1 Jisasame baanya 12 disaipolo dutupa epena latala, imambu koo dupa watao pyao, endakali yaina tata longome pyapae dupa mee joo, kalai pina lao, pupu lapae doko, dokaita maiya. 2 12 aposolo dutupanya kenge dupa, wambao doko Saimone, baanya kenge mende doko Pita, baanya kaiminingi Andru, Sebedi ikiningi Jemesa, baanya kaiminingi Jone, 3 Pilipa, Batolomyu, Tomasa, takisa nyingi akali Matyu, Alopiasa ikiningi Jemesa, Tadiusa, 4 Saimone, baanya kenge mende doko Selote, Jisasa enge nyiamo akali doko, Judasa Iskariota, akali dutupa yapao nyia.

5 Jisasame 12 disaipolo dutupa, kalai pyaa pena latala lamaiyoo, “Endakali kamalya katengemapi, yuu Samaria dokonya taono singipi, dupanya nyakama napupape. 6 Israele tange sipisipi alu petae joo, kalyamino dupanya pupape. 7 Pupala, “Gotenya isingi mate doko tengesa ipatelyamona” lao lamaiyepape. 8 Endakali yaina pyapae dupa saka nyalapape. Kumapae dupa lenge tasalapape. Kopetali dupa mee jakamaiyepape. Imambu koo dupa watao pyakamaiyepape. Nyakamame mee nyilyamino dokonya, meaka maiyepape. 9 Nyakamame muni mendaipi mende manja naeyao mee pupape. 10 Akali kalai pilyami dupame, nee toma nengema. Nyakama kalai pyaa patamino yuu dupanya, endakali dupame nyakama nisepengena, nokainapi, moko peepi, pangalipi, yonge pee wakaowapi, mende nyoo napupape. 11 Nyakama taono andake-tamopi, yakane-tamopi, mendenya pataminopa, endakali mendeme nyakama auu kaeyao lanyeta mende kutao kandatala, doko-pipa iki katao etapala, pupenge gii dokonya, baa yakinatala pupape. 12 Nyakamame anda dokonya kolandatala, endakali dokonya palenge dupa auu kaeyao, kingi nyepala, “Nyakama Goteme nisalapomona” lapape. 13 Endakali dupame nyakama auu pyoo lanyetamino doko, nyakamanya pii epe latami doko, dupa-kisa sina kaeyalapape. Dopa napitamino doko, nyakamanya pii epe latami doko tange nyalapape. 14 Yuu tange mendeme nyakama auu kaeyao lanyala naeyao, nyakamanya pii doko nasoaka pia kandeno doko, andapi, taonopi dupa yakinatala pao pituu, mokonya yuu katatamo dupa lyanda lanya, setapala pupape. 15 Goteme endakali dupa mokosetamo gii dokopa, taono dokonya kenda pipae ipatamo dokome, taono Sodomo Gomorapanya kenda pipae ipatamo doko, ita minao ipatana lao, nambame nyakama kiningi langilyona” Jisasame lea.

16 Jisasame dee mende lao pituu, “Nambame nyakama sipisipi jepae dupa, yana kapu dupanya kainanya pupa lelyo. Dopana, nyakama kanopato dupame waa katengeli pyoo, kandao waa katao kalyepape. Yaka maiyolee dupame ema napyoo, mende minao koeyasala naeyoo petengeli pyoo pilyepape. 17 Nyakama endakali mendapuame nyakamanya lotuu anda dupanya, kote lamana latala, laminao pupala, konjame pyatamina, kandao isoo kalyepape. 18 Nyakamame namba tungi pyatala, watao paelyamino dokonya, endakali dupame nyakama pyalya lao soo, kiŋipi, gapenapi, dupanya enombanya katasetami. Katasetaminopa, nyakamame wai pii epe doko kiŋipi, gapenapi, endakali kamalya katengepi, dupa panao lamaitami. 19 Endakali dupame nyakama anjetala laminao, kote anda dupanya pataminopa, nyakamame pii aki lamanape, aipa pyoo lamanape lao masala naeyalapape. Kote lapenge gii dokopa, nyakamame pii lapenge dupa, Goteme dita. 20 Nyakamame latamino doko, masoo laa naeyatami. Takangenya Oli Spirit dokome, lungu pitamopa latamina” lea.

21 Jisasame dee mende lao pituu, “Akali mendapuame nyakamanya kaiminingi etete dupa, enge nyepala, pyao kumasina lao maitami. Akali mendapuame nyakamanya wane dupa dopaka pitami. Wane mendapuame kandapilyetala, nyakamanya endangi takangepi dupa pyao kumasina lao maitamiaka. 22 Nyakamame namba watao paeyatamino kandatala, endakali dupa pitakame nyakama etete imbu kaengitami. Dopa pitaminopapi, endakali mendeme kyeto joo katao etatamo doko, baa Goteme pyoo nyeta. 23 Dopana, endakali dupame taono mendenya, nyakama minao koeyasetamino dokopa, taono doko yakinatala, mendenya paka pupape. Nyakamame Israele yuu dokonya, taono dupa pitakanya kalai pyoo etala naeyataminopa, Akalinya Ikiningi doko ipatana lao, nambame nyakama kiningi langilyona” lea.

