11
1 Ko e taʻefaʻafakafetaʻi ʻa ʻIsileli ki he ʻOtua ʻi heʻene ngaahi lelei. 5 Ko hono fakamaauʻi. 8 Ko e ʻaloʻofa ʻae ʻOtua kiate kinautolu.
1 “ʻI he kei tamasiʻi ʻa ʻIsileli, ne u ʻofa ki ai,
pea ne u ui hoku foha mei ʻIsipite.
2 ʻI heʻenau ui kiate kinautolu, pehē ne nau ʻalu meiate kinautolu:
naʻa nau feilaulau kia Pealimi,
pea nau tutu ʻae ʻakau namu kakala ki he ngaahi tamapua kuo tongitongi.
3 Naʻaku akoʻi foki ʻa ʻIfalemi ke ʻalu,
ʻi he puke ʻaki honau nima;
ka naʻe ʻikai te nau ʻilo ko au naʻe fakamoʻui ʻakinautolu.
4 Naʻaku toho ʻakinautolu ʻaki ʻae afo ʻae tangata, ʻaki ʻae noʻo ʻoe ʻofa:
pea naʻaku hangē ko ia ʻoku toʻo ʻae nonoʻo mei honau ngutu,
pea ne u tuku ʻae meʻakai ʻi honau ʻao.
5 “ʻE ʻikai te ne toe liliu ki he fonua ʻo ʻIsipite,
ka ʻe hoko ʻae ʻAsilia ko hono tuʻi,
koeʻuhi naʻe ʻikai te nau loto ke liliu.
6 Pea ʻe nofomaʻu ki hono ngaahi kolo ʻae heletā,
pea te ne fakaʻosi hono ngaahi vaʻa, pea kai ia,
koeʻuhi ko ʻenau fakakaukau ʻanautolu pe.
7 Pea kuo pau pe hoku kakai ke fakaholomui meiate au:
neongo ʻenau ui ʻakinautolu ki he Fungani Māʻolunga,
naʻe ʻikai ha tokotaha te ne hakeakiʻi ia.
8 “ʻE fēfeeʻi ʻa ʻeku fakatukutukuʻi koe, ʻe ʻIfalemi?
Te u fakahaofi fēfeeʻi koe, ʻe ʻIsileli?
ʻE fēfeeʻi ʻeku ngaohi ko e ke hangē ko ʻAtima?
Te u tuku koe fēfeeʻi ke hangē ko Sipoimi?
Kuo liliu hoku loto ʻiate au,
kuo tupu fakataha ʻa ʻeku fakatomala.
9 ʻE ʻikai te u fai ki hono kakaha ʻo hoku houhau,
ʻe ʻikai teu tafoki ke fakaʻauha ʻa ʻIfalemi:
pe ko e ʻOtua au, ka ʻoku ʻikai ko e tangata;
ko e tokotaha māʻoniʻoni ʻoku ʻi homou lotolotonga:
pea ʻe ʻikai teu hū ki he loto kolo.
10 Te nau muimui kia Sihova:
te ne ngungulu hangē ko e laione;
ʻi heʻene ngungulu ʻe tetetete ʻae fānau mei he lulunga.
11 Te nau tetetete hangē ko e manupuna mei ʻIsipite,
pea hangē ko e lupe mei he fonua ʻo ʻAsilia:
pea te u tuku ʻakinautolu ʻi honau ngaahi fale,” ʻoku pehē ʻe Sihova.
12 ʻOku takatakai ʻaki au ʻe ʻIfalemi ʻae loi,
pea mo e fale ʻo ʻIsileli ʻaki ʻae kākā:
ka ʻoku kei pule ʻa Siuta mo e ʻOtua,
pea ʻoku ne angatonu mo e ngaahi kakai māʻoniʻoni.