14
Abram pi ame kambali sang Lot dari paráng
1 Itu waktu, ada ampa raja bakumpul. Andia: Amrafel, raja negrí Sinear. Ariok, raja negrí Elasar. Kedarlaomer, raja negrí Elam. Deng Tideal, raja negrí Goyim.
2 Itu waktu, ju ada lima raja laen yang bakumpul. Andia: Bera, raja negrí Sodom. Birsa, raja negrí Gomora. Sinab, raja negrí Adema. Semeber, raja negrí Seboim. Deng raja negrí Bela (andia negrí Soar). Ais, itu ampa raja dong baparáng lawan itu lima raja laen dong.
3 Itu lima raja dong bakumpul deng dong pung tantara di lemba Sidim, (yang sakarang dong bilang Laut Mati).
4 Itu paráng tu, dia pung akar bagini: Dolu, itu lima raja tondo sang Raja Kedarlaomer sampe 12 taon. Ma taon ka-13, ju dong bangun malawan sang dia.
5 Waktu maso pi taon ka-14, ju Raja Kedarlaomer deng dia pung tamán tiga raja tu, datang deng dong pung tantara. Ju dong baparáng bekin kala barapa negrí. Andia: orang Refaim di negrí Asterot-Karnaim, orang Susim di negrí Ham, orang Emim di negrí Sawe-Kiryataim,
6 deng orang Hori yang di gunung Seir sampe di tampa kosong El Paran pung pinggir.
7 Abis, dong bale kambali pi di En Mispat (yang sakarang nama Kades). Abis itu, dong bekin ancor orang Amalek pung negrí, deng orang Amori yang tenga di negrí Haseson-Tamar.
8-9 Ais, itu lima raja ator dong pung tantara di lemba Sidim, ju dong baparáng lawan itu ampa raja dong.
10 Di itu lemba, ada banya kolam ter. Waktu dong baparáng tu, raja Sodom deng raja Gomora deng dong pung tantara, bangun lari. Dong saparu jato maso dalam kolam ter. Deng saparu lari pi gunung.
11 Jadi itu ampa raja yang manáng tu, pi rampas ame samua barang-barang deng makanan dari Sodom deng Gomora. Ais ju dong mulai pulang.
12 Ma Abram pung ana Lot ada tenga di Sodom. Ais, itu ampa raja dong ju tangkap bawa Lot dong, deng rampas bawa dong pung barang samua.
13 Ma ada satu orang yang talapás. Ju dia lari pi lapor sang Abram, orang Ibrani. Itu waktu, ada satu orang Amori, nama Mamre. Abram ada tenga deka-deka di Mamre pung pohon-pohon bésar. Mamre pung sodara sang Eskol deng Aner. Dong tu, jadi Abram pung partei.
14 Waktu Abram dapa dengar, bilang, orang su tangkap bawa dia pung adi pung ana tu, ju dia kumpul dia pung orang-orang karjá yang pintar baparáng. Dong samua ada 318 orang. Ais ju dong pi buru itu ampa raja sampe di kampong Dan yang jao di sablá utara.
15 Di situ, Abram bagi dia pung orang-orang dong jadi barapa kalompok. Dia pung malam, ju dong pi saráng itu orang dong. Ma ada yang lari. Ais Abram dong buru tarús sang dong, sampe di kampong Hoba, di kota Damsik pung sablá utara.
16 Ais Abram dapa ame kambali sang Lot, deng dia pung orang-orang, deng dong pung barang samua, deng orang-orang laen ju.
Melkisedek bakatumu deng Abram. Dia jadi raja, deng kapala agama dari Tuhan Allah
17 Waktu Abram pulang dari bekin kala itu ampa raja dong, ju raja Sodom datang sambut sang Abram di lemba Sawe (yang orang biasa subu bilang, Lemba Raja).
18 Itu waktu, Melkisedek, raja kota Salem. Deng dia ju kapala agama dari Tuhan Allah yang Paling Tinggi. Dia datang ko bawa kasi sang Abram, roti deng aer boa anggor.
19-20 Ais ju dia omong kasi berkat sang Abram, bilang, “Biar Tuhan Allah yang Paling Tinggi, yang bekin langit deng bumi tu, kasi berkat sang lu. Puji sang Tuhan Allah, yang su bekin lu manáng lu pung musu dong.”
Ais itu ju Abram bagi kasi Melkisedek satu per sapulu bagian dari samua yang dia su rampas ame kambali tu.
21 Ais itu, raja Sodom soya sang Abram, deng bilang, “Bapa Abram. Barang-barang yang bapa su rampas ame dari beta pung musu dong, biar bapa soa samua. Ma beta cuma minta kambali beta pung orang-orang dong.”
22 Ma Abram manyao, bilang, “Beta sumpa di muka Tuhan Allah yang Paling Tinggi, yang bekin langit deng bumi,
23 bilang, beta sonde akan ame barang satu apa ju dari lu pung barang. Biar banáng sapo'ong ju, beta sonde akan ame. Deng bagitu, lu sonde bisa omong, bilang, ‘Abram pung kaya tu, tagal beta.’
24 Beta sonde parlú apa-apa. Cuma mana yang beta pung orang-orang dong su pake, anggap sa su abis. Deng biar beta pung tamán tiga orang ni, Aner, Eskol deng Mamre, ame bawa dong pung bagian.”