1 Gii dokopa disaipolo dupame Jisasa tipa pyoo, “Gotenya isingi mate dokonya api alyasale joo katatape?” leami. 2 Dopa leaminopa, Jisasame wane koo mende epena latala, dokaitanya kainanya katasetala 3 lamaiyoo, “Nyakamanya mana doko aloo petala, anasale jetala wane koo joo nakatatamino doko, Gotenya isingi mate dokonya, napatamina lao nambame nyakama kiningi langilyo. 4 Endakali mendeme baa tange anasale jetala, wane koo dapale jetamo doko, Gotenya isingi mate dokonya alyasale joo katata. 5 Endakali mendeme namba lao masetala, wane koo dapale mende lanyilyamo dokome, namba lanyingiakana” lea.

6 Jisasame dee mende lao pituu, “Namba tungi pingi wane koo mende, endakali mendeme koo pina lao mapisetamo doko, kana andake mende baanya mangenya kende katatala, soo solowatanya pyandamili doko, auu pipyali. 7 Isa yuu dakenya, koo pina lao mapisingi dupa singi-lamo. Dopana endakali dupa pitaka-kisa makande pingi ipatana, kandao kalyepape. Kini makande pingi dupa ipatamoaka doko, endakali mendeme koo pina lao mapisetamo doko, baa koeyata-lamo! 8 Embanya kingi mokopi mendeme, emba koo pyaale lao mapisetamo doko, kepanya nepape. Emba kingi mokopi mendai iki kateta, lete etete katenge dokonya pupili doko, auu pipyali. Kingi mokopi lapota kateta itate konjala naenge dokonya, soo pyandamili doko, auu napipyali. 9 Embanya lenge mendeme koo pyaale lao mapisetamo doko, lukunya nepape. Emba lenge mendai iki tao, lete etete katenge dokonya pupili doko, auu pipyali. Emba lenge lapota tapeta, ele panda koo ita tao katenge dokonya, soo pyandamili doko, auu napipyali” lea.

10-11 Jisasame dee mende lao pituu, “Wane koo dupanya isingi enjele dupa, nambanya Takange kaitinya katenge doko-pipa, apata katengema. Dopana, nyakamame dupa kandanya palyala naeyalapape.* Buku Baibolo Giriki piimi wambao pyatae mendatupanya vesa dakenya pii datupa apata lapae palelyamo: “Akalinya Ikiningi dokome endakali alu petae dupa pyoo nyala epea.” 12 Nyakamame aipa lao masilyami? Akali mendenya 100 sipisipi katatamo dokonya, mendai alu pitamopa, baame aipa pitape? Baame 99 sipisipi dutupa, pau manda mendenya katena latala, mendai alu pitamo doko kutala naeyatape? 13 Nambame nyakama kiningi langilyo: Sipisipi 99 katatamino dutupa, auu kaeyatamoaka doko, baame mendai alu pitamo doko kutao nyepala, etete auu kaeyata. 14 Dopaka pyoo, nyakamanya Takange kaitinya katenge dokome, wane koo dupanya mende alu napipya laka lao, masingina” lea.

15 Jisasame dee mende lao pituu, “Embanya kaiminingi mendeme emba koo pingitamo doko, baa katatasa emba pupala, nyakamba iki pitipala, baanya koo pitamo doko, lao panasoo lamaipi. Lamaitinopa, baame embanya pii setamo doko, embanya kaiminingi doko dee pilyoo nyete. 16 Baame embanya pii nasetamo doko, pii pepa pyapae singili pyoo, mendai lapopi mende lanyepala, nyakambanya pii latambino dupa sina, laminao deaka lamaiya pupape. 17 Baame dutupanya pii nasetamo doko, embame siosanya endakali kambu pyatae dupa lamaipi. Dee baame siosanya apata pii nasetamo doko, baa kamalya katenge endakalipi, takisa nyingi akalipi, dopale-lamo lao kandatala, wandyuu kalyepape.

