2
Jang tola buang Tuhan pung kabar salamat yang hebat
1 Tagal itu, kotong musti pegang kuat-kuat apa yang kotong su dengar so'al Tuhan Allah pung Ana, ko kotong jang lupa buang.
2 Dolu, Tuhan pake Dia pung ana bua dari sorga, ko kasi tau Dia pung pasán sang kotong pung nene-moyang dong. Tau-tau, te itu pasán samua tu, batúl. Kalo dong langgar Dia pung parenta tu, dong pasti kaná hukum.
3 Memang dolu bagitu tu. Ma sakarang Tuhan pung Ana su buka jalan baru ko kasi salamat sang manusia. Dia su kasi tau ini jalan salamat yang hebat ni, sang Dia pung orang yang layani sang Dia di bumi. Ais dong kasi tau sang kotong, ko kotong parcaya. Ma kalo kotong sonde toe, na, kotong su paya batúl ni!
4 Te Tuhan Allah ju kasi kuasa ko dong bekin tanda heran macam-macam. Dia ju kasi turun Dia pung Roh sang dong, ko dong bekin banya hal laen iko Dia pung mau. Tagal itu samua, andia ko kotong tau, bilang, itu jalan salamat tu, memang batúl.
Akurang ko Tuhan Allah pung Ana bekin randá diri ko jadi manusia?
5 Beta ada omong so'al dunya model baru yang nanti mau datang. Ma Tuhan Allah sonde parná kasi tau Dia pung ana bua di sorga dong, bilang, nanti dong yang urus itu dunya. Te manusia yang nanti urus.
6 Di Tuhan Allah pung Tulisan Barisi, ba'i Daud parná tanya so'al manusia pung harga, bilang,
“Tuhan Allah!
Akurang ko Tuhan taro mata sang manusia?
Akurang ko Tuhan sayang sang dong?
Te dong cuma manusia biasa sa!
7 Ma Tuhan su kasi kuasa sang dong,
ko dong jadi amper sama deng ana bua di sorga.
Tuhan ju kasi hormat sang dong,
deng angka sang dong,
8 ko dong parenta samua yang Tuhan su bekin tu.”
Jadi, iko ba'i Daud pung tulisan tu, Tuhan Allah bekin manusia jadi bos, ko dong urus samua yang Dia su bekin. Padahal kotong balóm parná tau manusia satu ju yang parenta samua-samua bagitu.
9 Ma ada Satu yang bisa parenta samua-samua. Dia tu, andia Yesus. Dia datang tenga tahan di bumi, ko jadi manusia yang pikol sangsara sampe mati. Dia mati bagitu, ko kasi tunju Tuhan Allah pung hati bae sang manusia. Ais itu ju, Tuhan Allah puji-puji sang Dia deng angka nae tinggi-tinggi sang Dia, ko Dia parenta samua yang Tuhan Allah su bekin tu.
10 Jadi pantas Tuhan Allah kasi Yesus pikol sangsara, ko biar Yesus bisa buka jalan salamat kasi sang manusia. Te Tuhan Allah mau cari jalan ko banya orang bisa idop sama-sama deng Dia di sorga. Te Tuhan Allah yang bekin samua-samua. Deng samua yang idop, ada tagal Dia.
11 Kalo orang iko itu jalan, Tuhan Allah pasti tarima bae sang dong, ko dong jadi Dia pung ana-ana. Tagal Tuhan Allah ju Yesus pung Bapa, andia ko Yesus su sonde malu pange sang dong, bilang,
“Bosong ni, Beta pung sodara sandiri.”
12 Te Yesus su kasi tau Dia pung Bapa, bilang,
“Beta mau kasi tau sang Beta pung sodara dong,
so'al Bapa pung bae!
Beta mau manyanyi di dong pung teng-tenga,
so'al Bapa pung hebat!”
13 Yesus ju omong tarús, bilang,
“Beta akan parcaya tarús sang Tuhan Allah.”
Ais Yesus ju omong lai, bilang,
“Lia dolo! Beta ada di sini,
sama-sama deng Tuhan Allah pung ana-ana dong,
yang Dia su sarakan kasi Beta, ko Beta urus.”
14 Tagal Tuhan pung ana-ana tu, manusia biasa, andia ko Yesus ju musti jadi manusia sama ke dong. Te Dia musti jadi manusia dolo, baru Dia bisa mati. Lewat Dia pung mati tu, baru Dia bisa pi rampas kuasa dari setan dong pung bos. Te bos jahat tu, yang pegang kuasa ko urus hal-hal yang ta'ika deng so'al mati.
15 Deng dia ju bekin manusia taku so'al mati, sampe dong iko dia pung mau-mau, sama ke budak. Ma sakarang, Yesus su bisa kasi bebas sang manusia dari dong pung taku tu.
16 Te su jalás, Yesus sonde datang ko tolong sang Tuhan pung ana bua di sorga. Ma Dia datang ko tolong sang kotong, andia ba'i Abraham pung turunan ni.
17 Tagal itu, Yesus jadi parsís sama ke kotong yang su jadi Dia pung sodara. Deng bagitu, Dia bisa jadi kotong pung kapala agama paling tinggi, ko tolong kotong iko Tuhan Allah pung mau. Dia ju kasi tunju Dia pung rasa kasian sang kotong. Deng Dia omong apa, na, Dia bekin iko. Dolu, kotong pung nene-moyang dong minta kapala agama dong pung bos bésar bekin korban, ko Tuhan hapus buang dong pung sala-sala dong. Sakarang, Yesus sandiri su jadi korban ko Tuhan hapus buang kotong pung sala-sala dong.
18 Waktu Yesus idop di ini dunya, Dia dapa sangsara bam-banya. Ada ju yang buju-buju Dia, ko Dia bekin sala. Biar bagitu ju, ma Dia sonde jato. Tagal itu, kalo ada yang buju-buju kotong ko bekin sala, na, Yesus su bisa tolong kotong ko kotong jang jato.