5
1–22 Ko e tangi mamahi ʻa Saione, ʻi he lotu ki he ʻOtua.
‌ʻE Sihova, ke ke manatu ki he meʻa kuo hoko kiate kimautolu:
tokanga pea ke ʻafio ki homau taukae.
Kuo liliu homau tofiʻa ki he kau muli,
ʻa homau ngaahi fale ki he ʻāuhē.
Ko e kau faʻē mate mo tamai mate ʻakimautolu,
ko ʻemau ngaahi faʻē kuo hangē kuo mate ʻa honau ngaahi ʻunoho.
Kuo mau inu vai ʻi he totongi paʻanga,
ko ʻemau fefie ʻoku fakatau kiate kimautolu.
‌ʻOku māʻulalo ʻa homau kia ki he fakatanga:
ʻoku mau ngāue pea ʻoku ʻikai ha mālōlō.
Kuo mau fekuku nima mo e kau ʻIsipite,
pea mo e kau ʻAsilia, ke mau mākona ʻi he mā.
Naʻe fai angahala ʻa ʻemau ngaahi tamai, pea ʻoku ʻikai,
pea kuo mau fua ʻenau ngaahi hia.
Kuo pule ʻae kau tamaioʻeiki kiate kimautolu,
ʻoku ʻikai ha niʻihi ʻoku fakahaofi ʻakimautolu mei honau nima.
Naʻa mau maʻu meʻakai ʻi he tuʻutāmaki ʻo ʻemau moʻui,
koeʻuhi ko e heletā ʻi he toafa.
10 Naʻe ʻuliʻuli ʻa homau kili ʻo hangē ko e ngotoʻumu,
ko e meʻa ʻi he honge fakamanavahē.
11 Naʻa nau tohotoho ʻae kau fefine ʻi Saione,
ʻae kau tāupoʻou ʻi he ngaahi kolo ʻo Siuta.
12 ‌ʻOku tautau ʻae ngaahi houʻeiki mei honau nima,
naʻe ʻikai ke fakaʻapaʻapaʻi ʻae mata ʻoe kau mātuʻa.
13 Naʻa nau ʻave ʻae kau talavou ke momosi,
pea naʻe tō hifo ʻae tamaiki ʻi he lalo ʻakau.
14 Kuo ʻosi ʻae kau mātuʻa mei he matapā,
ʻae kau talavou mei he fasi hiva.
15 Kuo ʻosi ʻae fiefia ʻa homau loto;
kuo liliu ʻa ʻemau meʻe ko e mamahi.
16 Kuo tō ʻae tatā fakatuʻi mei homau ʻulu.
ʻOiauē ʻakimautolu! He kuo mau fai angahala.
17 Koeʻuhi ko e meʻa ni ʻoku vaivai homau loto;
koeʻuhi ko e ngaahi meʻa ni ʻoku nenefu homau mata.
18 Koeʻuhi ko e moʻunga ʻo Saione, ʻaia ʻoku lala pē,
ʻoku ʻaʻeva ai ʻae fanga fokisi.
 
19 ‌ʻE Sihova, ʻoku ke ʻafioʻi ʻo taʻengata,
ko ho ʻafioʻanga ʻoku mei he toʻutangata ki he toʻutangata.
20 Ko e hā ʻoku ke fakangaloʻi ʻakimautolu ʻo taʻengata,
pea mahuʻi meiate kimautolu ʻo fuoloa?
21 Fakatafokiʻi ʻakimautolu kiate koe, ʻE Sihova, pea te mau liliu moʻoni;
fakafoʻou homau ngaahi ʻaho ʻo hangē ko ia ʻi muʻa.
22 Ka kuo ke mātuʻaki liʻaki ʻakimautolu;
ʻoku ke houhau ʻaupito kiate kimautolu.