18 “Nambame nyakama kiningi langilyo: Nyakamame isa yuu dakenya endakali mendenya, kaita lyokatamino doko, Gotenya isingi mate dokonya lyokataeyaka katata. Nyakamame isa yuu dakenya, endakali mendenya kaita lumbatamino doko, Gotenya isingi mate dokonya lumbataeyaka seta. 19 Nambanya Takange kaitinya katenge dokome, mende pyekena lao, nyakamanya mendalapome mona mendai palyetala, tee latambinopa, baame latambiliaka pyakata. 20 Endakali lapo tepopi mendatupame, namba lao masetala, mendasa kambu pyao pitatamino dokonya, namba kainanya apata katatona lao, nambame nyakama langilyona” lea.

21 Dokopa Pitame Jisasa tipa pyoo, “Kamongo, nambanya kaiminingi mendeme koo petae katao pingitamopa, nambame baanya koo dupa, paa 7-pela kame sakamaipengepe, pande akipatesape?” lea. 22 Dopa leamopa, Jisasame yanu pyao, “Paa 7-pela iki daa. Paa 77 pyoo, koo pitamo dupa kame sakamaipengena lao lelyo. 23 Dopana, Gotenya isingi mate doko kiŋi mendeme, baanya kalai akali dupa-kisa, yanu maiyamo dupa tolasekena, latoo lao masiamo dopale. 24 Kiŋi dokome tee pyao yanu dupa, pyekena lao kateamopa, kalai akali yanu singi dupanya mende, laminao epeamino doko-kisa, 10 milion kina yanu sakamaiya. 25 Akali dokome yanu andake doko, kapa pao pyapenge nanjiamosa, kiŋi dokome baanya kalai akali dupa lamaiyoo, 'Nyakamame akali dakepi, baanya enda wanepi, dee oapi dupa pitakame muni nyepala, yanu doko pyekena lamaiyepape' lea. 26 Dopa leamopa, kalai akali dokome kiŋi dokonya enombanya, pao luma lakapala tee lao, 'Nambame embanya yanu dupa pitaka pyakatona, embame namba kondo kaeyapala, gii dipoko' lea. 27 Dopa leamopa, kiŋi dokome baa kondo kaeyapala, baanya yanu dupa kaeyapala yakinea. 28 Dopa peteamopa, kalai akali dokome pupala, baanya kalai akali yango mende-kisa, 100 kina baanya yanu sakamaingi doko kandanyia. Kandanyetala kalai akali yango dokonya, mangenya puu lao minatala, 'Nambanya yanu dutupa yapa pyaka' lea. 29 Dopa leamopa, kalai akali yango dokome tombauli sepala tee lao, 'Nambame embanya yanu dupa pitaka pyakatona, embame namba kondo kaeyapala, gii dipoko' lea. 30 Dopa leamoaka doko, baame daa latala, kalai akali yango dokome, yanu dutupa etao pyatakala ipatana, anjoo pyandatala pena lea. 31 Dokopa baanya kalai akali yango dupame, piamo doko kandatala, kondo kaeyao maka kaeyapala, kiŋi doko pao lamaiyami. 32 Lamaiyaminopa, kiŋi dokome kalai akali doko epena latala lamaiyoo, 'Emba kalai akali koo-lamo! Nambame emba kondo kaeyao, nisepoko lao tee lapino dokonya, nambanya yanu emba-kisa sipumu dutupa pitaka kaeyapu. 33 Nambame emba kondo kaeyapu dopaka pyoo, embanya kalai akali yango doko kondo kaeyateno!” lao pyalanya lea. 34 Dopa latala, kiŋi dokome imbu kaeyapala, kalai akali doko anjoo, tanda maina lao, anjingi andaka isingi akali dupanya kingilyaka maiyoo pituu, 'Akali dakeme nambanya yanu dutupa, etao pyatakala ipatana, anjoo soo pupa' lea-pyaa. 35 Dopana, nyakamanya kaiminingi mendeme koo pingitamo dupa, kiningi etete monanya katao kame nasetamino doko, nambanya Takange kaitinya katenge dokome, nyakamanya koo pitamino dupa, kame nasakatakana” lea.