ym ma'e uzapo miar zuka haw zàwenugar hepyhyk àwàm wà.

Nezewe rehe we nazuhaw kwaw neremiapo kar ihe.

111 Nepurumu'e haw nuzuawy kwaw temetarer tetea'u a'e. Areko putar tuweharupi nehe.

Umurywete kar hepy'a.

112 — Aruzar putar Tupàn hemiapo putar tuweharupi ihe nehe, a'e tuwe hezeupe.

Herekuwe mehe we napytu'u kwaw heruzar ire nehe.

113 Naheakatuwawahy kwaw nerehe uzeruzar mua'u ma'e wanehe ihe.

Azamutar katu neze'eg.

114 Ereiko hemimaw romo. Ereiko u'yw wi hemimaw zàwenugar romo no.

Eremume'u ma'e ihewe neremiapo ràm. Àro a'e ma'e iteko ihe.

115 Petyryk ihewi nehe, ikatu 'ym ma'e iapo har wà.

Aruzar putar Tupàn hezar hemiapo kar nehe.

116 Emur nekàgaw ihewe neremimume'u kwer rupi nehe. A'e rupi aikuwe wiwi putar nehe.

Àro ikatu ma'e ihewe neremiapo ràm ihe. Hemuzemumikahy kar zo pe a'e ma'e iapo 'ym pà nehe.

117 Hepytywà pe nehe. Nezewe mehe ni amo nahezuka kwaw wà nehe.

Azekaiw putar neremiapo putar haw rehe tuweharupi nehe.

118 Ereityk neze'eg heruzar 'ymar paw ne wà,

Ta'e hemu'em wemiapo ràm imume'u mehe wà xe.

119 Ereityk ikatu 'ym ma'e paw ma'e heityk pyrer ài ne wà.

A'e rupi azamutar katu nepurumu'e haw ihe.

120 Aryryryryz nerenataromo.

Akyze neremimume'u kwer wi.

121 Tuweharupi azapo ikatu ma'e iawy 'ym pà.

Hemono zo pe heàmàtyry'ymar wapo pe nehe.

122 Aiko neremiruze'eg romo. Emume'u hepytywà àwàm ihewe kury.

Emupytu'u kar amo wanuwi wiko wera'u ma'e ne wà nehe, nezewe mehe nupuraraw kar kwaw ma'erahy ihewe wà nehe.

123 Hereha ikene'o ta'e ame'e tetea'u ihe xe.

Àro tetea'u hepyro àwàm iteko ihe.

Àro neremimume'u kwer iapo àwàm no.

124 Herereko katu pe nepuruamutar katu haw rupi nehe.

Hemu'e pe neremiapo kar rehe nehe.

125 Aiko neremiruze'eg romo. A'e rupi emur ma'e kwaw paw ihewe nehe.

Nezewe mehe apuner putar nepurumu'e awer ikwaw paw rehe ihe nehe.

126 O Tupàn Tuweharupi Wiko Ma'e, aze erezapo ma'e na'arewahy nehe kury, ikatu putar nehe kury, ta'e teko nuweruzar kwaw neze'eg ko 'ar rehe wà xe.

127 Azamutar katu neremiapo kar ihe.

Ikatu wera'u ihewe itazu or wi a'e.

Ikatu wera'u ihewe or ikatuahy ma'e wi.

128 A'e rupi ata nepurumu'e awer rupi.

Temu'emaw rupi teko waata haw iro ihewe.

129 Neremiapo kar ikatuahy.

A'e rupi aruzar tuwe iteko ihe.

130 Neze'eg imume'u katu haw nuzawy kwaw tatainy herur haw purupe.

Ukwaw kar ma'e teko ma'e kwaw par 'ym wanupe.

131 Azurupeka hepytuhem pà.

Aputar neremiapo kar heruzar haw amo ma'e wanuwi upaw rupi katete ihe.

132 Ereme'egatu neamutar katu har wanehe wapuhareko katu pà.

Eme'e wi herehe nezewegatete nehe no.

133 Hemonokatu pe neremimume'u kwer rupi nehe.

Ikatu 'ymaw emuigo kar zo hezar romo nehe.

134 Hepyro pe ihewe ikatu 'ym ma'e iapo har wanuwi nehe.

Nezewe mehe apuner putar neremiapo kar heruzar haw rehe nehe.

135 Emur neze'egatu herehe nehe, herehe we nereko pà nehe.

Hemu'e pe neze'eg rehe nehe.

136 Herehaykwer uwyryk yrykawhu ài,

Ta'e amogwer nuweruzar kwaw neze'eg wà xe.

137 Nekatuahy, o Tupàn Tuweharupi Wiko Ma'e.

Neze'eg ikatuahy.

138 Nepurumu'e awer urewe neremimur kwer ikatu tuwe a'e.

Ikatuahy tuwe a'e.

139 Hekwahy haw herapy tata ài,

Ta'e heàmàtyry'ymar nuzekaiw kwaw neze'eg rehe wà xe.

140 Ikàg tuwe neremiapo ràm imume'u pyrer.

Ihe neremiruze'eg ihe, azamutar katu a'e neremimume'u kwer ihe.

141 Aiko hemetarer pixika'i ma'e romo. Teko nuzekaiw kwaw herehe wà.

Nezewe rehe we nahereharaz kwaw nepurumu'e haw wi.

142 Nekatu haw nupaw pixik kwaw nehe.

Neze'eg azeharomoete tuweharupi.

143 Azemumikahy tuwe ma'erahy ipuraraw pà ihe.

Neremiapo kar hemurywete kar a'e.

144 Nepurumu'e awer ikatu tuweharupi.

Ekwaw kar ma'e ihewe nehe. Nezewe mehe aikuwe wiwi putar nehe.

