1 Yuu gii 6-pela pateamopa, Jisasame Pita, Jemesa, Jemesa kaiminingi Jonepi, dutupa laminao yuu manda ketae mendenya pupala, nyakama iki kateami. 2 Kateaminopa dutupanya enombanya Jisasa waka jia. Baanya lengelyapi doko tii pyoo, niki tele pia. Dee baanya yonge pee dupa, kyoo lao pole-pole pia. 3 Dokopa Mosesa, Ilaija, Jisasa-pipa pii lao kalyu piaminopa kandeami. 4 Kandatala Pitame Jisasa lamaiyoo, “Kamongo, naima dakenya katapumanopa auu pyuumuna, embame kapana lao maseteno doko, nambame dakenya sele anda tepoma pitoo. Mende embanya, mende Mosesanya, mende Ilaijanyana” lea. 5 Pitame dopa lao kateamopa, kopa tii pipae mendeme ipupala, dokaita sanga pia. Dopa piamopa, kopa tambe-tambe dokonya pii mende lea dokome, “Doo kalyamo doko nambanya Ikiningi, mona setenge doko. Nambame baa etete auu kaengena, nyakamame baanya pii doko sakamaiyepape” lea. 6 Dokopa disaipolo dutupame pii doko sepala, etete paka kaeyapala, tombauli siami. 7 Dopa piaminopa, Jisasame ipao dutupa watandatala, “Nyakama paka nakaenya sakatalapa” lea. 8 Dopa leamopa, dutupame kandeaminopa, Jisasa baa iki katea.

9 Dokaitame yuu manda dokonya katao lanao pituu, Jisasame kyeto joo, “Nyakamame kanjimino doko mende lamaiya naeyalapape. Tanga Akalinya Ikiningi doko, kumapala sakatatamopa, endakali dupa lamaitamina” lea. 10 Dokopa disaipolo dupame Jisasa tipa pyoo, “Mosesanya loo mana nyepae akali dupame, aipuma 'Ilaija wambao ipatatamopa, Kraisa ipupengena' lengemape?” leami. 11 Jisasame dutupanya pii yanu pyakamaiyoo, “Kini, dupa pitaka depa lasalanya, Ilaija wambao ipupenge. 12 Dopaka doko, Ilaija ipateana lao nambame nyakama langilyo. Ilaija baaka epeamopa, endakali dupame kandao nanyepala, masiamili pyoo baa minao koeyasiami. Dopaka pyoo, Akalinya Ikiningi doko tanda maitamina” lea. 13 Dopa leamopa, Jone kaimbu pingi doko kandao, lelyamona lao disaipolo dupame masiami.

14 Endakali kambu pyao kateamino dokonya, Jisasapi baanya disaipolo tepo dutupa-pipa ipateaminopa, akali mendeme Jisasa kateasa ipao, baa lao luma lakapala 15 lamaiyoo, “Akali Andake, nambanya wane dake mandipaeme, itatenya nyoo yangao, endakinya nyoo pyandao pilyamopa, baa tanda longo nao katengena, embame baa kondo kaeyao nisakapoko. 16 Nambame baa laminao, embanya disaipolo dupa katamisa ipupupa, dupame baanya yaina doko kapa pao, mee jisala naeyalaminona” lea. 17 Dopa leamopa, Jisasame lao pituu, “Indupa endakali palelyamino dupame, koteaka lao pii tanga lao, Gote tungi napilyamino doko, namba oo koto doko, nyakama-pipaka tole katatope? Nyakama nongo pilyamino doko, andukupa tolataminopa lao nambame malisoo kataowape? Wane doko laminao asa ipupa” lea. 18 Lanyoo ipateaminopa, Jisasame imambu koo doko pyalanya latala, wane doko yakinatala pena leamopa pea. Puu piamopa, wane dokonya yaina doko mee jia. 19 Maitakao Jisasa iki peteamopa, disaipolo dupame ipupala baa tipa pyoo, “Aipuma naimame imambu koo doko, kapa pao watao napyalamape?” leami. 20-21 Dopa leaminopa, Jisasame dokaita lamaiyoo, “Nyakamame Gote kuki tungi pilyamino dokonya, imambu koo doko kapa pao watao pyala naeyalamino. Nambame nyakama kiningi langilyo: Nyakamanya Gote tungi pingi doko, yakane mastet dii dopale-pili, dokome yuu manda dake lamaiyoo, 'Emba sakatatala, omosale puu' lapinopa, pupyaliakana” lea.* Buku Baibolo Giriki piimi wambao pyatae mendatupanya vesa dakenya pii datupa apata lapae palelyamo: “Gote loma soo nee nanao katenge mana dokonya-kaita iki imambu koo dopale dupa watao pingi.”

22 Jisasa baanya disaipolo dupa-pipa, Galilea yuu dokonya kambu pyatala dokaita lamaiyoo, “Akali mendeme Akalinya Ikiningi doko, enge nyepala, endakali waka dupa laitaka pyaanya pilyamo. 23 Laitaka petatamopa, dupame baa pyao kumasetami. Kumasetataminopa, yuu gii tepo dokonya, Goteme baa dee sakatasetana” lea. Dopa leamo sepala, disaipolo dupa mona etete kenda kaeyami.

24 Jisasa baanya disaipolo dupa-pipa, taono Kapename dokonya pyakameaminopa, lotuu anda andakenya takisa nyingi akali dupame, ipupala Pita tipa pyoo, “Nyakamanya mana lenge akali dokome, lotuu anda andakenya takisa doko maingipi?” leami. 25 Dopa leaminopa, Pitame yanu pyao, “Kini maingina” lea. Dopa latala baa andaka pao kolandatala, pii mende latala naeyamopa, Jisasame tipa pyoo, “Saimone, embame aipa lao masili? Yuu dakenya kiŋi dupame nyakamanya ikiningi dupa-kisa takisa nyingimape, pande endakali yuu tenge tange dupa-kisa takisa nyingimape?” lea. 26 Pitame yanu pyao, “Endakali yuu tenge tange dupa-kisa nyingimana” lea. Dopa leamopa, Jisasame baa lamaiyoo, “Dopa-tamo doko, kiŋi ikiningi dupame takisa namaipenge. 27 Dopaka doko, naimame akali dokaita kenda pisala naeyamana, embame endaki pete dokonya pupala, uku mende pyandatala, pisa wambao nyeteno dokonya nengekaita angapu lakyepala, dokonya konde mende palyapomona nyepe. Nyepala pao lotuu anda andake dokonya, nalimbanya takisa maipi” lea.