6
Orang Nasaret dong tola sang Tuhan Yesus
(Mateos 13:53-58; Lukas 4:16-30)
1 Ais ju, Yesus deng Dia pung ana bua dong samua pulang pi Dia pung kampong Nasaret.
2 Pas kaná deng orang Yahudi pung hari sambayang, Yesus maso pi di ruma ibadat ko mangajar. Itu hari ada banya orang yang pi sambayang. Waktu dong dengar Dia pung ajaran, dong taheran-heran, ko bilang, “Ini orang pung pintar lai! Dia ju pung kuasa na! Karmana ko Dia bisa bagitu?
3 Padahal Dia cuma tukang kayu. Kotong kanál Dia pung mama Maria; deng Dia pung adi-adi dong, andia Yakobis, Yoses, Yudas deng Simon. Dia ju ada pung adi parampuan barapa orang. Kotong samua tenga satu kampong na!” Andia ko dong camburu sampe dong su sonde mau dengar sang Dia lai.
4 Ju Yesus kasi tau, bilang, “Memang batúl! Orang lebe suka kasi hormat sang Tuhan Allah pung jubir dari tampa laen, daripada di kampong sandiri.”
5-6 Ma itu orang dong pung hati karás mo mati, sampe dong sonde mau parcaya sang Yesus lai. Andia ko Dia heran, ju Dia sonde pake Dia pung kuasa lai di situ. Dia cuma bekin bae satu-dua orang saki sa.
Tuhan Yesus utus Dia pung ana bua dua blas orang
(Mateos 10:5-15; Lukas 9:1-6)
Abis ju, Yesus pi kuliling di kampong-kampong yang badeka ko ajar orang dong, Tuhan Allah pung mau.
7 Dia pange ame Dia pung ana bua dua blas orang ko suru dong bajalan dua-dua orang pi kasi tau Tuhan Allah pung Kabar Bae. Dia ju kasi kuasa sang dong ko usir setan.
8-9 Dia parenta sang dong, bilang, “Bosong sonde usa bawa bam-banya di jalan. Sonde usa bawa bakál, doi, deng tas. Bawa tongkat deng sandal di kaki, deng satu baju sa.
10 Kalo ada orang tarima sang bosong di dong pung ruma, na, bosong musti tenga di situ sampe bosong barangkat lai.
11 Ma kalo sampe di satu tampa, abis orang di situ dong sonde mau tarima, deng sonde mau dengar sang bosong, na, angka kaki dari situ. Ais kasi tau sang dong, bilang, ‘Bosong sonde mau dengar na. Jadi biar bosong pikol tanggong-jawab sandiri!’ ”
12 Abis ju, dong pi ko kasi tau itu Kabar Bae. Dong bilang samua orang musti barenti suda dari dong pung sala-sala, ais bale ko idop iko Tuhan pung mau-mau.
13 Ju dong usir kasi kaluar setan dong. Abis itu, dong taro minya di orang saki dong pung kapala, ko sambayang bekin bae sang dong. Ju dong bae memang.
Dong potong bekin mati sang Yohanis Tukang Sarani
(Mateos 14:1-12; Lukas 9:7-9)
14 Itu waktu, orang di mana-mana su kanál Yesus. Carita so'al deng Dia pung kuasa tu, ju su sampe di raja Herodes pung talinga. Ada orang bilang, “Yohanis Tukang Sarani tu, su idop ulang di Yesus pung diri! Andia ko, Dia bisa bekin itu tanda heran dong samua.”
15 Ma ada orang laen yang bilang, “Sonde! Ini Elia yang su idop ulang di Dia pung diri. Ko, Tuhan Allah pung jubir yang laen dari dolu dong.”
16 Ma waktu raja Herodes dengar dong omong ame Yesus bagitu ju, dia manyao, bilang, “Ini tantu Yohanis Tukang Sarani yang tempo hari beta suru potong ame dia pung kapala. Sakarang dia su idop ulang lai, ó!”
17-18 Raja Herodes suru bagitu, tagal dia ada parkara bésar deng Yohanis. Dia pung carita bagini: raja Herodes su kawin ame sang dia pung adi Filipus pung maitua, nama Herodias. Padahal Filipus deng Herodias balóm bacere. Andia ko Yohanis togor ulang-ulang, bilang, “Papa Raja sonde bole ba'ame deng papa pung adi pung bini. Te itu su langgar kotong pung adat Yahudi na!” Ma Herodes kawin deng itu parampuan sa. Ais ju, dia suru orang dong pi tangkap ame sang Yohanis ko kasi maso pi bui.
