WAI PII EPE
MATYUAME
PEPA PIAMO DOKO
Pii Wambao Kandapenge Dupa
Ee kana 70 ad dosale Makeme wai pii epe doko pepa pia. Pyateamopa, Matyuame Makenya buku piamo doko itaki pyao kandatala, maitapyao baanya buku dake Giriki piimi pepa pia. Matyu baa akali 12 disaipolo dutupanya mende. Baanya kenge mende doko Lipai lenge. Baanya kalai pyoo takisa nyoo kateamopa, Jisasame wii lao lanyia. Dokopa baanya takisa nyingi kalai doko kaeyapala, Jisasa watao paeya. Paeyao pituu, Jisasanya kalai piapi, mana leapi, dupa pitaka lengeme kandao, moname masoo etapala, wai pii epe dake pyanya setea.
Propeta dupame Mesaeya doko ipata-lamona lao, pii doko pyanya seteamino dupa pitaka angi jiamo kandatala, Matyuame Juda dupame kandatala, Jisasa doko Mesaeya-lamona lao tungi pina lao pia-pyaa. Dopa piamo dokome, kamalya katenge dupa yakinao daa, dupa apata mona kapilyetala, Gotenya isingi mate doko nyetamina lao, wai pii epe dake pepa pyanya setea.
1
Jisasa Kraisanya Yumbange Dupa
(Lk 3:23-28)
1 Pii dake Jisasa Kraisanya yumbange tata paliu epeamino dupanya. Jisasa baa Dapiti tatanya mandipae. Dapiti baa Abrakame tatanya mandipae.
2 Abrakameme Aisake mandea. Aisakeme Jekope mandea. Jekopeme Juda mandipala, dee wane ane mendatupa apataka mandea. 3 Judame Peresapa, Serapa mandea. Dolaponya endangi doko Tama lenge. Peresame Esorone mandea. Esoroneme Ramo mandea. 4 Ramoame Aminadape mandea. Aminadapeme Nasone mandea. Nasoneme Salomone mandea. 5 Salomoneme Boasa mandea. Boasa endangi doko Reapa lenge. Boasame Obeta mandea. Obeta endangi doko Ruta lenge. Obetame Jesi mandea. 6 Jesiame Kiŋi Dapiti mandea.
Dapitimi Solomone mandea. Solomone endangi doko wamba Uria etanenge doko. 7 Solomoneme Reoboame mandea. Reoboameme Abaija mandea. Abaijame Esa mandea. 8 Esame Jeosapata mandea. Jeosapatame Jeorama mandea. Jeoramame Usia mandea. 9 Usiame Jotame mandea. Jotameme Easa mandea. Easame Esekia mandea. 10 Esekiame Manase mandea. Manaseme Emone mandea. Emoneme Josaeya mandea. 11 Josaeyame Jekonaeya mandipala, dee wane ane mendatupa apataka mandea. Dokopa Babilone tange yanda singi dupame, Israele tange dupa yanda pyoo ita minatala, Babilone anjoo soo peami.
12 Pateaminopa, Jekonaeyame Seatiele mandea. Seatieleme Serubabele mandea. 13 Serubabeleme Abiuta mandea. Abiutame Eliakimi mandea. Eliakimimi Esoa mandea. 14 Esoame Sadoko mandea. Sadokome Akimi mandea. Akimimi Eliuta mandea. 15 Eliutame Eleasa mandea. Eleasame Matana mandea. Mataname Jekope mandea. 16 Jekopeme Josepe mandea. Josepe doko Maria akalingi. Maria doko Jisasa Kraisa lengema dokonya endangi.
17 Dopana, wamba Abrakame kateamo gii dokonya pituu, Dapiti kateamo dokonya tuu lao, yumbange tata paleamino dupa 14 paleami. Dapiti kateamo gii dokonya pituu, Israele tange dupa Babilone anjoo soo peamino, gii dokonya tuu lao, yumbange tata paleamino dupa 14-aka paleami. Babilone anjoo soo, peamino gii dokonya pituu, Kraisa doko mandeamo gii dokonya tuu lao, yumbange tata dupa 14-aka paleami.
Mariame Jisasa Mandeamo Doko
(Lk 2:1-7)
18 Jisasa Kraisa mandeamo dokonya pii lapae doko dake: Jisasa endangi Maria doko Josepe nyetana latala, andaka joo lakuo peteambi. Gii dokopa Josepeme Maria enda joo lanyala naeyamopa, Maria wane tongota peteamo kandeami. Wane doko Oli Spiritame maiya. 19 Josepe doko akali epe tolatae dokonyana, baame Maria elya pisala naeyatoo lao masia. Dopa lao masetala, baame enda doko elyakalao pata-pata lao kaeyatoana lao masia. 20 Dopa lao masoo kateamopa, Kamongonya enjele mendeme kombeame baa lamaiyoo, “Dapiti yumbange Josepe, Marianya inginya wane pilyamo doko, Oli Spiritame maipyana, embame baa enda joo lanyalanya paka nakaeyape. 21 Baame wane ane mende manditamo dokome, baanya endakali dupanya koo dupa kunao nepakamaitala pyoo nyetana, baanya kenge doko Jisasa* Jisasa Kenge Jisasa dokonya tenge doko, “Kamongome pyoo nyingi.” lape” lea. 22-23 Dopa pitana lao wamba Kamongome propeta mende-kisa pii leamo dake angi jia: “Enda mapukae, akali tole napingi mendeme wane ane mende manditamo, dokonya kenge doko Emanyuele latami.” (Emanyuele dokonya tenge doko, “Gote naima-pipa tole katenge.”) 24 Josepe paliu sakatatala, Kamongonya enjele dokome lamaiyamoli pyoo, baame enda doko baanya etanenge joo lanyia. 25 Lanyiamoaka doko, baame enda dokopa, yonge tole napiambinopaka, wane ane doko mandea. Wane doko mandipiamopa, Josepeme kenge doko Jisasa lea.