17
Tuhan Allah kasi tunju Tuhan Yesus pung hebat
(Markus 9:2-13; Lukas 9:28-36)
1 Abis anam hari ju, Yesus pange sang Petrus, Yakobis deng dia pung adi Yohanis, ko dong sama-sama pi nae di atas satu gunung tinggi, ko dong sandiri di situ sa.
2 Sampe di atas, ju dong lia Yesus su jadi laen. Dia pung muka basinar sama ke matahari, deng Dia pung pakean jadi puti mangkilat.
3 Takuju sa, dong dapa lia Dia ada ba'omong deng ba'i Elia deng ba'i Musa.
4 Ju Petrus jadi bingung, sampe dia omong sambarang, bilang, “Bapa! Botong su enak di sini, ó! Jadi lebe bae botong bekin tiga lopo. Satu kasi sang Bapa, satu kasi ba'i Musa, deng satu lai kasi ba'i Elia.”
5 Waktu Petrus masi omong bagitu, takuju sa, awan turun datang ko tutu ame sang dong. Ju dong taheran-heran dengar satu suara kaluar dari itu awan, bilang, “Dengar, ó! Yesus ni, Beta pung Ana sayang. Dia salalu bekin sanáng Beta pung hati. Dengar bae-bae sang Dia, é!”
6 Dengar bagitu, ju itu ana bua dong taku mo mati, sampe dong jato matono.
7 Ma Yesus datang korek sang dong, ju Dia bilang, “We! Bosong bangun su. Jang taku!”
8 Ais dong angka muka, ma dong sonde lia sapa-sapa di situ. Te cuma ada Yesus sa.
9 Ais itu, dong mulai turun dari itu gunung. Ju Yesus larang sang dong, bilang, “Apa yang bosong baru lia tadi tu, jang kasi tau sapa-sapa, é! Te Beta, Manusia Tulen ni, musti mati dolo. Ais, nanti kalo Beta su idop kambali, baru bosong bole kasi tau orang.”
10 Ju dong tanya sang Dia, bilang, “Bapa ni, memang Kristus, ma ba'i Elia di mana? Te itu guru agama dong ajar, bilang, ba'i Elia musti datang dolo, baru Kristus datang. Ma iko Bapa, karmana?”
11 Yesus manyao, bilang, “Memang batúl. Ba'i Elia musti datang dolo, ko buka jalan kasi sang Kristus.
12 Ma dengar bae-bae, é! Ba'i Elia su datang, ma orang sonde kanál sang dia. Dong bekin susa sang dia, iko dong pung mau. Bagitu ju, nanti dong bekin sang Beta, Manusia Tulen ni.”
13 Dengar abis bagitu, baru dong tau, bilang, Ba'i Elia yang Yesus ada omong tu, andia Yohanis Tukang Sarani.
Tuhan Yesus bekin bae satu ana yang takaná setan
(Markus 9:14-29; Lukas 9:37-43a)
14 Ais waktu Yesus dong su kambali, dong katumu deng orang banya yang ada tunggu sang dong. Ju ada satu bapa datang tikam lutut ko minta tolong sang Dia,
15 bilang, “Bos! Kasian beta pung ana dolo! Te dia saki gila kambing, deng dia sangsara mo mati. Kalo itu panyaki datang, na, dia suka tajato dalam aer, ko dalam api. Tolong dolo, Bos, é!
16 Beta su bawa sang dia pi Bos pung ana bua dong, ma dong sonde bisa bekin bae sang dia.”
17 Dengar bagitu, ju Yesus masparak sang Dia pung ana bua dong, bilang, “Hee! Bosong ni su talalu! Beta su ajar ulang-ulang sang bosong, ma bosong sonde mangarti bae-bae. Deng bosong sonde parcaya batúl-batúl sang Beta! Beta musti sabar sang bosong sampe kapan lai? Mari bawa itu ana datang sini!”
18 Dong bawa itu ana, ais Dia usir buang setan kaluar dari itu ana. Ais, itu setan kaluar kasi tenga itu ana, ju dia bae memang.
19 Ais itu, waktu Yesus ada sandiri sama-sama deng Dia pung ana bua dong, dong tanya sang Dia, bilang, “Bapa! Akurang ko tadi botong sonde bisa usir kasi kaluar itu setan?”
20 Yesus manyao bale, bilang, “Bosong sonde bisa usir itu setan, tagal bosong sonde parcaya batúl na. Inga, é! Kalo bosong parcaya batúl-batúl sang Beta, biar cuma sadiki ana ju, bosong bisa parenta satu gunung, bilang, ‘He, gunung! Pinda sana!’ Tantu sa dia pinda.
21 [Ma dengar, é! Setan dong memang jahat. Kalo bosong sonde sambayang deng puasa ko minta tolong sang Tuhan, na, bosong sonde bisa usir setan macam bagitu.”]
Tuhan Yesus omong kali kadua so'al Dia pung mati
(Markus 9:30-32; Lukas 9:43b-45)
22 Ais satu kali, Yesus deng Dia pung ana bua ada bakumpul di propinsi Galilea. Dia kasi tau sang dong, bilang, “Sonde lama lai, te dong mau jual sang Beta pi orang laen.
23 Ais dong bunu bekin mati sang Beta, Manusia Tulen ni. Memang Beta mati, ma nanti dia pung lusa, Beta idop kambali.”
Dengar Dia pung omong bagitu, ju Dia pung ana bua dong hati susa mo mati.
Tuhan Yesus omong so'al ruma sambayang pung pajak
24 Waktu Yesus deng Dia pung ana bua dong datang di kampong Kapernaum. Ju tukang tagi bea dong, datang sang Petrus ko tanya, bilang, “Bosong pung Guru bayar Ruma Sambayang Pusat pung pajak, ko sonde?”
25 Ju Petrus manyao, bilang, “Bayar, é!”
Waktu dia pulang, ju Yesus langsung kasi tau sang dia lebe dolo, bilang, “We, Simon! Coba lu pikir. Raja-raja di ini dunya ame pajak dari sapa? Dari dong pung ana sandiri, ko dari orang laen?”
26 Petrus manyao, bilang, “Dari orang laen!”
Yesus sambung lai, bilang, “Kalo bagitu, raja pung ana sandiri sonde usa bayar, to?
27 Bagitu ju deng Ruma Sambayang Pusat pung pajak. Ma, kotong sonde usa bekin mara itu tukang pajak dong. Jadi lebe bae, lu pi pancing ikan di dano sa. Lu tangkap ame ikan partama, na, buka dia pung mulu. Nanti lu dapa doi perak satu di situ. Ais pake itu doi, ko pi bayar kotong dua pung pajak. Te itu su pas buat kotong dua.”