8
1–9 ʻOku ongoongolelei ai ʻae ʻOtua ʻi heʻene ngaahi ngāue, pea ʻi heʻene ʻofa ki he tangata.
Ki he Takimuʻa ʻi he Kitita, ko e Saame ʻa Tevita.
‌ʻE Sihova ko homau ʻEiki, ʻoku lelei lahi ho huafa ʻi māmani kotoa pē!
Kuo ke fokotuʻu ho nāunau ʻi ʻolunga ʻi he ngaahi langi.
Kuo ke tuʻutuʻuni mei he ngutu ʻoe kau valevale mo e kei huhu ʻae mālohi,
ko e meʻa ʻi ho ngaahi fili, koeʻuhi ke ke pule ke fakalongo pē ʻae fili mo e fakafāsifasi.
‌ʻO kau ka fakakaukau ki ho ngaahi langi, ko e ngāue ʻo ho louhiʻi nima,
ko e māhina mo e ngaahi fetuʻu, ʻaia naʻa ke fokotuʻu;
Ko e hā ʻae tangata ʻoku ke tokanga ai kiate ia?
Pe ko e foha ʻae tangata, ʻoku ke ʻaʻahi ai kiate ia?
He kuo ke ngaohi ia ke māʻulalo siʻi ʻi he ngaahi ʻāngelo,
pea kuo ke tatāʻaki ia ʻae nāunau mo e ongoongolelei.
Naʻa ke fakanofo ia ke ne pule ki he ngaahi ngāue ʻa ho nima;
kuo ke tuku ʻae meʻa kotoa pē ki hono lalo vaʻe:
‌ʻAe fanga sipi kotoa pē mo e fanga pulu,
ʻio, mo e ngaahi manu ʻoe fonua;
Ko e manupuna ʻoe ʻatā, mo e ika ʻoe tahi,
mo e meʻa kotoa pē ʻoku ʻalu ʻi he ngaahi ʻaluʻanga ʻi he tahi.
‌ʻE Sihova ko homau ʻEiki,
ʻoku lelei lahi ho huafa ʻi māmani kotoa pē!