49
1 Ko e enginaki ke fokotuʻu ʻae tui ki he toetuʻu ʻi he ʻOtua, kae ʻikai ʻi he mālohi fakamaama. 16 ʻOua naʻa ʻofa ki he monūʻia fakamaama.
Ki he Takimuʻa, ko e Saame ki he ngaahi foha ʻo Kola.
Mou fanongo ki he meʻa ni, ʻae kakai kotoa pē;
fakafanongo, ʻakimoutolu kotoa pē ʻoku nofo ʻi māmani:
‌ʻAe māʻulalo mo e māʻolunga,
ʻae maʻumeʻa mo e masiva, fakataha.
‌ʻE lea hoku ngutu ʻi he poto;
pea ʻe kau ki he ʻilo ʻae fakakaukau ʻa hoku loto.
Te u fakatokangaʻi hoku telinga ki he lea fakatātā:
te u fakahā ʻi he haʻape ʻeku lea ʻilongataʻa.
Ko e hā te u manavahē ai ʻi he ngaahi ʻaho ʻoe kovi,
ʻoka takatakai au ʻe he hia ʻo hoku vaʻe?
Ko kinautolu ʻoku falala ki heʻenau mālohi,
ʻo polepole ʻi hono lahi ʻo ʻenau koloa;
‌ʻOku ʻikai ʻaupito faʻa fai ʻe hanau tokotaha ke huhuʻi hono tokoua,
pe ʻatu ki he ʻOtua hano totongi:
He ko e huhuʻi ʻo honau laumālie ʻoku mahuʻinga lahi,
pea ʻoku tuku ai pe ia ʻo taʻengata:
Koeʻuhi ke ne kei moʻui maʻuaipē,
pea ʻikai ʻilo ʻae ʻauʻauha.
10 He ʻoku ne mamata ʻoku mate ʻae kau tangata poto,
pea ʻoku ʻauha foki ʻae tangata vale pea mo e taʻeʻilo,
ʻonau tuku ʻenau koloa ki he kakai kehe.
11 ‌ʻOku mahalo ʻa honau loto, ʻe tuʻumaʻu pē honau fale ʻo taʻengata,
mo honau ngaahi nofoʻanga ki he toʻutangata kotoa pē;
ʻoku nau fakahingoa honau ʻapi ki honau hingoa ʻonautolu.
12 Ka ko e moʻoni ko e tangata ʻoku māʻolunga ʻoku ʻikai tuʻumaʻu ia:
ʻoku tatau ia mo e fanga manu ʻoku ʻauha.
13 Pea ko honau hala ni ko ʻenau vale ia:
ka ʻoku mālieʻia honau hako ʻi heʻenau ngaahi lea.
Sila.
14 Kuo tuku ʻakinautolu ki he faʻitoka ʻo hangē ko e fanga sipi;
ʻe fafanga ʻaki ʻae mate ʻakinautolu;
pea ʻe maʻu ʻae mālohi kiate kinautolu ʻe he kakai angatonu ʻi he pongipongi;
pea ʻe ʻauha honau matamatalelei ʻi he faʻitoka mei honau nofoʻanga.
15 Ka ʻe huhuʻi hoku laumālie ʻe he ʻOtua mei he mālohi ʻoe faʻitoka:
he te ne maʻu au.
Sila.
16 ‌ʻOua naʻa ke manavahē koe ʻoka hoko ʻo koloaʻia ha tokotaha,
ʻi he tupu pē ʻae nāunau ʻo hono fale;
17 He ʻoka mate ia ʻe ʻikai te ne fua ʻo ʻave ha meʻa ʻe taha:
ʻe ʻikai muimui hifo ʻiate ia hono nāunau.
18 Ka ʻi heʻene moʻui naʻa ne tāpuaki hono laumālie:
pea ʻe fakamālō ʻae kakai kiate koe, ʻoka ke ka fai lelei kiate koe.
19 ‌ʻE ʻalu ia ki he toʻutangata ʻo ʻene ngaahi tamai;
ʻe ʻikai tenau mamata ki he maama.
20 Ko e tangata ʻoku māʻolunga, ka ʻoku ʻikai poto,
ʻoku tatau ia mo e fanga manu ʻoku ʻauha.