13
Tuhan Yesus kasi tau memang, Ruma Sambayang Pusat pung rubu
(Mateos 24:1-2; Lukas 21:5-6)
1 Abis itu, Yesus deng Dia pung ana bua dong mau pi kasi tenga Ruma Sambayang Pusat. Waktu dong kaluar, Dia pung ana bua satu kasi tunju itu Ruma Sambayang, ju bilang, “Papa, é! Coba Papa lia ini dolo! Ini Ruma pung bagus lai! Dong susun dia pung batu-batu bésar dong bagus sakali!”
2 Ma Yesus manyao, bilang, “Ini Ruma memang bagus! Ma sonde lama lai, te dong kasi rubu abis ini batu-batu samua.”
Hari kiamat pung tanda-tanda
(Mateos 24:3-14; Lukas 21:7-19)
3 Abis ju, Yesus dong pi di gunung Saitun, ko dudu di tampa yang bamangada deng Ruma Sambayang Pusat tu. Ais Dia pung ana bua ampa orang datang ko dong ba'omong sandiri deng Dia. Andia Petrus, Yakobis, Yohanis, deng Anderias.
4 Dong tanya, bilang, “Papa! Coba kasi tau ulang Papa pung omong tadi tu. Kapan tempo datang dia pung waktu tu? Deng dia pung tanda-tanda tu, karmana?”
5 Ais Yesus manyao, bilang, “Asal bosong jaga bae-bae, ó! Ko bosong jang kaná tipu.
6 Te nanti ada macam-macam orang yang datang puku dada, bilang, ‘Beta ni, Kristus, andia Orang yang Tuhan Allah su janji memang dari dolu’. Ais dong ju tipu banya orang.
7 Kalo bosong lia orang baparáng, ko bosong dengar isu, bilang, ada paráng di mana-mana, na, bosong sonde usa taku. Te macam bagitu tu, musti jadi dolo, ma hari kiamat balóm sampe.
8 Nanti satu suku baparáng lawan laen suku. Satu negara baparáng lawan laen negara. Ada tana goyang di mana-mana. Musim lapar dong ju hebat mo mati! Ini samua jadi tanda-tanda, sama ke parampuan yang baru mulai saki mau barana.
9 Jadi bosong musti jaga bae-bae, é! Te nanti dong datang tangkap sang bosong ko hela bawa pi di pangadilan agama. Deng dong papoko sang bosong dalam ruma-ruma ibadat. Deng dong ika bawa sang bosong pi di orang yang pegang kuasa, tagal bosong iko sang Beta. Ma itu ju jadi salák ko bosong kasi tau sang dong so'al Beta.
10 Te Tuhan pung orang musti pi kasi tau lebe dolo Beta pung Carita Bae sang samua suku di ini dunya, baru hari kiamat sampe.
11 Inga, ó! Kalo dong ika bawa sang bosong pi di pangadilan, bosong sonde usa taku, bilang, ‘Nanti beta mau ba'omong, bilang, apa? Ko, beta manyao, bilang, apa?’ Kalo dia pung waktu su sampe bagitu, bosong omong iko sa, apa yang Tuhan Allah pung Roh yang Barisi kasi tau sang bosong.
12 Dalam satu ruma, kalo ada orang yang parcaya sang Beta, nanti dia pung sodara sandiri cari jalan ko bunu sang dia. Ais kalo ana yang parcaya, nanti dia pung papa sandiri bunu sang dia. Ju kalo ada papa deng mama yang parcaya sang Beta, nanti dong pung ana sandiri yang bunu sang dong.
13 Jadi, nanti orang dong binci mati sang bosong, tagal bosong parcaya sang Beta. Ma sapa yang batahan sampe abis, pasti Tuhan Allah kasi salamat sang dia.”
Bajaga bae-bae, te hari kiamat su mau deka!
(Mateos 24:15-28; Lukas 21:20-24)
14 Yesus omong tarús, bilang, “Satu orang yang jahat mo mati nanti datang. Dia maso pi badiri di tampa pamali di Tuhan Allah pung Ruma Sambayang Pusat, yang sonde pantas buat dia, sampe dia bekin noju itu tampa. Andia ko Tuhan Allah bale balakang kasi tenga itu tampa. Kalo bosong su lia bagitu, ati-ati, ó! (Sapa yang baca ni, ju musti ati-ati!) Itu jadi tanda, bilang, hari-hari susa su sampe di muka pintu. Kalo su lia bagitu, orang di propinsi Yudea bangun lari pi gunung suda.
15 Deng musti lari capát-capát, ko biar jang calaka. Kalo ada yang su kaluar dari ruma, jang pulang pi ame barang lai.
16 Ju orang yang ada di kabón, jang kambali ko ame kaen panas lai. Ma lari tarús sa!
17 Yang paling kasian, parampuan yang ada dudu parú, deng mama-mama yang ada kasi susu ana mera. Ko dong sonde bisa lari capát na.
