Surat kasi orang
Ibrani
yang baru kasi tenga dong pung nene-moyang pung agama
ko parcaya sang Yesus Kristus
1
Tuhan Allah su kirim Dia pung Ana, yang lebe hebat dari Dia pung jubir lama dong
1 Dolu-dolu, Tuhan Allah pake Dia pung jubir dong, ko omong deng kotong pung nene-moyang orang Ibrani dong. Dia pake cara macam-macam ko omong banya kali deng dong.
2 Ma sakarang, Dia su kirim Dia pung Ana, ko omong langsung deng kotong.
Dari mula-mula, Tuhan Allah su pili ame Dia pung Ana ni,
ko parenta sama-sama deng Dia.
Waktu Dia bekin langit deng bumi, deng dia pung isi samua-samua,
Dia pung Ana ni ju ada bekin sama-sama deng Dia.
3 Tuhan pung Ana ni, kasi tunju Dia pung Bapa pung hebat,
sama ke matahari pung sinar yang tapontas dari carmín.
Te Dia satu model parsís ke Dia pung Bapa.
Deng dari Dia pung Kata-kata yang hebat,
Dia kasi jalan samua yang ada di langit deng di bumi.
Dia ju buka jalan,
ko hapus buang orang pung sala-sala dong,
ko biar dong jadi barisi.
Ais Dia pi di sorga,
ko dudu di Tuhan Allah pung sablá kanan,
di tampa yang paling hormat.
Tuhan Allah pung Ana paling hebat, lebe dari ana bua di sorga
4 Tuhan Allah pung ana bua di sorga memang hebat. Ma Dia pung Ana yang paling hebat, lebe dari dong samua. Tuhan Allah pung pangkat tu, paling tinggi. Deng Dia su kasi Dia pung pangkat sandiri sang Dia pung Ana. Andia ko Dia pung Ana, lebe dari Dia pung ana bua di sorga dong.
5 Tuhan Allah parná omong sang Dia pung Ana, bilang,
“Ini hari, Beta angka sang Lu ko pegang parenta.”
Tuhan Allah ju omong, bilang,
“Beta ni, Dia pung Bapa.
Deng Dia ni, Beta pung Ana.”
Tuhan Allah omong memang bagitu so'al Dia pung Ana, ma Dia sonde parná omong bagitu so'al Dia pung ana bua di sorga.
6 Waktu Tuhan Allah kirim datang Dia pung Ana yang paling hebat tu, Dia ju parenta Dia pung ana bua di sorga, bilang,
“We! Ana bua dong!
Bosong musti pi kasi hormat,
deng sémba sang Beta pung Ana do!”
7 Tuhan Allah ju omong so'al Dia pung ana bua di sorga, bilang,
“Beta bekin Beta pung ana bua di sorga dong,
jadi sama ke angin.
Beta bekin Beta pung hamba dong,
jadi sama ke api.”
Tuhan Allah omong bagitu, tagal dong tu, cuma Dia pung tukang suru-suru sa.
8 Ma Dia omong laen lai so'al Dia pung Ana sandiri, bilang,
“Lu ni, Tuhan Allah.
Lu nanti dudu di korsi parenta sampe salamanya.
Lu nanti pegang kuasa ko parenta deng hati lurus.
9 Lu pung hati sanáng lia orang yang idop lurus.
Ma Lu pung hati susa lia orang yang idop pakane'o.
Andia ko Beta pung hati sanáng,
ko Beta po'a minya di Lu pung kapala,
ko angka sang Lu jadi Raja lebe dari yang laen dong.”
10 Tuhan Allah ju omong sang Dia pung Ana, bilang,
“Ana, ó!
Lu ni, Bos yang su parenta memang dari dolu.
Lu ni, yang suru ko langit ada memang.
Lu ni, yang parenta ko bumi jadi memang.
11-12 Nanti langit deng bumi puruk buang.
Nanti langit deng bumi ilang buang.
Ma Lu sandiri idop tarús-tarús.
Nanti Lu angka buang langit deng bumi,
sama ke orang angka buang pakean puruk.
Nanti Lu ganti langit deng bumi,
sama ke orang ganti pakean baru.
Ma Lu sandiri sonde bagitu.
Tagal Lu idop sampe salamanya.”
13 Tuhan Allah ju omong sang Dia pung Ana, bilang,
“Ana, é!
Mari dudu sini, di tampa paling hormat,
di Beta pung sablá kanan ni.
Nanti Beta bekin sang Lu pung musu dong,
sampe dong ta'alok sang Lu.”
Tuhan Allah omong memang bagitu so'al Dia pung Ana, ma Dia sonde parná omong bagitu so'al Dia pung ana bua di sorga.
14 Dia pung ana bua dong memang pantíng. Te Dia utus sang dong, ko pi urus Dia pung orang samua, ko kasi tunju jalan salamat sang dong. Ma biar bagitu, ju Tuhan Allah pung Ana, masi lebe dari dong samua.