15
1 Ko e hiva ʻa Mōsese 22 ʻOku fieinu ʻae kakai. 23 ʻOku kona ʻae vai ʻo Mala. 25 ʻOku fakamelie ia ʻe he ʻakau. 27 Ko e vai moʻui ʻe hongofulu ma ua ʻi ʻElimi, mo e ʻakau ko e ponga ʻe fitungofulu.
Pea naʻe toki hiva ʻe Mōsese mo e fānau ʻa ʻIsileli ʻae hiva ni kia Sihova, ʻonau pehē,
“Te u hiva kia Sihova, he kuo ne ikuna fakamanavahē:
ko e hoosi mo ia ʻoku heka ai kuo ne lī ki loto tahi.
Ko hoku mālohi mo ʻeku hiva ʻa Sihova,
pea kuo hoko ia ko hoku fakamoʻui:
ho hoku ʻOtua ia, pea teu teuteu moʻona ʻae fale nofoʻanga;
ko e ʻOtua ia ʻo ʻeku tamai, pea te u fakahikihiki ia.
‌ʻOku toʻa ʻa Sihova ʻi he tau:
ko Sihova hono huafa.
“Ko e ngaahi saliote ʻa Felo mo ʻene kautau kuo ne lī ki tahi:
ko ʻene ngaahi ʻeikitau ongoongo kuo ne lōmakiʻi foki ʻi he tahi Kulokula.
Kuo ʻufiʻufi ʻakinautolu ʻe he loloto
naʻa nau ngalo hifo ki he kilisi tahi ʻo hangē ko e foʻi maka.
“Ko ho nima toʻomataʻu ʻe Sihova kuo ongoongolelei lahi ʻi he mālohi;
ko ho nima toʻomataʻu ʻe Sihova kuo ne laiki ke iikiiki ʻae fili.
Pea ʻi hono lahi ʻo hoʻo māfimafi kuo ke fulihi ʻakinautolu naʻe tuʻu hake kiate koe:
naʻa ke fekau atu ho houhau, ʻaia naʻa ne fakaʻauha ʻakinautolu ʻo hangē ko e veve.
Pea ʻi he mānava mālohi ʻo hoʻo fofonga, naʻe tānaki fakataha ai ʻae ngaahi vai,
naʻe tuʻu totonu ʻae ngaahi vai ʻo hangē ha ʻesi,
pea naʻe mohe ʻae loloto ʻi loto tahi.
Naʻe pehē ʻe he fili, ‘Te u tuli, te u lavaʻi, te u vahevahe ʻae koloa ʻoe vete;
ʻe mākona ʻeku holi kiate kinautolu;
teu unuhi hake ʻeku heletā, ʻe fakaʻauha ʻe hoku nima ʻakinautolu.’
10 Naʻa ke ifi ʻaki hoʻo matangi,
pea naʻe ʻufiʻufi ʻakinautolu ʻe he tahi:
naʻa nau ngalo hifo ʻo hangē ko e ukamea ʻi he loto moana.
11 ‌ʻE Sihova ko hai ʻi he ngaahi ʻotua, ʻoku tatau mo e ʻafiona?
Ko hai ʻoku hangē ko e ʻafiona, ʻoku ke nāunauʻia ʻi he māʻoniʻoni,
ʻoku ke fakamanavahē ʻi he fakamālō, ʻoku ke fai ʻae ngaahi meʻa fakaofo?
12 Naʻa ke mafao atu ho nima toʻomataʻu,
naʻe folo hifo ʻakinautolu ʻe he kelekele.
13 “Naʻe tataki atu ʻe he ʻafiona ʻi hoʻo ʻaloʻofa ʻae kakai ʻaia naʻa ke huhuʻi:
kuo ke fakahinohino ʻakinautolu ʻi hoʻo māfimafi ki ho ʻafioʻanga māʻoniʻoni.
14 ‌ʻE fanongo ʻae kakai,
pea manavahē:
ʻe pukea ʻi he mamahi ʻae kakai ʻo Filisitia.
