38
Yahuda deng dia pung ana mantu Tamar
1 Abis itu, Yahuda jalan kasi tenga dia pung kaka-adi dong, ko pi tenga deng dia pung tamán Hira di kampong Adulam.
2 Di situ ada satu bapa, orang Kana'an, nama Sua. Yahuda basuka deng Sua pung ana nona satu, ju dong dua kawin. Ais itu, dia barana barapa ana laki-laki ba'iko-ba'iko.
3 Ana nomer satu, dong kasi nama Er.
4 Tarús nomer dua, dong kasi nama Onan.
5 Abis nomer tiga, nama Sela. Waktu barana sang Sela, ju dong su pinda pi kampong laen, nama Kesib.
6 Waktu ana nomer satu, Er, su bésar, Yahuda pi maso minta kasi dia satu nona, nama Tamar. Ais ju dong dua kawin.
7 Ma Er itu talalu jahat. Tagal itu, Tuhan hukum kasi mati sang dia. Andia ko Er mati sonde kasi tenga ana.
8 Ais itu, Yahuda suru dia pung ana nomer dua, bilang, “Onan! Lu pung kaka su mati, ma sonde ada ana. Jadi sakarang, iko orang tua dong pung biasa, lu musti ganti lu pung kaka ko kawin dia pung bini. Ko biar lu kasi turunan sang lu pung kaka.”
9 Onan su tau itu adat. Ma dia sonde mau kasi turunan sang dia pung kaka Er. Jadi saban kali, kalo dia tidor deng Tamar, dia buang kaluar dia pung bibit, ko biar Tamar sonde usa barana.
10 Onan pung cara bagitu, bekin Tuhan mara sakali. Andia ko Tuhan ju hukum kasi mati sang dia.
11 Waktu Yahuda lia dia pung ana dua-dua yang kawin deng Tamar su mati, ju dia jadi taku. Dia pikir, jang sampe dia pung ana bungsu Sela kawin deng Tamar lai, nanti dia ju mati. Andia ko dia pi kasi tau dia pung ana mantu Tamar, bilang, “Ana é. Lebe bae lu pulang pi lu pung orang tua sa. Nanti beta pung ana Sela su bésar, baru lu kambali ko kawin deng dia.” Ais ju Tamar pulang.
12 Lewat barapa lama, ju Yahuda pung bini mati. Jadi dia susa sampe waktu duka abis. Ais dia pange dia pung tamán Hira, ko dong dua pi di kampong Timna. Di situ ada orang-orang dong rame cukur domba pung bulu, ko jual.
13 Ju orang kasi tau sang Tamar bilang, “Lu pung papa mantu ada pi Timna iko pesta cukur domba pung bulu.”
14 Itu waktu, Yahuda pung ana bungsu Sela su bésar. Ma Tamar su tau, bilang, dia pung papa mantu sonde mau kasi dia kawin deng Sela. Lantas Tamar cari akal ko tuntut dia pung hak. Ju dia buka kasi tenga dia pung pakean janda, ais ganti pake pakean bagus. Dia pake salendang ko tutu dia pung kapala deng dia pung muka. Ais dia pi dudu di kampong Enaim pung pintu maso, pas di jalan pi Timna.
15 Waktu Yahuda lewat itu pintu maso kampong, dia dapa lia satu parampuan. Dia kira itu parampuan nakal, tagal Tamar bagaya deng pakean, ju tutu muka lai.
16 Yahuda sonde sangka bilang itu parampuan, dia pung ana mantu. Jadi dia pi deka-deka itu parampuan, ko tanya, bilang, “We! Kalo beta deng lu na, lu minta barapa?”
Ma Tamar manyao, bilang, “Neu! Dari Pak pung suka sa.”
17 Yahuda tawar bilang, “Karmana kalo beta kasi lu kambing satu?”
Ais Tamar balas, bilang, “Bae, Pak. Asal Pak kasi beta pegang barang jaminan dolo. Sampe kapan-kapan Pak kirim itu kambing.”
18-19 Ju Yahuda tanya lai bilang, “Beta kasi lu barang jaminan apa?”
Tamar manyao, bilang, “Pak kasi tenga cap yang ada tagantong, deng dia pung tali di Pak pung leher tu. Deng kasi tenga itu tongkat juga.” Dengar bagitu, ju Yahuda kasi itu barang-barang sang dia.
Ais dong dua pi tidor sama-sama. Ais itu, Tamar pulang. Dia buka dia pung pakean bagus deng dia pung salendang tu, ko pake ulang dia pung pakean janda. Tau-tau te Tamar su dudu parú.
20 Sonde lama lai, Yahuda minta tolong sang dia pung tamán Hira bilang, “Lu bawa ini kambing kasi itu parampuan nakal di Enaim sana, ko ame kambali beta pung barang-barang yang dia ada pegang.” Hira pi sampe di sana, dia batanya pi-datang, ma sonde dapa katumu itu parampuan.
21 Ju dia batanya orang-orang di situ bilang, “We! Bosong ada dapa lia itu palacor yang biasa dudu di pintu maso sini, ko? Dia ada di mana é?”
Ma dong manyao, bilang, “Pak, di sini sonde ada parampuan nakal.”
22 Jadi Hira kambali pi sang Yahuda. Dia kasi tau, bilang, “Beta sonde katumu itu parampuan. Beta cari-cari, ma orang di sana kasi tau, bilang, di itu tampa sonde ada parampuan nakal.”
23 Yahuda manyao, bilang, “Biar kasi tenga itu barang dong, ko dia soa sa! Asal orang jang bekin malu sang kotong! Te beta su mau bayar, ma kotong sonde dapa katumu sang dia na.”
24 Lewat tiga bulan, ju orang pi kasi tau sang Yahuda, bilang, “Lu pung ana mantu Tamar itu, su bekin diri jadi parampuan nakal. Sakarang dia ada bunting.”
Dengar bagitu, ju Yahuda mara mo mati. Ais dia parenta itu orang bilang, “Pi hela bawa itu parampuan datang, ko bakar idop-idop sang dia!”
25 Ais dong pi hela bawa sang Tamar. Ma dia kasi kaluar itu cap, deng itu tongkat. Ju dia suru dong pi kasi tau dia pung papa mantu bilang, “Papa, tolong pareksa ini barang-barang dolo. Orang yang pung cap deng tongkat ini yang bekin beta dudu parú.”
26 Lia itu barang, ju Yahuda langsung kanál, bilang, itu barang dia punya. Ais dia kasi tau, bilang, “Memang! Itu parampuan sonde sala. Beta yang sala. Dia batúl. Andia beta musti kasi kawin dia deng beta pung ana Sela. Ma beta yang sonde mau. Kasi lapás sang dia sa!” Abis ju, Yahuda sonde bakumpul lai deng Tamar.
27 Tamar pung waktu barana su sampe, ju dia barana ana kambár.
28 Waktu dia barana, ana satu kasi kaluar dia pung tangan. Ju ibu bidan ika banáng mera di itu tangan. Dia bilang, “Ini yang nomer satu.”
29 Ma itu ana hela kambali dia pung tangan. Ais dia pung kambár yang kaluar lebe dolo. Ibu bidan bilang itu ana, “We! Lu ini memang kuat ó! Andia ko lu baseti kaluar lebe dolo!” Abis dong kasi nama itu ana, Peres (dia pung arti bilang, ‘baseti kaluar’).
30 Abis, baru dia pung adi yang ada ika banáng mera itu kaluar. Dong kasi nama sang dia, Sera (dia pung arti bilang, ‘mera manyala’).