15
1 ʻOku valokiʻi ʻa Siope ʻe Elifasi koeʻuhi ko ʻene fai hala ʻi heʻene fakatonuhiaʻi ia ʻe ia. 17 ʻOku ne fakamoʻoni ʻaki ʻae talatupuʻa ʻae taʻefiemālie ʻae kakai angahala.
1 Pea naʻe toki tali ʻe Elifasi mei Timani, ʻo ne pehē,
2 “He ʻoku taau mo e tangata poto ke lau meʻa vaʻinga,
mo fakapito hono kete ʻaki ʻae matangi hahake?
3 ʻOku taau ʻene leaʻaki ʻae lea taʻeʻaonga?
Pe ko e ngaahi lau ʻe ʻikai te ne lavaʻi ʻaki ha lelei?
4 ʻIo, ʻoku ke liʻaki ʻae manavahē,
pea ke taʻofi ʻae lotu ʻi he ʻao ʻoe ʻOtua.
5 He ʻoku lea ʻaki ʻe ho ngutu ʻa hoʻo angahala,
ka ʻoku ke fili ki he ʻelelo ʻoe fakaoloolo.
6 ʻOku talatalaakiʻi koe ʻe ho ngutu pe ʻoʻou, kae ʻikai ko au:
ʻio, ko ho loungutu pe ʻoʻou ʻoku fakamoʻoni kiate koe.
7 “He ko e ʻuluaki tangata koe naʻe fanauʻi?
Pe naʻe fakatupu koe ʻi muʻa ʻi he ngaahi moʻunga?
8 He kuo ke fanongo ʻe koe ki he meʻa fufū ʻae ʻOtua?
Pea ʻoku ke fakangata ʻae poto kiate koe?
9 Ko e hā ʻoku ke ʻilo, ka ʻoku ʻikai te mau ʻilo?
Ko e hā ʻoku ke ʻilo pau, ʻaia ʻoku ʻikai ʻiate kimautolu?
10 ʻOku ʻiate kimautolu ʻae ʻuluhinā mo e kau mātuʻa,
ʻoku motuʻa lahi ʻi hoʻo tamai.
11 He ʻoku siʻi ʻae ngaahi fakafiemālie ʻae ʻOtua kiate koe?
He ʻoku ai ha meʻa fakalilolilo ʻiate koe?
12 Ko e hā ʻoku ʻāvea ai koe ʻe ho loto?
Pea ʻoku lalama ho mata ʻi he hā.
13 Koeʻuhi ʻoku ke fakafoki ho loto ke tuʻu ki he ʻOtua,
pea tuku ke tafe ʻae ngaahi lea ni mei ho ngutu?
14 Ko e hā ʻae tangata, ke pehē ʻoku maʻa ia?
Pe ha taha ʻoku fanauʻi ʻe he fefine, ke pehē ʻoku tonuhia ia?
15 Vakai, ʻoku ʻikai falala siʻi ʻe ia ki heʻene kau māʻoniʻoni;
ʻio, naʻa mo e ngaahi langi ʻoku ʻikai maʻa ia ʻi hono ʻao.
16 Ka ʻe fēfē hono lahi hake ʻoe fakalielia mo e ʻuli ʻoe tangata,
ʻaia ʻoku ne inumia ʻae angahala ʻo hangē ha vai?
17 “Te u fakahā kiate koe, fanongo kiate au;
pea ko ia kuo u mamata ai te u fakamatala atu;
18 ʻAia naʻe tala ʻe he kakai poto mei heʻenau ngaahi tamai,
ʻo ʻikai fufū ia:
19 ʻAkinautolu pē naʻe foaki ki ai ʻae fonua,
pea naʻe ʻikai feʻaluʻaki ha muli ʻiate kinautolu.
20 ʻOku langa mamahi ʻae tangata angahala ʻi he ʻaho kotoa pē,
pea ʻoku fufū mei he fakaaoao ʻae lau ʻoe ngaahi taʻu.
21 Ko e ongo fakailifia ʻoku ʻi hono telinga:
ʻi he lolotonga ʻo ʻene monūʻia ʻe hoko kiate ia ʻae fakaʻauha.
22 ʻOku ʻikai ʻamanaki ʻe ia ke ne liu mai mei he fakapoʻuli,
pea ʻoku talia ia ʻe he heletā.
23 ʻOku ʻalu fano pe ia ʻo kumi ʻae mā, ʻo pehē, ‘Ko mā ia?’
ʻOku ne ʻilo ʻoku ofi ʻae ʻaho ʻoe fakapoʻuli.
24 ʻE fakamanavahēʻi ia ʻe he mamahi mo e feinga;
te na ikuna ia, ʻo hangē ha tuʻi kuo teu ki he tuʻa.
25 He ʻoku ne mafao atu hono nima ki he ʻOtua,
ʻo ne fakamālohi ia ʻo tuʻu ki he Māfimafi.
26 ʻOku ne ʻohofi kiate ia, ʻio, ki hono kia,
ki he ngaahi potu matolu ʻo hono sifa fatafata:
27 Koeʻuhi ʻoku ne fai ke fuʻu pupula hono mata,
pea ne fangapesi ke matolu ʻae ngako ʻi hono ngaahi potu.
28 Ka ʻoku ne nofo ʻi he ngaahi kolo lala,
ʻi he ngaahi fale ʻoku ʻikai nofo ai ha taha,
ʻaia kuo tuʻutuʻuni ko e ngaahi tuʻunga veve.
29 ʻE ʻikai koloaʻia ia, ʻe ʻikai tuʻumaʻu ʻene ngaahi meʻa,
pea ʻe ʻikai te ne faʻa fai ke fakatolonga hono lelei ʻi he fonua.
30 ʻE ʻikai ʻalu ia mei he fakapoʻuli;
ʻe mangia ʻe he afi ʻa hono ngaahi vaʻa,
pea ʻi he mānava ʻo hono fofonga ʻe mole atu ia.
31 Ke ʻoua naʻa falala ia ʻaia kuo kākaaʻi ki he vaʻinga:
ko hono totongi ko e vaʻinga pe.
32 ʻE fakamoʻoni eni ʻi he teʻeki hoko hono ʻaho,
pea ʻe ʻikai maʻuiʻui hono vaʻa.
33 ʻE lulu ʻe ia ke tō hono fuhi kālepi taʻemomoho ʻo hangē pe ko e vaine,
pea te ne fakamokulu hono fisi ʻo hangē pē ko e ʻolive.
34 He koeʻuhi ʻe lala ʻae fakatahaʻanga ʻoe kau angahala,
pea ʻe fakaʻauha ʻe he afi ʻae ngaahi fale naʻe maʻu ʻaki ʻae koloa kovi.
35 ʻOku nau tuʻituʻia ʻi he pauʻu, pea nau fanauʻi ʻae vaʻinga,
pea ʻoku teuteu ʻe honau loto ʻae kākā.