15 ‌ʻE ofo ai ʻae ngaahi ʻeiki ʻo ʻItomi;
ʻe pukea ʻi he tetetete ʻae kau tangata mālohi ʻo Moape;
ʻe fakaʻaʻau ke ʻosi ai ʻae kakai kotoa pē ʻo Kēnani.
16 ‌ʻE tō ʻae manavahē mo e ilifia kiate kinautolu:
ʻi hono lahi ʻo ho nima te nau longo mate pe ʻo hangē ha maka:
kaeʻoua ke hoko atu ho kakai, ʻE Sihova,
ke ʻoua ke hoko atu ʻae kakai, ʻaia kuo ke fakatau:
17 Pea te ke ʻomi ʻakinautolu ki ai, ʻo tō ʻakinautolu ʻi he moʻunga ʻo ho tofiʻa,
ʻi he potu, ʻe Sihova, ʻaia kuo ke teuʻi ke ke ʻafio ki ai,
ʻi he Potu toputapu, ʻE ʻEiki, ʻaia kuo fokotuʻumaʻu ʻe ho nima.
18 ‌ʻE pule ʻa Sihova ʻo lauikuonga pea taʻengata.”
19 He naʻe ʻalu ʻae hoosi ʻa Felo mo ʻene ngaahi saliote, mo ʻene kau tangata heka hoosi ki tahi, pea naʻe toe ʻomi ʻe Sihova ʻae tahi kiate kinautolu; ka naʻe ʻalu ʻae fānau ʻa ʻIsileli ʻi he mōmoa ʻi loto tahi.
20 ¶ Pea naʻe toʻo ʻe Miliame ko e palōfita fefine ko e tuofefine ʻo ʻElone, ʻae kihiʻi lali kiliʻi manu ʻi hono nima; pea naʻe muimui ʻiate ia ʻae kau fefine kotoa pē mo ʻenau ngaahi lali mo e meʻe. 21 Pea naʻe talia ʻakinautolu ʻe Miliame, ʻo pehē,
“Mou hiva kia Sihova, he kuo ne ikuna fakamanavahē:
ko e hoosi mo ia ʻoku heka ai kuo ne lī ki tahi.”
22 ¶ Pea naʻe ʻomi ʻe Mōsese ʻa ʻIsileli mei he tahi Kulokula, pea naʻa nau ʻalu atu ki he toafa ʻo Sua; pea naʻa nau fononga ʻi he ʻaho ʻe tolu ʻi he toafa, pea ʻikai ʻilo ha vai. 23 Pea ʻi heʻenau hoko ki Mala, naʻe ʻikai te nau faʻa inu ʻae vai ʻo Mala, he naʻe kona: ko ia naʻe ui ai hono hingoa ko Mala. 24 Pea naʻe lāunga ʻae kakai kia Mōsese, ʻo pehē, “Ko e hā te mau inu?” 25 Pea naʻe tangi ia kia Sihova, pea fakahā kiate ia ʻe Sihova ʻae ʻakau, ʻaia naʻa ne lī ki he vai, pea naʻe melie ai ʻae vai: pea naʻe fokotuʻu ʻe ia ʻi ai ʻae fekau mo e tuʻutuʻuni, mo ne ʻahiʻahiʻi ʻakinautolu ʻi ai. 26 ‌ʻO ne pehē, “Kapau te ke faʻa tokanga ki he leʻo ʻo Sihova ko ho ʻOtua, mo ke fai ʻaia ʻoku totonu ʻi hono ʻao, mo ke fanongo ki heʻene ngaahi fekau, ʻo tauhi ʻene ngaahi tuʻutuʻuni, ʻe ʻikai te u ʻai kiate koe hā mahaki ʻe taha, ʻi he ngaahi mahaki, ʻaia naʻaku ʻomi ki he kakai ʻIsipite: he ko au Sihova, ʻoku ou fakamoʻui koe.”
27 ¶ Pea naʻa nau hoko ki ʻElimi, ʻaia naʻe ʻi ai ʻae luo vai ʻe hongofulu ma ua, mo e ʻakau ko e ponga ʻe fitungofulu: pea naʻa nau ʻapitanga ʻi ai, ʻo ofi ki he vai.