32
1 ʻOku tuʻu ʻae monūʻia ʻi he fakamolemole ʻoe angahala. 3 ʻOku tupu ʻae fiemālie ki he loto ʻi he vete ʻae angahala. 8 ʻOku tupu ʻae fiefia ʻi he ngaahi talaʻofa ʻae ʻOtua.
Ko e Saame akonaki ʻa Tevita.
‌ʻOku monūʻia ia ʻaia kuo fakamolemole ʻa ʻene talangataʻa, pea kuo ʻufiʻufi ʻene angahala.
‌ʻOku monūʻia ʻae tangata ʻaia ʻoku ʻikai lau ki ai ʻe Sihova ha hia,
pea ʻoku ʻikai ha kākā ʻi hono laumālie.
‌ʻI heʻeku fakalongo pē, naʻe fakaʻaʻau ʻo motuʻa hoku ngaahi hui ʻi heʻeku tangi ʻi he ʻaho kotoa.
He naʻe mamafa ho nima kiate au ʻi he ʻaho mo e pō:
naʻe liliu hoku huhuʻa ko e laʻāina ʻoe faʻahitaʻu mafana.
Sila.
Naʻaku vete ʻeku angahala kiate koe,
pea naʻe ʻikai te u fufū ʻeku hia.
Naʻaku pehē, te u vete ʻeku ngaahi talangataʻa kia Sihova:
pea naʻa ke fakamolemole ʻae hia ʻo ʻeku angahala.
Sila.
Ko ia ʻe lotu ai kiate koe ʻaia kotoa pē ʻoku anga fakaʻotua ʻi he kuonga ʻe ʻiloʻi ai koe:
ko e moʻoni ʻi he ʻoho mai ʻoe ngaahi vai lahi ʻe ʻikai tenau aʻu ʻo ofi kiate ia.
Ko koe ko hoku toitoiʻanga;
te ke fakamoʻui au mei he mamahi;
pea te ke kāpui ʻaki au ʻae ngaahi hiva ʻoe fakamoʻui.
Sila.
Ko au te u fakapotoʻi koe mo akonakiʻi koe ʻi he hala ʻaia te ke ʻalu ai:
te u fakahinohino koe ʻaki hoku mata.
‌ʻOua naʻa mou hangē ko e hoosi mo e miuli, ʻoku masiva ʻi he ʻilo:
ʻaia ʻoku taʻofi ʻaki honau ngutu ʻae ukamea mo e noʻo, koeʻuhi ke nau haʻu ʻo ofi kiate koe.
10 ‌ʻE hoko ʻae ngaahi mamahi lahi ki he kakai angakovi:
ka ko ia ʻoku falala kia Sihova, ʻe kāpui ʻaki ia ʻae ʻaloʻofa.
11 Mou fiefia ʻia Sihova, pea nekeneka, ʻakimoutolu ʻoku māʻoniʻoni:
pea kalanga ʻi he fiefia, ʻakimoutolu kotoa pē ʻoku angatonu ʻi loto.