1 Erote baa kiŋi kateamopa, Mariame Jisasa yuu andake Judia, taono Beteleme dokonya mandea. Mandipiamopa, niki pyakaengesa tange, buinya tenge masingi akali mendapuame Jerusalema ipupala, 2 endakali kateamino dupa lamaiyoo, “Naimame Judamanya kiŋi katapengena latae, wane ŋaŋa dokonya bui doko niki pyakaengesa-kaita, katamo kandatala, baa mambo pyala epelyamanona, anja mandipae silyape?” leami. 3 Dopa lapae sepala, Kiŋi Erote baa mona kenda kaeya. Dokopa Jerusalema tange endakali longome sepala, mona kenda kaeyamiaka. 4 Eroteme pitisa mupapi, Mosesanya loo mana nyepae akalipi, dupa pitaka epena lao nyoo elyambu pia. Elyambu petala dokaita tipa pyoo, “Kraisa doko yuu andukunya mandipengepe?” lea. 5-6 Dopa leamopa, dokaitame pii yanu pyao, “Goteme propeta mende-kisa lamaiyamo doko, dapa lao pepa pyapae silyamo: 'Nyakama Beteleme tange dupa, nyakamanya yuu taono doko taono waka Judia silyamo, dupanya pundi-pundi naseta. Nyakamanya mandipaenya mandipae, dupanya isingi akali mende pyakalyetamo dokome, nambanya Israele tange endakali dupa setao katakatana' lao pepa pyapae silyamo. Dopa lapae silyamo dokonya, Kraisa doko yuu andake Judia dokonya taono yakane Beteleme mandipengena” leami.

7 Dopa lateaminopa, Eroteme akali niki pyakaengesa tange dupa elyakalao epena latala, bui doko gii andukupa katapyape lao tipa pia. 8 Dopa petala dokaita lamaiyoo, “Nyakama Beteleme pupala, wane doko kutakondape pyoo kutalapape. Kutao kandatala dokopa, nambame apata mambo pyala patoana, langya ipupape” lea. 9 Dopa lateamopa, kiŋi dokonya pii dupa sepala, nyakama peami. Peaminopa, wamba niki pyakaengesa-kaita bui kateamo kandeamino, dokoaka wambao pao wane mandipae siamo dokonya katea. 10 Dopa piamopa, nyakamame bui doko kandatala, mona etete auu kaeyami. 11 Mona auu kaeyao andaka kolandatala, Mariame wane doko kopetae peteamo kandeami. Kandatala dupame luma lakapala, wane doko mambo piami. Mambo pyapala, nyakamanya mandi dupa tangupala, golopi, kena tunduma pingi pautapi,* Pauta muni andake pupenge doko ita Boswelia lenge dokonya ipange nyepala, lyaka lasetala yangelyaminopa, kena tunduma pipae pingi. wele epe tunduma pipae† Wele muni andake pupenge doko ita ipange nyepala wasingima. mendapu maiyami. 12 Kuka Goteme akali dokaita Erote kalyamosa-kaita, pilyala naena lao kombea pimaiya. Dopa piamosa, dokaita kaitini waka mendenya-kaita, nyakamanya yuusa pilyiami.

13 Akali dokaita pateaminopa, kuka Kamongonya enjele mendeme, kombeame Josepe lamaiyoo, “Eroteme wane doko kutao pyao kumasalanya pilyamona, emba sakatatala, wane dokopa endangipa lanyoo, paka Isipi puu. Pupala katatenopa, nambame emba pilya lato gii dokopa pilyetena, emba dokonya mee katapena” lea. 14 Dopa lamaitiamopa, kuka dokopaka Josepe sakatatala, wane dokopa endangipa lanyoo, Isipi paanya pea. 15 Pupala Josepe Isipiaka katao, Erote kumiamo gii dokonya tuu lea. Dopa piamo dokome, wamba Kamongome propeta mende-kisa, “Nambanya ikiningi doko Isipi yuu doko yakinatala, nambame epena latona,”‡ nambame epena latona Giriki piimi “epena leona” lelyamo. Dakenya “epena latona” lelyamano. leamo doko angi jia.

16 Niki pyakaengesa tange masingi akali dupame Erote baa minakasetala, pupimi-lumu lao sepala, baa etete imbumi kumia. Imbu kaeyapala baame wamba akali dupa, bui doko gii andukupa kateape lao tipa piamo, doko masia. Masetala Betelemepi, yuu dosa makisa singipi, dupanya pupala, wane ane ee kana laponya anatena patae, dupa pitaka baanya yanda singi dupame, pyao kumasala pena lea. 17-18 Dopa piamo dokome, “Taono Rama dokonya, Resolonya wanenge dupanya, wane dupa lao yamataka lao, ee leaminopa, endakali mendeme dupanya mona minao taiyu lasakamaipenge nanjiana” lao, wamba propeta Jeremaeyame leamo doko angi jia.

19 Erote kumateamopa, Kamongonya enjele mende Isipi pupala, kombeame Josepe 20 lamaiyoo, “Wane doko pyalanya piamo akali doko kumatelyamona, embame wane dokopa endangipa lanyoo, Israele pilya” lea. 21 Dopa lateamopa, Josepeme wane dokopa endangipa lanyoo, Israele pilyia. 22 Pilyiamoaka doko, Akelesa dokome baanya takange Erotenya panda nyepala, Judia yuu dokonya kiŋi joo kalyamo lapae sepala, Josepe yuu dokaita paanya paka kaeya. Dokopa Goteme kombeame, Judia yuu dokonya nakatape lao lamaiyamo dokonya, baame wane dokopa, endangipa lanyoo Galilea pea. 23 Pupala taono Nasarete lenge dokonya katea. Dopa piamo dokome, wamba propeta dupame, “Baa Nasarete tangena latamina” leamo pii doko angi jia.