18 Jadi, lebe bae bosong sambayang ko minta hal jahat tu, jang jato pas deng musim ujan.
19 Te itu hari talalu susa mo mati! Mulai dari Tuhan Allah bekin ini dunya sampe sakarang, orang-orang balóm parná lia susa bésar macam ke bagitu. Deng nanti orang ju sonde lia ulang susa macam bagitu lai.
20 Kalo Tuhan sonde kasi pende itu hari, nanti sonde ada satu orang ju yang bisa batahan idop. Ma, tagal Tuhan Allah sayang Dia pung orang yang Dia su pili dong, andia ko Dia kasi pende itu hari-hari susa dong.
21 Nanti kalo itu hari su sampe, bosong dengar orang dong, bilang, ‘Lia dolo! Kristus ada di sini!’ Ma orang laen bilang, ‘Kristus ada di sana!’ Ma bosong jang dengar, é!
22 Te nanti ada orang kaluar ko puku dada, bilang, ‘Beta ni, Kristus!’ Yang laen lai bilang, ‘Beta ni, Tuhan Allah pung jubir.’ Nanti dong bekin tanda heran macam-macam pake setan pung kuasa ko putar-balek orang. Dong coba-coba ko Tuhan Allah pung orang dong ju kaná tipu!
23 Ma bosong musti jaga bae-bae, é! Itu hari-hari susa dong balóm sampe, ma Beta su kasi inga memang sang bosong, ó!”
Manusia Tulen pung datang
(Mateos 24:29-31; Lukas 21:25-28)
24 Ais Yesus sambung lai ko kasi tau Dia pung ana bua dong, bilang, “Kalo itu hari-hari susa dong su abis,
‘Nanti matahari jadi galáp,
bulan ju su sonde taráng lai.
25 Bintang-bintang bajato dari langit,
deng kuasa di langit dong jadi harba-biruk.’
26 Abis itu, baru samua orang dapa lia sang Beta, Manusia Tulen ni. Nanti Beta datang di awan dari langit. Deng samua orang dong dapa lia Beta pung kuasa, deng Beta pung hebat samua!
27 Ais Beta parenta Tuhan Allah pung ana bua di sorga, ko pi kumpul samua orang yang Beta su pili dari dunya pung ujung-ujung, dari matahari nae sampe matahari turun; dari utara sampe salatan.”
Hari-hari susa jadi tanda Tuhan Yesus pung datang
(Mateos 24:32-35; Lukas 21:29-33)
28 Yesus sambung Dia pung omong, bilang, “Beta ame umpama dari pohon. Kalo dia pung daon mulai kuning, itu tanda, bilang, musim panas su deka-deka datang.
29 Bagitu ju, kalo bosong su lia hari-hari susa datang, sama ke yang Beta su kasi tau tadi tu, itu tanda, bilang, Beta su deka-deka datang.
30 Sakarang, dengar bae-bae! Dari samua orang yang idop sakarang ni, nanti ada yang balóm mati, te itu hari-hari susa dong su datang.
31 Biar langit deng bumi su ilang, ma Beta pung omong ni batahan sonde abis-abis.”
Tuhan Yesus pung waktu datang tu, rahasia
(Mateos 24:36-44)
32 Yesus omong tamba, bilang, “Sonde ada satu orang yang tau kapan Beta pung hari deng jam datang kambali. Tuhan Allah pung ana bua di sorga, ju sonde tau. Beta sandiri, ju sonde tau. Cuma Beta pung Papa sa yang tau.
33 Tagal itu, bosong musti bajaga bae-bae, tagal bosong sonde tau kapan dia pung waktu.
34 Sonde lama lai Beta su pi kasi tenga sang bosong, ma nanti Beta datang kambali. Sama ke tuan ruma yang jalan kasi tenga dia pung ruma ko pi tampa jao. Dia suru dia pung ana bua dong ko urus bae-bae itu ruma. Deng dia bagi kasi dong satu-satu deng dia pung karjá. Dia parenta tukang jaga pintu ko bajaga bae-bae, sampe dia pulang.
35 Bosong ju musti bajaga siang-malam, tagal bosong sonde tau kapan tuan ruma pulang. Pulang sore ko, tenga malam ko, siang ko, waktu matahari nae ko. Bosong sonde tau kapan.
36 Jang sampe dia datang takuju, te dapa bosong ada tidor masanggorok.
37 Jadi, apa yang Beta kasi tau sang bosong ni, Beta ju kasi tau samua orang laen, bilang, ‘Bosong musti bajaga bae-bae ko sambut Beta pung datang.’ ”
[Sampe di situ, Tuhan Yesus barenti ba'omong deng Dia pung ana bua dong di gunung Saitun.]