19 Tagal Yohanis su togor ulang-ulang bagitu, andia ko itu parampuan simpan hati ko mau bunu bekin mati sang dia sa. Ma balóm sampat, te Herodes su tahan ame sang dia di bui.
20 Ju dia suru tantara dong ko jaga bae-bae sang dia.
Memang Herodes eleng sang Yohanis. Dia tau, bilang, Yohanis tu, Tuhan Allah yang kirim sang dia. Deng dia tu, orang bae. Herodes memang suka dengar Yohanis pung omong. Ma satu-satu kali, dia pung hati tar enak dengar Yohanis pung omong.
21 Ais itu, ju satu hari, mama Herodias dapa sampat ko balas dia pung saki hati. Itu hari, dong ada bekin raja Herodes pung hari jadi. Dong undang orang-orang bésar ko dong datang makan hari jadi. Yang datang tu, orang pamarenta, tantara pung kapala dong, deng tua-tua adat Galilea dong.
22 Di teng-tenga pesta, ju mama Herodias pung ana nona maso pi baronggeng. Dia pung ronggeng talalu bagus, sampe bekin sanáng Herodes deng dia pung tamu dong. Ju Herodes pange sang dia ko tanya, “Lu mau minta apa sang beta, na, kasi tau sa! Nanti beta kasi.
23 Biar lu minta bagi dua beta pung karaja'an ju, beta kasi. Beta sumpa deng Tuhan Allah pung nama!”
24 Ju itu nona pi ko tanya dia pung mama, bilang, “Mama! Mama kira beta minta apa yang paling bae sang papa?”
Ju dia pung mama manyao, bilang, “Naaa! Pi ko minta ame itu Yohanis pung kapala.”
25 Abis, itu nona datang sang Herodes capát-capát, ko pasán, bilang, “Papa! Beta minta ko bawa kasi sang beta Yohanis pung kapala taro dalam dulang. Sakarang juga!”
26 Herodes dengar ame bagitu, ju dia pung hati ilang memang. Ma dia su sonde bisa hela kambali dia pung sumpa, te samua orang su dengar na.
27 Abis ju, dia parenta satu komandán ko pi potong ame sang Yohanis pung kapala dari dalam bui.
28 Ju dong potong ame Yohanis pung kapala, abis taro dalam dulang, ko pi kasi sang itu nona. Dia tarima ame itu dulang, ju dia koko bawa pi kasi sang dia pung mama.
29 Waktu Yohanis pung ana bua dong dengar, bilang, dong su angka bawa Yohanis pung kapala, ju dong datang ame dia pung mayat, ko pi kubur sang dia.
Bagitu sa, carita Yohanis pung mati.
Tuhan Yesus kasi makan lima ribu orang lebe
(Mateos 14:13-21; Lukas 9:10-17; Yohanis 6:1-14)
30 Satu waktu, ana bua yang Yesus su utus tu, dong pulang samua ko bakumpul ulang lai deng Dia. Dong kasi tau samua yang dong su bekin, deng apa yang dong su ajar sang orang dong.
31 Ma itu waktu, orang banya sakali bajalan pi-datang ko cari sang Yesus. Sampe-sampe Dia deng Dia pung ana bua dong sonde bisa makan lai. Ju Yesus kasi tau dia pung ana bua dong, bilang, “Mari kotong pi cari tampa sunyi, ko kotong bisa barenti cape ame sadiki dolo, ma.”
32 Jadi dong samua nae pi dalam parahu ko pi cari tampa sunyi yang jao dari kampong.
33 Ma itu orang banya dong dapa lia Yesus dong pung parahu pi iko-iko itu dano pung pinggir. Ais dong kaluar kampong iko jalan darat, ju dong sampe lebe dolo dari Yesus dong.
