1 Jisasame baanya 12 disaipolo dutupa, mana lamaiyoo etapala, baa kateamo panda doko yakinatala, Galilea taono waka singi dupanya, wai pii epe doko mana lamaiyanya pea.

2-3 Jone kaimbu pingi doko anjetae paliu, Kraisame kalai pupu lapae dupa pilyamo lapae sepala, baanya disaipolo mendatupame Kraisa kateasa pupala, “Emba akali naima pyoo nyala ipatana latae singi dokope, pande naimame akali waka mende malisemape?” lao, tipa pyoo sala pena lea. 4 Dupame Jisasa kateamo dokonya pupala, baa tipa piaminopa, Jisasame dokaitanya pii yanu pyakamaiyoo, “Nyakama pilyetala, kandelyaminopi, silyaminopi, dupa Jone lamaiyepape. 5 Lenge monda dupa dee lenge telyamino. Moko koo dupa kaita paelyamino. Endakali kopetali dupa mee jakamailyamo. Kaleketa dupame pii silyamino. Endakali kumapae dupa sakatatala paelyamino. Endakali tipya dupame wai pii epe doko silyamino. 6 Dee akali mendeme namba maka kaeyapala, mona lapo palyala naenge doko, Goteme auu pisetae kalyamona lao Jone lamaiyepape” lea.

7 Jonenya disaipolo dutupa pilyoo pateaminopa, endakali kambu dupa Jone kaimbu pingi dokonya lao, Jisasame pii mendapu lamaiyoo, “Wamba nyakamame endakali napalenge yuu dokonya, aki mende kanja peami? Kembo yokopi mende poome ema-ema piamo kanja peamipi, 8 pande akali mende yonge pee yati pipae epe mendapu pyoo kateamosa, kanja peamipi? Daa, akali yonge pee yati pipae epe pingi dupa, kiŋi dupanya andaka katengema. 9 Nyakama peamino doko, propeta mende kateamo kanja peami. Propeta doko baa mee ambe propeta mende daa. 10 Akali doko kandao, Goteme dapa lea: 'Salapape! Nambame nambanya wai akali doko, wambao pena latopa, Mesaeya dokonya kaitini doko depa lakamaitana' lao pepa pyapae silyamo. 11 Nambame nyakama kiningi langilyo: Yuunya endakali dupa pitaka, Jone kaimbu pingi dokome ita minao katea. Dopaka doko, endakali mende Gotenya isingi mate dokonya, anasale joo kalyamo dokome, Jone ita minilyamo. 12 Jone kaimbu pingi dokome, pii lamaiyoo kateamo gii dokonya pituu, indupa tuu lao, endakali longo dupame Gotenya isingi mate doko, nyakamanya pupumi nyepala, isemana lelyamino. 13 Joneme pii tee pyao lamaitala naeyamopa, Mosesame loo seteamo dupapi, propeta dupame mana leamino dupapimi, Gotenya isingi mate doko ipatana leami. 14 Nyakamame dake kiningi-lumuna lao masetamino doko, dake salapape: Ilaija ipatana lao pii pepa pyapae singi doko, Jone kaimbu pingi doko kandao latae singi. 15 Nyakama kalekaita singi dupame, pii doko auu pyoo salapape.

16-17 “Endakali indupa gii dakepa kalyamino dupa, aki mendepa nambame makande pyuape? Nyakama wane kole dupame, kamapusa kambu lapoma pyapala, mumu lao wii laloo pingi dopale. Wane kole dupame dapa lengema: 'Naimame nyakamanya pulupapunya wee pyakamanopa, dokonya danisa laa naeyalamino. Naimame kondo kaeyao ee wee lenge doko lapumanopa, nyakamame ee laa naeyalamino.'

18 “Dopaleaka joo, endakali dupame Jone kandao, betesa waenepi dupa nanao kateamopa, mumu lao baa-kisa imambu koo mende palelyamona leami. 19 Dopaka doko, endakali dupame Akalinya Ikiningi doko kandao betesa waenepi, longo lao napumupa, mumu lao baa nee tiaka nakaeyao nenge-lamona lelyamino. Endakali koo pingipi, takisa nyingipi, dupa kaita minao apata kalyamona' lelyamino. Dopaka doko, Gotenya masepae epe nyilyami dupa watao minilyaminopa, masepae epe dokome kalai tolatae pipenge dupa, pipae singina,” Jisasame lea.

20 Jisasame mirakolo kalai longo piamo taono dupanya tange endakali dupa, mona kapilyala naeyaminosa, baame pyalanya lao pituu, 21 “Taono Korasina tangepi, Betsaida tangepi, dupa nyakama koeyatamina, kandao kalyepape. Mirakolo kalai nyakamanya taono dupanya, pio dupa, taono Saidone tangepi, Taeya tangepi, dupame kandeamili doko, nyakamame yonge pee pumbuti dupa petala, yonge lindi pyapala, wamba mona kapilyiamili. 22 Goteme endakali mokosetamo gii dokopa, Taeyapi, Saidonepi, dupa-kisa tenge andake setataka doko, nyakama Korasina tangepi, Betsaida tangepi, dupa-kisa Goteme tenge eteteaka andake setata. 23 Dee nyakama taono Kapename tange dupa, kapa pao kaiti-kisa patama lao masilyamipi? Daa, Goteme nyakama ele panda koo dokonya, watao pyandata. Mirakolo kalai nyakamanya yuu dupanya pio dupa, Sodomo tange dupame kandeamili doko, mona kapilyiaminopa, yuu doko koeyala naeyali. 24 Goteme endakali mokosetamo gii dokopa, Sodomo tange dupa-kisa, tenge andake setataka doko, nyakama Kapename tange dupa-kisa, Goteme tenge eteteaka andake setatana” lea.

25 Gii dokopa Jisasame lao pituu, “Apane, emba yuupi, kaitipi, dupa pitakanya Kamongo. Mana longo kandenge endakalipi, mana longo nyepae endakalipi, dupame nakandena lao yalo piino dupa, wane ŋaŋa joo katengema endakali dupame, kandena lao embame panasino dokonya, nambame emba lao mambo pilyo. 26 Kini Apane, embame pituna lao auu kaengeme masinoli pyoo pii-lamo. 27 Nambanya Takangeme dupa pitaka nambame isepe lao, namba-kisa setea. Endakali mendeme Ikiningi doko angi nakandenge. Takangeme iki kandenge. Dee endakali mendeme Takange doko angi nakandengeaka. Ikiningimi iki kandenge. Dee Ikiningi dokome, Takange doko endakali mendeme kandena lao masetala, laitaka petelyamopa, endakali dokome Takange doko-lamo lao kandenge. 28 Nyakamame kenda pipae longo dupa soo, popo tandapi neami kandeno doko, namba katatosa soo ipupape. Nambame nisotopa, nyakama imambu nyetami. 29 Namba akali andiki pipae mende, namba anasale joo katenge. Nyakamame nambanya pii doko watao minao,* Giriki piimi 'Nambanya yoko ita doko nyalapa' latae kalyamoaka doko, naimame pii dutupanya tenge dupa lao tata lao pilyamano. namba-kisa mana nyala ipupape. Nyepala dokopa, nyakama imambu setami. 30 Nambanya kaitini dokonya paenge endakali dupa, leke-leke natao paengema. Nambame dopale mende salapale lao dilyo doko, kenda napingina” Jisasame lea.