Hebrew Old Testament

Micah 2

Micah

Return to Index

Chapter 3

1

ואמר שמעו־נא ראשי
יעקב וקציני בית
ישראל הלוא לכם
לדעת את־ המשפט׃

2

שנאי טוב ואהבי
רעה גזלי עורם
מעליהם ושארם מעל
עצמותם׃

3

ואשר אכלו שאר עמי
ועורם מעליהם
הפשיטו
ואת־עצמתיהם פצחו
ופרשו כאשר בסיר
וכבשר בתוך קלחת׃

4

אז יזעקו אל־יהוה
ולא יענה אותם
ויסתר פניו מהם
בעת ההיא כאשר
הרעו מעלליהם׃

5

כה אמר יהוה
על־הנביאים המתעים
את־עמי הנשכים
בשניהם וקראו שלום
ואשר לא־יתן
על־פיהם וקדשו
עליו מלחמה׃

6

לכן לילה לכם
מחזון וחשכה לכם
מקסם ובאה השמש
על־הנביאים וקדר
עליהם היום׃

7

ובשו החזים וחפרו
הקסמים ועטו
על־שפם כלם כי אין
מענה אלהים׃

8

ואולם אנכי מלאתי
כח את־רוח יהוה
ומשפט וגבורה
להגיד ליעקב פשעו
ולישראל חטאתו׃

9

שמעו־נא זאת ראשי
בית יעקב וקציני
בית ישראל המתעבים
משפט ואת כל־הישרה
יעקשו׃

10

בנה ציון בדמים
וירושלם בעולה׃

11

ראשיה בשחד ישפטו
וכהניה במחיר יורו
ונביאיה בכסף
יקסמו ועל־ יהוה
ישענו לאמר הלוא
יהוה בקרבנו
לא־תבוא עלינו
רעה׃

12

לכן בגללכם ציון
שדה תחרש וירושלם
עיין תהיה והר
הבית לבמות יער׃

Micah 4

 

 

 

Public Domain Software by johnhurt.com