13
Abram deng Lot bapisa
1 Ais itu, Abram kasi tenga Masir, ko kambali pi di tana Negeb. Dia pi deng dia pung bini, deng dia pung harta pusaka samua. Dia pung adi pung ana Lot ju iko sang dong.
2 Abram tu, kaya sakali. Dia pung binatang piara, deng mas-perak, banya sakali.
3 Dari Negeb dia jalan bapinda-bapinda ko pi kambali di kampong Betel deng kampong Ai pung teng-tenga. Dolu dia parná tenga di situ.
4 Deng dia ju su kasi badiri meja korban. Ais dia sémba sang TUHAN di situ.
5 Lot, yang iko sama-sama deng Abram tu, ju ada pung binatang piara banya, deng dia pung orang-orang karjá dong ju banya.
6-7 Ma itu tampa sonde cukup luas kasi Abram deng Lot, deng dong pung harta-benda samua, ko idop sama-sama di situ. Ais, Abram deng Lot pung gambala dong mulai bakanjar, tagal rumput di itu tampa sonde cukup kasi dong pung binatang. (Itu waktu, orang Kana'an deng orang Feris masi tenga di situ ju.)
8 Ais ju Abram kasi tau sang dia pung ana bilang, “Lot, é! Kotong ni bakelu. Jang sampe kotong dua batar-enak satu deng satu, deng kotong pung orang karjá dong jang babakalai tarús.
9 Naa, lebe bae kotong dua bapisa sa. Ini tampa luas. Jadi, kalo lu pili ame tana di bagian kiri, na, beta ame di bagian kanan. Ma kalo lu pili ame tana di bagian kanan, na, beta ame di bagian kiri.”
10 Lantas Lot lia-lia kuliling. Ju dia dapa lia lemba kali Yarden yang limpa deng aer, sampe di kampong Soar. Itu tampa pung subur sama ke TUHAN pung kabón, deng sama ke tana Masir. (Itu waktu, TUHAN balóm kasi ancor kota-kota Sodom deng Gomora. Jadi, itu tana masi bae.)
11 Jadi Lot pili ame samua tana di lemba kali Yarden tu. Lantas dong dua bapisa. Ais Lot pi di sablá matahari nae.
12 Ma Abram tenga tarús di tana Kana'an. Ais Lot pi tenga di kampong-kampong deka kota Sodom di lemba Yarden.
13 Ma orang-orang Sodom dong, orang jahat mo mati. Deng dong sonde mau dengar sang TUHAN.
14 Waktu Lot deng Abram su bapisa, ju TUHAN bilang sang Abram, “Abram! Coba lu buang mata kuliling ko lia samua tampa dari tampa yang lu badiri tu. Lia bae-bae muka-balakang kiri-kanan.
15 Samua tana yang lu lia tu, nanti Beta kasi sang lu, deng lu pung turunan dong, ko jadi bosong pung pusaka tarús sampe salamanya.
16 Nanti Beta kasi lu pung turunan dong jadi banya sama ke pasir di pante. Sampe orang dong sonde bisa itong lu pung turunan pung banya.
17 Sakarang lu jalan kuliling iko ini tana pung panjang deng lebar. Te samua tu, nanti Beta kasi sang lu!”
18 Ais itu, ju Abram dong pinda, deng pi tenga ulang lai di itu tampa deka pohon-pohon bésar di Mamre, deka kampong Hebron. Ais dia susun meja korban, ko sémba sang TUHAN di situ.