39
Yusuf, deng bos Potifar pung bini
1-2 Tempo hari, itu orang Ismael dong bawa sang Yusuf pi Masir. Di situ ada orang bésar satu, nama Potifar. Dia tu, kapala dari samua tantara yang bajaga di raja Masir pung ruma jabatan. Ais ju, Potifar béli Yusuf dari itu orang dagang dong, ko jadi dia pung budak di dia pung ruma. Di situ, TUHAN tolong sang Yusuf, sampe dia pung karjá samua jadi deng bae.
3 Dia pung bos lia Yusuf pung karjá bagitu bae, ju dia tau batúl TUHAN ada tolong sang Yusuf.
4 Andia ko dia pung bos suka sang Yusuf, deng parcaya sang dia. Tarús dia angka sang Yusuf jadi mandor di dia pung ruma. Dia ju kasi Yusuf urus dia pung ruma deng dia pung pusaka samua dong.
5 Tagal Yusuf tenga di situ, andia ko Tuhan ju kasi berkat sang dia pung bos, orang Masir tu. Dia pung isi ruma, dia pung pusaka, dia pung kabón, deng dia pung karjá samua jadi deng bae.
6 Ais, waktu Potifar lia Yusuf urus samua karjá deng bae, andia ko dia tar pikir apa-apa lai, cuma tau makan sa.
Itu waktu, Yusuf talalu gaga.
7 Dia tenga di sana balóm bagitu lama, ma Potifar pung bini su jato hati deng dia. Ju dia kokoe sang Yusuf ko mau tidor sama-sama.
8 Ma Yusuf sonde mau. Ju dia manyao, bilang, “Jang bagitu, mama! Te beta pung bos Potifar su kasi beta kuasa ko urus dia pung karjá samua.
9 Di ini ruma, sonde ada orang lai yang pegang kuasa lebe dari beta. Te bos su kasi beta urus samua-samua. Cuma mama sa, sonde. Karmana ko beta bisa bekin jahat bagitu! Itu ju su malawan Tuhan Allah pung mau!”
10 Ma biar bagitu, ju saban hari, itu bos pung bini maen kokoe tarús sa. Ma Yusuf sonde toe sang dia.
11 Ais satu kali, ju Yusuf maso pi dalam ruma, ko mau lia dia pung karjá. Itu hari, sonde ada orang laen di ruma.
12 Ju dia pung bos pung bini datang ko pegang Yusuf pung baju, tarús hela ame sang dia, ju bilang, “Mari suda! Sakarang tenga kotong dua sandiri sa. Mari suda ko kotong dua pi tidor.”
Ma Yusuf sonde mau. Ais dia marontak, sampe dia pung baju talapás. Ju dia lari kaluar. Ma itu parampuan masi pegang tarús itu baju.
13 Waktu Potifar pung bini lia Yusuf su lari kaluar kasi tenga dia pung baju,
14-15 ju dia pange orang karjá dong, ko kasi tau, bilang, “We! Bosong mari lia dolo! Tadi, itu laki-laki Ibrani tu, maso beta pung kamar. Dia mau bekin jahat sang beta, ma beta batarea karás-karás. Ini, dia kasi tenga dia pung baju, ju dia lari kaluar. Beta pung laki ni, dia bawa ini orang biadab ko bekin malu-malu sang kotong sa!”
16 Ju Potifar pung bini pegang itu baju sampe dia pung laki pulang.
17 Pas dia pung laki pulang, ju dia carita bilang, “Bu é! Itu orang Ibrani yang Bu bawa di sini tu, tadi dia su maso di beta pung kamar, ko mau parkosa sang beta!
18 Ma beta batarea karás-karás pange orang-orang dong. Ais dia lari fuik, kasi tenga dia pung baju ni.”
19 Dengar dia pung bini carita bagitu, ju Potifar mara mo mati.
20 Tarús dia suru orang dong pi tangkap sang Yusuf. Ju dong kasi maso sang dia pi dalam raja pung bui.
21 Ma TUHAN sonde lupa sang Yusuf. Andia ko, TUHAN tolong tarús sang dia, sampe itu bui pung bos ju suka sakali sang Yusuf.
22 Ais, dia parcaya sang Yusuf. Andia ko, dia kasi ofer Yusuf urus orang bui samua, deng urus karjá samua di situ.
23 Tagal itu, bos su sonde pusing urus apa-apa lai di itu bui. TUHAN tolong tarús sang Yusuf, andia ko karjá samua di itu bui jadi bae.