24 Jisasame dee mende lao pituu, “Mana nyingi akali mendeme, baanya mana lamaingi akali doko ita naminingi. Kalai akali mendeme baanya isingi akali doko ita naminingiaka. 25 Endakali dupame mana lenge akali doko, mana maitaminoliaka pyoo, mana nyingi akali doko mana maitami. Isingi akali doko mana maitaminoliaka pyoo, kalai akali doko mana maitami. Dopana, endakali dupame namba isingi akali doko kandao, kenge koo Belesabulu* Belesabulu dokonya kenge mende doko Satane. ditamino dokonya, nyakama nambanya tata dupa kandao, kenge etete koo mendapu ditamiakana” lea.

26 Jisasame dee mende lao pituu, “Sanga pyatae silyamo dupa pitaka tenda lopalyeta. Yalo petae silyamo dupa tenda panaseta. Dopana, nyakamame Gotenya yalo petae dupa panao lamaitaminopa, endakali dupame nyakama minao koeyasetamino lao paka nakaeyalapape 27 Nambame pii elyakalao langilyo dupa, panao lamaiyepape. Pii kakateme langilyo dupa, yuu manda dupanya katao wii lao lamaiyepape. 28 Yonge doko pyao kumasetamino dupame, imambu doko pyao kumasala naeyatamina, paka nakaeyalapape. Yongepi, imambupi, lapota pyao koeyasetala, ele panda koo dokonya pyandatamo akali doko, paka kaeyalapape. 29 Endakali dupame 10 toeame iki, yaka pimbinakae lapoma sambamili. Dopaka doko, Takange Gote dokome yaka dupanya mendaipi mende kumala naena lao, masilyamo doko, dupanya mende isa mangatala, kumala naengema. 30 Dopaka pyoo, Goteme nyakamanya aiyomba iti dupa pitaka, mendai-mendai lao itaki pingi. 31 Nyakamame yaka pimbinakae dupa ita minao kalyaminona, paka nakaeyalapape” lea.

32 Jisasame dee mende lao pituu, “Endakali mendeme endakali waka dupanya enombanya, namba Kraisa tatana latamo doko, nambame nambanya Takange kaitinya katenge dokonya enombanya, baa namba tatakana lato. 33 Dopaka doko, endakali mendeme endakali waka dupanya enombanya, namba Kraisa tata daana latamo doko, nambame nambanya Takange kaitinya katenge dokonya enombanya, baa namba tata daakana latona” lea.

34 Jisasame dee mende lao pituu, “Nambame isa yuu dakenya, endakali dupa mona setao katena epeena lao masala naeyalapape. Daa, endakali dupa mona setao katena lao naepeo. Wakale pyoloo pingi mana doko, sakatasala epeo. 35 Ikiningipa takangepa wakale pyoloo pingipi, wanengepa endangipa wakale pyoloo pingipi, aeyangepa wakale pyoloo pingipi, nambame mana doko, mapisala epeo. 36 Tenge dokonya, endakali mendenya taiyoko etete dupame, baa yandapipili jetami.

37 “Endakali mendeme baanya endangipi, takangepi, ikiningipi, wanengepi, mende moname etete auu kaeyapala, namba mee yongeme auu kaeyatamo doko, baa kapa pao namba tata joo nakatata. 38 Dee endakali mendeme, baanya poko ita doko tange nyoo soo, namba watao naipatamo doko, baa kapa pao namba tata joo nakatataka. 39 Endakali mendeme namba yakinatala, baa tange auu pyoo katapuli lao masetamo doko, baa koeyata. Endakali mendeme namba lao masetala, baa tange kame setamo doko, baa auu pyoo katatana” lea.

40 Jisasame dee mende lao pituu, “Endakali mendeme nyakama lanyetamo dokome, namba lanyeta. Namba lanyetamo dokome, namba puu leamo akali doko lanyetaka. 41 Endakali mendeme propeta mende baa propeta-lamona latala, lanyetamo doko, propeta dupa Goteme yole maitamoliaka pyoo, maita. Dee endakali mendeme akali mende tolatae-lamona latala, lanyetamo doko, akali tolatae dupa Goteme yole maitamoliaka pyoo, maita. 42 Dee endakali mendeme endakali tipya datupanya mende, namba watao paenge-lamona latala, endaki iki kamuo maitamo doko, baa tenda Goteme yole mende maitana lao, nambame nyakama kiningi langilyona” lea.