145 Hepy'a nàn ahapukaz newe.

Ewazar heze'eg ihewe nehe, o Tupàn Tuweharupi Wiko Ma'e.

Nezewe mehe aruzar putar neremiapo kar nehe.

146 Aze'eg newe hepytywà àwàm henoz pà.

Hepyro pe heàmàtyry'ymar wanuwi nehe.

A'e mehe aruzar putar neremiapo putar haw nehe.

147 Kwarahy ihem 'ym mehe we aze'eg newe hepytywà àwàm henoz pà, ta'e azeruzar neremimume'u kwer rehe ihe xe.

Àro neremiapo ràm iteko.

148 Naker kwaw.

Amumaw pytun gatu heme'e pà, ta'e hema'enukwaw katu wer neze'eg rehe ihe xe.

149 Herenu pe nehe, o Tupàn Tuweharupi Wiko Ma'e, ta'e heamutar katu pe ne xe.

Hemuigo kar wiwi nehe, aze ereputar tuwe nezewe haw nehe.

150 Teko iaiw ma'e herehe ipuruàmàtyry'ym wer ma'e uhem waiko heruwake wà.

Teko neze'eg heruzar pixik 'ymar romo wanekon wà.

151 Ne Tupàn Tuweharupi Wiko Ma'e ereiko heruwake ne.

Neremiapo kar paw azeharomoete a'e wà.

152 Kwehe akwaw nepurumu'e haw ihe.

Eremur purupe ne, ta'e neremumaw pixik kwaw nehe xe.

153 O Tupàn, eme'e ma'erahy heremipuraraw rehe nehe.

Hepytywà pe nehe, ta'e naityk kwaw neze'eg ihe xe.

154 Eityk heàmàtyry'ymar ne wà nehe, ihewi wamunyryk kar pà ne wà nehe.

Hemuigo kar wiwi pe neremimume'u kwer rupi nehe.

155 Nerepyro kwaw ikatu 'ym ma'e ma'erahy wi ne wà,

Ta'e nuzekaiw kwaw neze'eg rehe wà xe.

156 Uhua'u nepurupuhareko haw, o Tupàn Tuweharupi Wiko Ma'e.

Hemuigo kar wiwi neremimutar rupi nehe.

157 Heta tetea'u heàmàtyry'ymar wà. Heta tetea'u ihewe ma'erahy ipuraraw kar har wà no.

Ihe napytu'u kwaw neremiapo kar heruzar ire ihe.

158 Nerehe uzeruzar 'ym ma'e wanehe heme'e mehe hehuhuk wer ihe.

Ta'e nuweruzar kwaw neze'eg wà xe.

159 Eme'e herehe kury. Azamutar katu nepurumu'e awer ihe, o Tupàn Tuweharupi Wiko Ma'e.

Hemuigo kar wiwi pe nehe, ta'e heamutar katu pe ne xe.

160 Neze'eg paw azeharomoete.

Neremiapo kar ikatu. Nupaw pixik kwaw nehe.

161 Ikàg ma'e heàmàtyry'ym e a'e wà.

Amuwete neremiapo kar.

162 Herurywete tuwe neremimume'u kwer wanehe.

Herurywete temetarer tetea'u ma'e hexak arer ài ihe.

163 Temu'emaw iro ihewe. Naheakatuwawahy kwaw hehe.

Azamutar katu neze'eg.

164 Tuweharupi 7 haw amume'u nekatu haw,

Ta'e neremimume'u kwer ikatuahy a'e xe.

165 Neze'eg iamutar katu har ikàg a'e wà.

Naheta kwaw ma'e a'e teko wamu'ar kar har wà.

166 Àro hepyro àwàm heàmàtyry'ymar wanuwi ihe, o Tupàn Tuweharupi Wiko Ma'e,

Ta'e aruzar neremiapo kar ihe xe.

167 Aruzar nepurumu'e awer.

Azamutar katu tuwe nepurumu'e awer hepy'a pupe ihe.

168 Aruzar neremiapo kar. Neremiapo putar haw aruzar no.

Erexak heremiapo kwer upaw rupi.

169 Tuwe hepytywà àwàm henoz taw uhem newe nehe, o Tupàn Tuweharupi Wiko Ma'e.

Emur ma'e kwaw katu haw ihewe neremimume'u kwer rupi nehe.

170 Tuwe newe heze'egaw uhem nerenataromo nehe.

Hepyro pe heàmàtyry'ymar wanuwi

Neremimume'u kwer rupi nehe.

171 Amume'u putar nekatu haw tuweharupi nehe,

Ta'e hemu'e pe neze'eg rehe ne xe.

172 Azegar putar neze'eg rehe nehe, ta'e neremiapo kar ikatu a'e xe.

173 O Tupàn, tuwe nepo uzemuàgà'ym hepytywà pà nehe,

Ta'e aruzar neremiapo kar ihe xe.

174 O Tupàn Tuweharupi Wiko Ma'e, aputar tuwe hepytywà àwàm ihe.

Hepytywà pe nehe. Neze'eg inuromo aexak herurywete haw.

175 Hemuigo kar wiwi pe nehe, o Tupàn. Nezewe mehe apuner putar nekatu haw imume'u pà nehe.

Tuwe nepurumu'e haw hepytywà nehe.

176 Ata e aha teko àràpuhàràn hawitu ma'e ukàzym ma'e kwer ài.

O Tupàn Tuweharupi Wiko Ma'e, aiko neremiruze'eg romo ihe.

Ezur hepiaromo nehe, ta'e naheharaz kwaw neremiapo kar wi ihe xe.