1 Ee kana mendatupa pateamopa, Jone kaimbu pingi doko Judia yuu dokonya, endakali napalenge mendasa ipao katapala, pii tee pyao lamaiya. 2 Lamaiyoo pituu, “Gotenya isingi mate doko tengesa ipatelyamona, mona kapilyalapa” lea. 3 Wamba propeta Aisaiyame Jone kaimbu pingi doko kandao, “Endakali napalenge yuu mendasa akali mendeme katapala wii lao, 'Kamongonya kaitini doko depa lakamaiyepape. Kaitini koeyapae dupa tolasakamaiyepape' lao katatana” lea.

4 Jone baa yonge pee kamele itimi wasepaepi, matapu bulumakao yanungimi wasepaepi, dupa pyoo katea. Baa paiyombapi, ambulya kakasa lyingipi, dupa nao katea. 5 Dokopa Jerusalema tangepi, Judia tangepi, endaki Jodane mate dosale tangepi, longo dupa Jone kateamo dokonya peami. 6 Pupala dupame nyakamanya koo dupa lao panata piaminopa, baame endaki Jodane dokonya kaimbu pyakamaiya.

7 Dokopa Parasaipi, Sadyusiapi longo mendapu kaimbu pyekena lao epeamino kandatala, baame dokaita lamaiyoo, “Nyakama koo kanopatonya mandipae dupa! Gotenya imbu kaeyapae ipatamo doko, apimi langimusa, paka epelyamipi? 8 Nyakama kini mona kapilyeteamino doko, nyakamanya mana makandepi dupame panasalapape. 9 Abrakame nyakamanya yumbange dokonyana, nyakama yaka kalyamanona lao masala naeyalapape. Nambame nyakama langilyo: Goteme kapa pao kana silyamo datupa, Abrakamenya wane jina lapyali. 10 Goteme ita tenge dokonya, wua doko depa lanya setapelyamo. Ita dii epe manja naenge dupa pitaka, pokapala baame itatenya soo yangata.

11 “Akali maitapyao epelyamo dokonya, pupu lapae dokome namba ita minao. Nambame baanya moko pee dolapo, nyoo minakamaiyanya, namba epe daa. Nambame kaimbu pyekelyo dake, mona kapilyingi doko pyekelyona, baame Oli Spiritapa, itate kaiyepaepame nyakamanya kaimbu pyakata. 12 Wita angi imbupi pyasoo silyamopa, baame yapenge sapolo doko nyepala, ketae pyasingi. Dopa pingisa, poome imbu umbisa soo kambu pilyamopa, angi isa lapalapa kuiyetaenya ipao singi. Ipao silyamo dupa nyoo baanya nee setenge anda dokonya setapala, imbu dupa ita konjala naenge dokonya soo yangatana” lea.

13 Gii dokopa Jisasa Galilea yakinatala, endaki Jodane mate dokonya Joneme kaimbu pyekena lao pea. 14 Pao pyakameamopa, Joneme Jisasa lamaiyoo, “Embame nambanya kaimbu pyakapenge doko, aipuma nambame embanya kaimbu pyakatale lao epelepe?” lea. 15 Dopa leamopa, Jisasame baanya pii yanu pyakamaiyoo, “Nalimbame pyepale lao Goteme masilyamo, dupa apata pimbana pii” lea. Dopa leanya, Joneme baanya pii doko watao minatala, kaimbu pyakamaiya. 16 Jisasa kaimbu nyepala, endaki ketae pyakalyiamopa, kaiti saa papa laloo petala, Gotenya Oli Spirit doko yaka maiyolee joo lanao ipao, baa-kisa petea. 17 Dokopa kaiti-kisa katao, pii mende lea dokome lao pituu, “Doo kalyamo doko nambanya Ikiningi, mona setenge doko. Nambame baa etete auu kaengena” lea.