34 Waktu Yesus turun dari parahu, ju Dia dapa lia orang banya su tunggu sang Dia. Ais ju Dia jato kasian sang dong, tagal dong samua sonde tau mau bekin karmana, sama ke domba yang sonde ada pung gambala. Ais Dia ajar sang dong Tuhan Allah pung mau
35-36 dari siang sampe sore. Ju Dia pung ana bua dong kasi tau sang Dia, bilang, “Papa! Lebe bae Papa suru ini orang dong samua ko dong pi béli makan di kampong-kampong badeka di sini. Te ini su sore ni, deng sonde ada makan di sini.”
37 Ma Yesus manyao, bilang, “Sonde usa! Bosong sa yang kasi makan sang dong.”
Ma dong bale tanya, bilang, “Awee! Kalo botong kasi makan orang bagini banya, na, botong musti kasi kaluar doi banya mo mati! Sama ke satu tukang pung gaji satu taon! Mana bisa botong dapa doi bagitu banya!”
38 Ju Yesus manyao, bilang, “Bosong pi cari tau dolo, sapa yang ada bawa bakál.”
Ais ju dong pi cari tau, ju dong kambali kasi tau, bilang, “Ada roti lima bua, deng ikan dua ekor sa.”
39 Ais Yesus suru itu orang samua ko dudu bakumpul di atas rumput.
40 Ju dong pi dudu bakumpul. Ada yang bakumpul saratus-saratus orang, deng ada yang lima-lima pulu orang.
41 Ais ju, Yesus ame itu roti lima bua, deng itu ikan dua ekor. Ju Dia mangada pi langit ko minta tarima kasi sang Tuhan Allah. Abis itu, Dia kasi pica-pica itu roti, ju sorong kasi pi di Dia pung ana bua, ko dong pi bagi-bagi kasi sang itu orang dong samua. Itu ikan dua ekor ju Dia bagi-bagi kasi.
42 Ais ju dong samua makan sampe kinyang.
43 Makan abis ju, itu ana bua dong pi kumpul ame itu makanan yang lebe dong, ponu dua blas bakul.
44 Dong kira-kira ada lima ribu orang. Itu baru laki-laki yang makan sa. Balóm reken tamba parampuan deng ana-ana.
Tuhan Yesus jalan di atas aer
(Mateos 14:22-33; Yohanis 6:16-21)
45 Abis itu, Yesus suru Dia pung ana bua dong pi nae parahu ko pi lebe dolo di kampong Betsaida di itu dano pung sablá. Ma Dia masi tenga di situ, ko suru itu orang banya dong pulang.
46 Waktu dong samua pulang, ju Dia nae pi di gunung satu ko sambayang.
47-50 Waktu su malam ju, Yesus turun kambali. Dia su dapa lia ana bua dong pung parahu su sampe di teng-tenga dano. Ma dong ada badayong satenga mati, tagal parahu balayar lawan angin muka na. Waktu amper siang ju, Yesus pi iko sang dong. Ma Dia jalan sa di atas aer. Waktu Dia su mau lewat itu parahu, ju dong dapa lia sang Dia. Dong takuju mo mati. Tarús dong batanya, bilang, “Hee! Apa ni? Setan, ko apa?”
Ma Yesus langsung omong, bilang, “Woe! Bosong jang taku, ó! Ini Beta ni.”
51 Waktu Yesus nae pi dalam parahu, ju itu angin tadó memang. Dia pung ana bua dong samua heran tar abis-abis.
52 Dong baru lia Yesus pake Dia pung kuasa ko kasi makan lima ribu orang lebe. Ma dong balóm mangarti batúl Dia pung kuasa, tagal dong pung hati karás.
Orang saki di Genesaret dong rame-rame pi di Tuhan Yesus
(Mateos 14:34-36)
53 Waktu dong sampe di dano pung sablá, ju dong balabu di kota Genesaret pung pante.
54 Waktu dong turun dari parahu, orang banya su dapa lia sang dong. Ju dong batarea, bilang, “We! Yesus su datang, ó!”
55-56 Dong samua lari pi bakastau kuliling, ju orang dong pikol bawa datang orang-orang saki dong.
Pokonya, asal dong dengar, bilang, Yesus ada di satu tampa, dong rame-rame pikol bawa orang saki, ko kasi tidor sang dong di tana lapang. Dong pikir, kata, “Asal itu orang saki dong sonto ame Yesus pung ujung baju sa, tantu dong bae.” Sonto bagitu, ju dong bae memang.